- A deputada de Deportes, Cristina Capelán, visitou o Club Halterofilia Coruña, que conta con seis persoas bolseiras da Deputación, entre elas Irene Blanco, campioa do mundo Sub-17.
- “Queremos colaborar coas nosas deportistas para que podan desenvolver todo o seu potencial, ter acceso á mellor preparación e competir ao máis alto nivel”, afirmaba a deputada provincial.
Deputación da Coruña, na súa labor de promoción, difusión e apoio ao deporte coruñés, convoca este ano 45 bolsas deportivas de 3.500 euros destinadas a deportistas da provincia que destaquen en competicións federadas a nivel rexional, nacional e internacional.
A deputada de Deportes, Cristina Capelán, anunciou a convocatoria das bolsas, que este ano contan cun orzamento total de 157.500 euros, nunha visita ao Club Halterofilia Coruña, con máis de 150 deportistas federados (90 delas mulleres), dos que seis contan cunha bolsa da deputación coruñesa.
Entre eles e elas destacan Irene Blanco, que se proclamou campiona do mundo no último evento da categoría Sub-17 celebrado en Las Vegas (EE.UU.) e Víctor Castro, que está preparándose para acudir ao Campionato de Europa asboluto en Moscú e na fase previa dos clasificatorios para os Xogos Olímpicos de Toquio.
“As bolsas para deportistas da Deputación da Coruña pretenden ser unha axuda para que mozos e mozas como estes sigan colleitando éxitos para o deporte coruñés en todas as disciplinas”, apuntou Cristina Capelán, que subliñou que “ademais de premiar o esforzo dos nosos deportistas, queremos colaborar con elas e eles para que podan desenvolver todo o seu potencial, ter acceso á mellor preparación e competir ao máis alto nivel”.
A deputada interesouse pola preparación dunha disciplina deportiva tan esixente e especialmente polos éxito que teñen os e as deportistas do club nas categoría base Sub-15 e Sub-17.
Máis becas e máis dotación económica, en total 157.500€
Capelán explicou que o Goberno provincial de Valentín González Formoso incrementou notablemente nos últimos anos o importe destinado a bolsas para deportistas, pasando de 30 bolsas de 2.500 euros a 45 bolsas de 3.500 euros. Ademais, ampliouse tamén o rango de idades, permitindo que os deportistas de entre 24 e 30 anos podan participar na convocatoria.
As persoas solicitantes destas bolsas da Deputación da Coruña deberán practicar un deporte que pertenza a unha das disciplinas incluidas no programa oficial dos próximos Xogos Olímpicos de Toquio. A lista de deportes pódese consultar aquí: Deportes olímpicos nos Xogos de Toquio 2020
Ademais, os/as candidatos/as terán que acreditar o seu historial deportivo durante o ano 2020, no que constarán as participacións e os resultados máis importantes obtidos en competicións autonómicas, nacionais e internacionais e o proxecto deportivo da tempada actual.
A tres categorías das bolsas da Deputación coruñesa
As bolsas divídense en tres categorías, en función da idade das persoas solicitantes:
- Grupo A: 15 bolsas para deportistas de 12 a 17 anos
- Grupo B: 15 bolsas para deportistas de 18 a 23 anos
- Grupo C: 15 bolsas para deportistas de 24 a 30 anos.
O BOP de hoxe luns publica as bases das bolsas de 2021. O prazo de presentación de solicitudes determinarase nos vindeiros días, tras a súa publicación na Base Nacional de Subvencións.
As solicitudes presentaranse de xeito telemático, a través da plataforma SUBTEL, na páxina web da Deputación da Coruña: www.dacoruna.gal.
O organismo provincial publicará na súa páxina web a resolución provisional de persoas admitidas e excluídas, xa que coa presentación da solicitude se autoriza para o tratamento necesario dos datos das persoas solicitantes e para a súa publicación na citada páxina web da Deputación da Coruña.
No prazo de 10 días hábiles, contados desde o día seguinte ao da data da publicación da resolución de persoas admitidas e excluídas, poderán as persoas interesadas formular as reclamacións para emendar erros polas causas de exclusión das solicitudes non admitidas.
Transcorrido este prazo sen que se emenden as causas de exclusión, considerarase que desiste da súa petición nos termos do artigo 68 da Lei 39/2015, do 1 de outubro, do procedemento administrativo común das administracións públicas. Tamén será causa de desistencia da solicitude, non axustarse aos termos da convocatoria, ou o incumprimento dos requisitos establecidos nela. No caso de non formular alegacións, a resolución provisional considerase definitiva.
A Deputación Provincial da Coruña publicará as bolsas concedidas na Base de Datos Nacional de Subvenciones.
