- A Deputación de Pontevedra dá un paso máis no seu compromiso co deporte feminino cunha nova liña de axudas para impulsar a formación de mulleres adestradoras.
- Carmela Silva, presidenta da institución declaraba: “Ante os datos dramáticos de infrarrepresentación hai que tomar decisións e estas axudas van na nosa liña de apoiar ao deporte feminino”.
A Deputación pontevedresa dá un paso máis no seu compromiso coa igualdade e co impulso ao deporte feminino na provincia e lanza unha nova liña de axudas para fomentar e apoiar ás mulleres que desexen formarse para ser adestradoras.
Trátase, como subliñou hoxe a presidenta provincial Carmela Silva, dun novo e innovador esforzo encamiñado a rachar coas “dramáticas cifras” de infrarrepresentación que existen neste eido para as mulleres, que teñen que ver como o 84% dos postos de adestradores nos 50 clubs femininos de elite en España están ocupados por homes, e nos masculinos “estamos totalmente excluídas”.
Carmela Silva: “Irene Vilaboa, do equipo de balonmán Teucro, é a única adestradora na División de Honor Prata Masculina”
Acompañada do deputado de Deportes da Deputación de Pontevedra, Gorka Gómez, Carmela Silva lamentou que amais da irrelevancia das mulleres nos corpos técnicos dos equipos de elite femininos e da súa total ausencia nos masculinos, “onde Irene Vilaboa, do equipo de balonmán Teucro, é a única adestradora na División de Honor Prata Masculina”. Na opinión de Carmela Silva “hai que sinalar tamén o feito de que só hai 7 mulleres presidentas deses clubs femininos”.
“Cada vez que se fan fotos, todo son garabatas e traxes negros e azuis; as mulleres non existimos”. Ademais, segundo o Anuario de Estatísticas Deportivas 2021 do Ministerio de Cultura e Deporte, a porcentaxe de adestradores e adestradoras formados no ámbito estritamente federativo no o 2019 estivo composto nun 68% por homes e soamente nun 32% por mulleres.
Carmela Silva, presidenta da Deputación de Pontevedra: “Cada vez que se fan fotos, todo son garabatas e traxes negros e azuis; as mulleres non existimos”
“Ante estos datos hai que tomar decisións”, di Silva
A presidenta provincial manifestou: “Ante estes datos hai que tomar decisións”. Carmela Silva tamén explicou que a Deputación de Pontevedra vai “poñer en marcha estas novas axudas, que van permitir que as mulleres poidan matricularse naqueles cursos que lles permitan ter a formación para acadar os títulos que se existen para ser adestradoras. Non coñezo moitas administracións que teñan estes proxectos de financiar a formación das mulleres. Así que este é un paso innovador e de novo somos unha referencia na aposta porque as mulleres estean ben representadas no eido do deporte”.
Carmela Silva, presidenta da Deputación de Pontevedra: “poñer en marcha estas novas axudas, que van permitir que as mulleres poidan matricularse naqueles cursos que lles permitan ter a formación para acadar os títulos que se existen para ser adestradoras”
Carmela Silva lembrou que desde a chegada do actual Goberno provincial de Pontevedra tense feito un enorme esforzo “para equiparar as condicións de mulleres e homes no acceso ao deporte”. Sinalou que se igualaron as contías dos premios “que antes eran diferentes, máis grandes para os homes”, se equipararon tamén os recursos para deportistas promesa, de alto nivel e para o deporte olímpico e se impulsou que no financiamento aos clubs se tivese en conta que tiveran equipos de mulleres, “de xeito que nas nosas bases sumamos mais puntos a aqueles clubs que promoven o deporte feminino”.
Agora avánzase nesta política coas novas axudas que se lanzarán a próxima semana coa súa aprobación e publicación no Boletín da Provincia e que van servir para fomentar que as mulleres “poidan ocupar os postos de adestradoras”.
Prazo para solicitar as achegas da Deputación de Pontevedra
As mozas interesadas terán de prazo ata o 1 de decembro deste 2021 para solicitar as achegas, aínda que a liña manterase nos vindeiros anos. Neste senso, a presidenta subliñou que se fará tamén un esforzo na súa divulgación para que a información chegue a todas as mulleres que estean pensando en matricularse nestes estudos.
“Como é a primeira vez é probable que non academos un número moi grande de participantes –explicou a presidenta provincial -, pero a medida que se vaia tendo coñecemento, estou segura que en pouco tempo imos mellorar a cifra de mulleres adestradoras, porque teñen os títulos que se demandan para selo. Temos que animalas e non teño dubida de que o feito que haxa axudas as matrículas vai ser un elemento máis de impulso para que finalmente poidamos aumentar esa cifra”.
