Hoxe é o Día Internacional do Deporte. E logo! Que pensabades! Hai días internacionais para todo e non había de haber para unha actividade que case todas as persoas do mundo fan nalgún momento da súa vida? Pois si. Hai tal.
O deporte apórtanos cousas obvias, como os beneficios para a saúde que ten unha actividade física regular e controlada. Ir á médica e que che diga que hai que acabar co sedentarismo, que hai que moverse, é todo un (dígovolo eu). En xeral, e con pautas que nos indiquen profesionais na materia, a práctica deportiva axuda a que estemos mellor física e mentalmente.
O deporte como competición, ben entendida, con xogo limpo, e búsqueda de superación individual e colectiva, plantéxanos retos, metas, e invítanos a aprender cousas novas e a mellorar.
O deporte educa para a vida. Caerse e erguerse. Equivocarse e aprender dos erros para volvelo tentar a seguinte vez mellor. No deporte e na vida, case todo consiste en errar, volvelo tentar, e repetir ata conseguir facelo mellor. Iso ven sendo que cando non es capaz de facer algo coma unha pirueta, un pinchacarneiro, meter unha canastra, saltar á corda, patinar, canear a un rival, o intentas e o intentas até que finalmente, a cousa vai mellorando. Un perde, pero aprende a perder, igual que aprende a gañar. No deporte prima a perseverancia, a cultura do esforzo, e o traballo en equipo (incluso en disciplinas individuais).
O deporte socializa. Desde cativas xogamos con outras persoas. En si mesmo, é un xogo. Pilla, pilla, brilé, ti a levas… Apúntaste a unha actividade deportiva e coñeces xente con inquietudes similares ás túas, que tira por ti cando non tes tantas ganas de ir adestrar, e que te anima a perfeccionar a túa técnica, pero, sobre todo, xente coa que compartes tempo, esforzos comúns, metas, retos, derrotas, choros, decepcións e sorrisos. É unha experiencia vital en sociedade.
A gran festa deportiva, os Xogos Olímpicos, son en si mesmos unha festa da humanidade, da concordia, da convivencia entre países, razas, credos. Os XX.OO. teñen parado até guerras, a chamada tregua olímpica.
Ben entendido, o deporte fai do mundo un lugar con mellores persoas
Teño par a min que a práctica deportiva, ben ententida, ben guiada, fai do mundo un lugar con mellores persoas. Xente que busca superarse, mellorar, axudar ás compañeiras a que tamén poidan facelo mellor, e aprender a traballar en equipo até cando leva a cabo unha disciplina individual.
En As Nosas, cremos nel como unha ferramenta para empoderar ás persoas que o practican (fainos sentir capaces), para traballar aprol da igualdade, que propicia a sororidade, o respecto, a ansia de superación… Consideramos que unha competitividade sá que nos axuda a superármonos, a teimar á procura de metas. Para nós, a práctica deportiva dentro duns hábitos de vida saudables é un ingrediente necesario nas nosas vidas.
A ONU danos a razón. Neste Día Internacional do Deporte, explican que “é un dereito fundamental e unha ferramenta poderosa para fornecer os lazos sociais e promover o desenvolvemento sostible, a paz, o benestar, a solidariedade e o respecto”. Como vedes, valores que, desde este humilde medio galego, hai tempo que defendemos que aporta o deporte.
A Organización das Nacións Unidas (ONU) sostén que “o deporte axuda a promover la xusticia, o traballo en equipo, a igualdade, a inclusión e a perseverancia. Tamén puede axudarnos a superar tempos de crise, como a COVID-19, reducindo a ansiedad e mellorando a nosa saúde física e mental”.
“En tempos de distanciamento físico, o deporte mantennos física e socialmente activos, incluso desde o confinamento dos nosos fogares”, asegura a ONU neste día no que nos propón o empregar o “Deporte e a actividade física para reconstruír un mundo mellor”
