O Dépor recibe ao Betis en Abegondo ás 18:30 horas na correspondente 17ª xornada da Liga Iberdrola. O conxunto bético, que levaba desde o 29 de setembro sen gañar, conseguíu vencer ao Madrid CFF o finde pasado, no segundo partido de Pier Cherubino ao fronte do banco das verdibrancas.
As herculinas, pola contra, acumulan tres partidos sen coñecer a derrota e queren reecontrarse coa súa afección casi dous meses despois de que as deportivistas xogaran en Abegondo. As de Manu Sánchez chegan coa moral polas nubes tras golear ao Espanyol na última xornada na Cidade Deportiva Dani Jarque e tentarán deixar os tres puntos na casa. As galegas buscarán gañar para seguir no alto da táboa e frear o efecto Pier.
Poderían debutar as novas incorporacións
As internacionais colombianas Carolina Arbeláez e Lorena Bedoya son as novidades na lista de 18 convocadas do Deportivo ABANCA para o encontro do domingo.
Ambas as futbolistas chegaron á Coruña a principios de semana e, tras pasar recoñecemento médico o pasado mércores no Hospital HM Modelo, xa se adestraron con normalidade estes últimos días na Cidade Deportiva.
A canteirá Carlota é a outra novidade na citación de Manu Sánchez, que non tiña baixas obrigadas por lesión ou sanción e, por conseguinte, tiña a todo o seu persoal á súa disposición.
O Dépor quere encher Abegondo
O Dépor quere xerar sinerxias entre os seus diferentes equipos. Así, os afeccionados que posúan unha entrada do partido entre o Deportivo e o Cádiz CF (correspondente á 24ª xornada de LaLiga SmartBank que se disputará este domingo 19 de xaneiro ás 16:00 horas no Estadio ABANCA-RIAZOR), terán acceso gratuíto ao encontro da 17ª xornada da Primeira Iberdrola. É dicir, poderán ir ver de balde o partido entre o Deportivo ABANCA e o Real Betis, que comezará ás 18:30 horas dese mesmo día na Cidade Deportiva de Abegondo.
Por outra banda, como en todos os partidos do Deportivo ABANCA, os socios teñen acceso gratuíto ao recinto presentando o seu carné. Así mesmo, poñeranse á venda entradas de público por 5 euros, soamente na porta de acceso á Cidade Deportiva. O acceso permitirase por calquera destas tres vías ata completar o aforo máximo do campo principal.
Rolda de prensa de Manu Sánchez
Manu Sánchez, técnico do Deportivo ABANCA, falou en rolda de prensa durante a previa do encontro dede domingo ante o Betis. O técnico galego explicou que o Consello de Administración, na súa visita ao equipo desta semana, “transmitiunos vibracións positivas e sobre todo tranquilidade, que as xogadoras estean pendentes do campo, que estean tranquilas. Fernando (Vidal) e o seu Consello van darlle continuidade a este proxecto de fútbol feminino do Club e mesmo o van a potenciar. Todos moi contentos”.
O técnico deportivista insiste en que “estamos a gozar moitísimo do que estamos a facer. Hai que seguir nesta liña. Estamos moi preto do obxectivo e despois a soñar. Temos toda a segunda volta por diante, a Copa. Nese orzamento de ilusión que tiñamos e do que falabamos a principios de tempada, aínda non o esgotamos e imos tentar prolongalo”.
Manu Sánchez, adestrador do Deportivo ABANCA: “Temos toda a segunda volta por diante, a Copa. Nese orzamento de ilusión que tiñamos e do que falabamos a principios de tempada, aínda non o esgotamos e imos tentar prolongalo”.
O galego espera que ante o Real Betis “un partido totalmente diferente” ao 3-4 co que as branquiazuis se impuxeron en Sevilla ás verdibrancas: “Abegondo é totalmente diferente ao seu campo, de herba sintética e de dimensións reducidas. Acaban de cambiar o adestrador e están a cambiar o modelo de xogo. O partido debería ser diferente”.
Asegura ademais que Carolina Arbeláez e Lorena Bedoya “chegaron en moi boa condición física. Enviámoslles un traballo que tiñan que facer antes de chegar aquí a España para que chegasen nunha forma similar á que traballamos aquí. Tanto os médicos como o resto de compañeiros de readaptación e do Departamento de Forza din que a súa condición é boa. No campo están a responder ben”.
Manu Sánchez, adestrador do Deportivo ABANCA: “Carolina e Lorena chegaron en moi boa condición física. Enviámoslles un traballo que tiñan que facer antes de chegar aquí a España para que chegasen nunha forma similar á que traballamos aquí”.
A súa chegada ademais, segundo Manu Sánchez, axitou o vestiario deportivista: “É como botar unha pastilla efervescente dentro dun vaso de auga. O vaso está tranquilo e a pastilla xera burbullas. Aquí as burbullas son positivas. Temos un vestiario moi competitivo e entenden que a competitividade e as opcións de xogar, de entrar na lista, apértanse máis. Aquí ademais de boas futbolistas temos moi boas persoas. A aceptación que lle deron ás dúas compañeiras novas, como foi sempre, moi boa. Elas están moi a gusto. Facíanos un pouquiño de falta porque tiñamos un plantel un pouco curto”.
Manu Sánchez, adestrador do Deportivo ABANCA: “A aceptación que lle deron ás dúas compañeiras novas, como foi sempre, moi boa. Elas están moi a gusto. Facíanos un pouquiño de falta porque tiñamos un plantel un pouco curto”.
Ve a Lorena Bedoya como “unha futbolista que pode actuar tanto de central como de mediocentro defensivo. Estamos a vela máis como central. Dános unha boa saída de balón, ten un desprazamento espectacular. Está a coller moi rápido todas as nosas ideas”.
Pola súa banda, subliña que Carolina “dános moita máis versatilidade. É unha xogadora que pode ser mediocentro, interior, unha ‘ box to box’, que pode actuar de lateral, que xa o fixo nos seus equipos anteriores. Ábrenos un abanico de maiores posibilidades, unha xogadora máis combativa, moi intensa nos adestramentos. Adáptase ao que nós facemos aquí”.
