HC Borbolla e HC Deportivo Liceo protagonizan este domingo, 13 de xuño, o segundo derbi deste curso no hoquei feminino coruñés na Ok Liga Prata.
Por se na cidade da Coruña parecía pouco o hoquei que se está a ver a raíz da disputa no Pazo dos Deportes de Riazor da Copa da Raíña e da Copa do Rei desta disciplina, o calendario da Ok Liga Prata reservou para o domingo na tarde, contra as 19:00 horas, a disputa do derbi herculino feminino. Veranse as facianas HC Borbolla e HC Deportivo Liceo no Pavillón de Monte Alto.
Será un duelo de rivalidade local de dúas velocidades, cun HC Borbolla loitando até o último alento por ascender á Ok Liga, e un equipo liceísta xa clasificado para competir o vindeiro ano na elite. Pero non perdamos de vista que un derbi, é un derbi. Aínda que ningún se xogase nada, que non é o caso, os sticks habían estar igualmente en todo o alto.
Na primeira volta o triunfo correspondeu para o conxunto verdibranco que adestra Carlos Loureiro que se impuxo pola mínima (1-0) ás tomatitas que adestra Santi Martínez en Elviña.
O HC Borbolla é cuarto con 19 puntos e 57 goles na súa conta do haber e 20 na do debe (golaverage 37) en dez partidos disputados. Está a catro puntos do CP Las Rozas que é o equipo que arestora ocupa o segundo lugar, que da acceso ao ascenso á Ok Liga.
As de Monte Alto veñen de golear ao UDC Rochapea 5-0 na xornada previa ao derbi coruñés. Mentres que o HC Deportivo Liceo xa está inmerso no plantexamento da vindeira tempada. Renovada Bea Gaete, unha das pezas chave desta tempada, o club coruñés xa anunciou as fichaxes de Alba Garrote e Adriana Soto.
Con so dous partidos por diante para finalizar a competición na Ok Liga Prata feminina, o conxunto que adestra Santi Martínez chega á cita absolutamente esixido e obrigado a gañar. Agora mesmo non dependen de si mesmas para xogar outro ano máis na Ok Liga, perder non é unha opción.
Santi Martínez: “Á hora do partido saberase xa o resultado de Las Rozas”
“Temos o equipo ao completo, agás Flor que, por motivos de traballo, non pode xogar”, conta Santi Martínez. Ao rival o técnico coruñés considera que os dous equipos da cidade na Ok Liga Prata son “equipos parellos. Viuse na primeira volta cando calquera dos dous equipos puido ter gañado”.
Santi Martínez, técnico do HC Borbolla: “Somos dous equipos parellos. Viuse na primeira volta que calquera dos dous equipos puido ter gañado”
De feito, o adestrador do HC Borbolla explica que os enfrontamentos que tiveron cos outros equipos con papeletas para seren aspirantes ao ascenso “foron moi igualdados. Incluso en dous deles chegamos a ter vantaxe. Se cadra nos pasou factura o cansanzo por ter unha plantilla curta”, plantexa o preparador das de Monte Alto.
Santi Martínez advirte que á hora do partido “xa se saberá o resultado que tivo o CP Las Rozas no seu desprazamento a Pamplona. Eso decidirá se dependemos de nós mesmas para ascender ou se, pola contra, xa non temos opcións na última xornada”.
Carlos Loureiro: “Diría que é un derbi descafeinado”
Pola contra o HC Deportivo Liceo, visita Monte Alto tras tres semanas sen competir e con todo o peixe vendido. As verdibrancas xa teñen asegurado o seu sitio na elite para a campaña 2021-22.
Segundo explicaba o seu adestrador, Carlos Loureiro, o conxunto do HC Deportivo Liceo presenta dúas baixas importantes para este encontro “a da chilena Bea Gaete, que xa regresou ó seu país ata setembro, e Cris Diz, que está en casa por ser contacto estreito de COVID-19″.
O entrenador das liceístas agarda un “partido reñido con opcións para os dous bandos. As xogadoras coñécense moi ben, polo que é moi difícil sorprender”.
Preguntado por se será un derbi desequilibrado, Carlos Loureiro, di que “máis que desequilibrado, eu diría que descafeinado. O partido da primeira volta foi de alto voltaxe, cos dous equipos xogándose parte das súas posibilidades. Agora está todo máis decidido, levamos xa unas semanas cun ritmo de adestramentos máis baixo e non competimos desde fai tres semanas”.
Malia todo, un derbi é un derbi, sexa descafeinado, desequilibrado ou a dúas velocidades, en calquera momento un dos dous equipos pisa o acelerador, mete a directa e lévase este partido de rivalidade coruñesa.
