A relación entre o RC Deportivo e o Orzán SD avanza cun novo convenio de filialidade de cara á tempada 2020-2021. Segundo ven de informar o club branquiazul, este acordo é un “paso máis” na relación entre ambas entidades deportivas de cara ao “fomento do fútbol feminino e formativo”.
Ao equipo B do Dépor ABANCA súmanselle así dúas escuadras filiais máis que sumarán 20 xogadoras. Unha delas militará na Primeira Autonómica e outra na Segunda Autonómica. No primeiro dos casos a idea é que o plantel esté conformado, “por xogadoras maioritariamente xuvenís” e no segundo “fundamentamente será cadetes”. A cancha de adestramento será o Campo da Torre. As futbolistas destes equipos poderán dar o salto aos equipos do Dépor ABANCA cando sexa preciso.
O Dépor cumpre a normativa da RFEF sobre filiais
Na información na que se detalla este acordo, o Real Club Deportivo explica que deste xeito cúmprese “a disposición décimonovena (Fútbol Base) das Normas Reguladoras das Competicións de Fútbol Feminino Profesionalizado de Ámbito Estatal” que recolle a obligatoriedade para os equipos de Divisións RFEF de ter “tres equipos de fútbol base, dependente ou filial, independentemente da categoría na que eles militen. Os devanditos equipos poderán estar tamén en clubs da mesma comunidade autónoma cos que se teña establecido un acordo de colaboración”.
Pola súa banda, Orzán SD progresa, dando un salto cualitativo, na súa “firme aposta pola formación no fútbol feminino, neste caso no ámbito das xugadoras”, explica o RC Deportivo na súa web. O club aurinegro, baixo a coordinación de Fernando Taboada, “traballa ademais con adestradoras e árbitras para reforzar a base do fútbol feminino na cidade da Coruña”, destaca o Dépor.
