O presidente da Deputación da Coruña, Valentín González Formoso, acompañado polo alcalde de Ferrol, Ángel Mato, e a deputada da área de Deportes da institución provincial, Cristina Capelán, visitou ao BAXI Ferrol para felicitar persoalmente ao plantel, corpo técnico e directiva polo seu recente ascenso á LF Endesa.
O equipo ferrolán realizou “unha tempada impecable” cun pleno de 29 vitorias, o que lle permitiu pasar da LF2 á máxima categoría do baloncesto feminino español, a Liga Feminina Endesa, onde competirá a vindeira tempada 2021-2022.
González Formoso destacou a “longa traxectoria de colaboración” entre a Deputación da Coruña e o club, así como o “brillante palmarés” e “as dúas décadas de compromiso co deporte feminino” do Uni Ferrol, e desexou á directiva presidida por Santiago Rey Cancela que “continúe colleitando éxitos deportivos na primeira categoría do baloncesto nacional para a cidade de Ferrol e para a provincia da Coruña”.
González Formoso salienta a aposta da Deputación “polo deporte feminino”
O presidente do ente provincial, Valentín González Formoso, destacou “a aposta da Deputación da Coruña polo deporte feminino”, puntuando a presenza de mulleres ou equipos femininos en todas as liñas de subvencións da área de Deportes da institución provincial. Un total de seis liñas de apoio ao deporta na provincia da Coruña, que este ano soben o seu orzamento ata os 4,4 millóns de euros e que inclúen tamén entre os gastos subvencionables o material relacionado coa protección fronte á COVID-19 coma máscaras, xel hidroalcohólico, termómetros ou probas para a detección do virus.
Ángel Mato (alcalde de Ferrol): “O baloncesto é tamén un sinal de identidade de Ferrol”
O alcalde de Ferrol, Ángel Mato, destacou “o apoio constante” que tanto a Deputación coma o Concello de Ferrol realizan “a un club senlleiro” que leva con orgullo o nome da cidade por toda España. “O baloncesto é tamén un sinal de identidade de Ferrol”, afimou Mato, que destacou a importancia de promover os valores do deporte, especialmente entre as novas xeracións.
O presidente do club universitario, Santiago Rey, agredeceu a visita do presidente e o alcalde e destacou a importancia dun club que conta con máis de douscentos rapaces e rapazas na súa canteira. “Para nós é moi importante o apoio das administracións”, afirmou Rey, que destacou que “queremos que cada vez máis xente se una a este proxecto”. “Estamos encantados de representar a Ferrol e á provincia da Coruña na máxima categoría do baloncesto feminino español”, afirmou o presidente.
Santiago Rey (presidente do BAXI Ferrol): “Estamos encantados de representar a Ferrol e á provincia da Coruña na máxima categoría do baloncesto feminino español
Este ano, o BAXI Ferrol recibirá unha axuda de 86.000 euros da Deputación para apoiar económicamente a súa partipación na Liga Endesa, o que converte á institución provincial no principal patrocinador do club.
O presidente da Deputación da Coruña, Valentín González Formaso, a deputada provincial de Deportes, Cristina Capelán, e o alcalde do Concello de Ferrol, Ángel Mato, mantiveron tamén unha reunión co presidente da entidade do Uni Ferrol, Santiago Rey, e a súa directiva para coñecer o seu proxecto deportivo de cara á vindeira tempada 2021-22 na que o conxunto ferrolá militará na máxima categoría do baloncesto feminino estatal.
