A camiseta do RC Deportivo ABANCA, o equipo feminino do Dépor, non está á venda nas canles oficiais que o club ten habilitadas a tal efecto. Ante esa carencia, o persoal da DeporTienda oferta a posibilidade de mercar a elástica do primeiro equipo masculino, pero pórlle nas costas o nome da xogadora do Dépor ABANCA que se desexe. Na tenda Macron da Coruña tamén confirman que esa camiseta non se comercializa. Se te estás a facer a pregunta de se na Liga Iberdrola é habitual, a resposta é moi galega: depende. Hai equipos que a venden e outros que non, contámoscho nesta outra información: Vende o fútbol feminino as súas camisetas?
A consulta de As Nosas, o club coruñés explica que esta circunstancia débese a unha cuestión de “respecto aos acordos comerciais” vixentes na actualidade. Eses contratos permitirían, unicamente, comercializar a camiseta que actualmente loce o primeiro equipo masculino.
A afección do equipo feminino do Dépor é cada vez máis numerosa. Abegondo é un fervedoiro cada xornada que as xogadoras da Liga Iberdrola que adestra Manu Sánchez xogan como locais. Entre as seareiras deportivistas as caras de Tere Abelleira, Peke, Miriam Ríos ou Athenea del Castillo, por poñer algúns exemplos, son recoñecidas pola rúa. Aínda non aos niveis en que o son Mollejo, Alex Bergantiños ou Sabín Merino, pero a bancada deportivista coñéceas e ségueas.
No partido de Copa da Raíña contra o Valencia demostrouse o tirón que, na parroquia branquiazul, teñen estas futbolistas que meteron no Estadio Municipal ABANCA Riazor a máis de 7.500 afeccionadas.
Pero todo ese interese da masa social deportivista non pode transformarse en algo que calquera club dos tempos actuais buscaría: a venda de camisetas. Esa opción non está incluída na proposta comercial da entidade coruñesa debido a acordos previos con patrocinadores.
Os cambios entre ambas as dúas elásticas, residen nos patrocinios que locen as camisetas duns e doutras. No caso dos homes figuran Estrella Galicia 0,0 e Luckia, mentres que nas mulleres está ABANCA tanto no peito como no lateral da manga. Na parte posterior, figura Cabreiroá na camiseta do feminino e ABANCA na do masculino.
Entre as camisetas que se pode adquirir nas canles oficiais tampouco están as elásticas doutros equipos do RC Deportivo. Por exemplo, ademais de non comercializarse as camisetas dos dous equipos femininos (A e B, patrocinados por ABANCA), non se venden as camisetas do filial (Fabril), dos equipos de base, da Liga Genuine (que loce o patrocinio de R) ou dos Veteranos. Para poder pór á venda algunha destas equipacións, o RC Deportivo tería que modificar os actuais acordos de comercialización das súas camisetas.
Unha aposta pola visibilización á que lle falta unha peza
Un dos xestos máis habituais dunha persoa que se converte en seareira dun club deportivo é mercar a súa camiseta. Iso, ou algún elemento de merchandising como unha bufanda. No Dépor ABANCA non é factible a primeira opción, a máis evidente. Pola contra, hai unas semanas, no partido de Copa contra o Valencia, regaláronse 5.000 bufandas co nome do equipo. Tampouco están á venda.
Desde que apostou por contar cun equipo feminino, o RC Deportivo amosou con xestos e feitos a integración das futbolistas do Dépor ABANCA en todas as acción promocionais do club. Sinaturas de autógrafos, visitas sociais, campañas publicitarias… O momento máis destacado foi se cadra elixir á capitá branquiazul Miriam Ríos para encarnar a María Pita e protagonizar a campaña de abonados da tempada 2019-2020 ao berro de: “Deportivistas, quen teña honra, que me siga”, ao máis puro estilo da heroína coruñesa.
Nos catálogos do club herculino, elas posan con equipacións branquiazuis para a súa promoción. Por exemplo, con suadoiros, polos de paseo, etc. Moitas delas son prendas recollidas na sección Dépor1920 da web de venda de material deportivo do RCD. Pero eses non son os polos de adestramento que as futbolistas usan no seu día a día. O deseño que elas locen, é o deles. Non queda outra mentres mercar a camiseta do equipo feminino non sexa posible.
A camiseta ‘Un único latido’, si está á venda
Os únicos elementos de merchandising vencellados directamente ao equipo feminino que se atopan na web que comercializa as prendas do club www.deportienda.es é a camiseta coa frase: “Un único latido”. Trátase dun lema inspiracional que algunhas das futbolistas branquiazuis levan incluso tatuado no seu corpo logo do ascenso acadado na tempada pasada en Canarias. Da súa orixe falamos en As Nosas na reportaxe sobre os cancelos máis empregados polos clubs galegos. #UnÚnicoLatido era un deles.
Existen dous modelos:
Tamén figura unha camiseta de algodón coa frase: “Luchando por un mismo sueño”.
Véndense camisetas do Fabril, conmemorativas, e a de raias verticais desta campaña
Facendo un repaso pola tenda online do RCD pódese ver que as seareiras branquiazuis poden mercar diferentes modelos de camisetas máis aló dos oficiais deste curso 2019-2020. Por exemplo, pódese adquirir un polo histórico do Fabril (filial deportivista) que ten aires retro
Tamén hai outro a xeito de réplica da camiseta coa que o Dépor debutou en Primeira no ano 1941.
Entre as camisetas doutras tempadas, está á venda a conmemorativa do ascenso do 1991 que incorpora o nome do patrocinador daquel ano, Leyma, e tamén a da Copa do Rei do 1995 con Feiraco .
O listado de posibles vestimentas inclúe ata a elástica que o equipo masculino empregou dous partidos esta tempada con raias verticais.
Foi unha excepción que se lle permitiu ao RC Deportivo por dúas xornadas dado que a competición non permite mudar equipacións a metade de tempada. Unha parte da afección branquiazul, botando man da superstición, ‘culpaba’ dos resultados do equipo a que se elixira un deseño con raias horizontais, deixando de lado a tradición deportivista de vestir con elásticas de raias verticais brancas e azuis.
Outro dos artigos que se poden adquirir na DeporTienda son a primeira e segunda equipación do HC Deportivo Liceo, conxunto de hoquei a patíns coruñés do que é patrocinador o RC Deportivo.
Como se pode observar, toda unha colección de propostas en branco e azul para que a afección deportivista poida presumir de cores. Como dicimos, incluso as futbolistas do Dépor ABANCA saen nas fotos promocionais. Pero resulta que as xogadoras do equipo feminino aparecen como imaxe de camisetas que non locen, mentres as súas, na actualidade, non se poden comprar.
Vende o fútbol feminino as súas camisetas?
En As Nosas preguntámonos se se poden mercar as elásticas dos equipos da Liga Iberdrola nas tendas ‘online’ dos diferentes clubs. Por certo, mercarías a da túa futbolista favorita?
