A segunda parada do ciclo de debates baixo o título ‘Deporte para a igualdade‘ que está a levar a cabo o Concello da Coruña, a través da Concellaría de Deportes, centrou a atención nas e nos deportistas de elite que coincidiron en apuntar que o camiño á igualdade no deporte vai ir parello a igualdade no resto da sociedade, xa que é un problema social e educacional. A importancia da visibilidade do deporte feminino volveu ser un dos puntos en común no debate.
No Fórum Metropolitano déronse cita a campioa olímpica e xerente Clúster Galego do Deporte, Sofía Toro, a lanzadora de xavelina Carmen Sánchez (que este ano chegou a colocarse segunda no ránking estatal absoluto cun lanzamento de 52,71 mts en Andújar), os futbolistas do RC Deportivo Cristina Martínez e Diego Villares, o campión do mundo de pesca a mosca David Arcay, e Pedro Muñoz Fole, campión do mundo de Kempo e preparador físico no Básquet Coruña. A conversa estivo moderada pola psicóloga deportiva e atleta no club La Mochila del Deporte, Madó González.
No debate, que colleu a sala Marilyn Monroe do Fórum Metropolitano, tocáronse diferentes aspectos relativos á igualdade no deporte. Falouse de camiños andados, como o feito de que xa non se ve con rexeitamento unha muller cun corpo musculado, tal e como apuntaba a lanzadora Carmen Sánchez.
A escasa presenza de adestradoras
Admitindo que se teñen dado pasos, pero “aínda hai moito que mudar”, Pedro Muñoz Fole poñía a atención la “falta de adestradoras”, e no feito de que cando adestran “non adoitan adestrar a equipos masculinos”. Tamén ao respecto da porcentaxe de adestradoras con respecto ao de adestradores, Sofía Toro explicaba que “cada vez hai máis adestradoras, se cadra algún día vemos ao Real Madrid de fútbol adestrado por unha muller”. E Carmen Sánchez destacaba que é precisamente unha adestradora a que prepara a varios destacados atletas españoles neste momento con bos resultados para os deportistas que prepara.
David Arcay convidaba a “empezar a educar pola base” e a trasladar o gusto polo deporte dunhas xeracións a outras de nais/pais a fillas/fillos “sen facer distincións ente nenos e nenas”. Neste sentido a futbolista Cristina Martínez resaltaba que é “importante que, desde nena, poidas practicar o deporte que che guste”.
A importancia da visibilización do deporte feminino foi outro dos aspectos que volveu aparecer no debate, como xa ocorrera na primeira xornada coas pioneiras como protagonistas. O deportivista Diego Villares resaltaba na conversa como un feito positivo na visibilización que o fútbol feminino está a encher espazos deportivos de grande capacidade.
A igualdade vista dun xeito transversal na sociedade
Pero no que parecían coincidir todos os participantes é na importancia da educación e de que a igualdade no deporte vai parella á igualdade noutros ámbitos da nosa sociedade. Non é un espazo estanco. Camiña da man doutros aspectos das nosas vidas.
En concreto, a campioa olímpica de vela, Sofía Toro, explicaba que estamos ante “un problema social que abarca máis ámbitos da nosa sociedade. Non hai tanto que estabamos vivindo nunha dictadura e so por iso xa imos por detrás de Europa no camiño á igualdade”.
Na mesma liña se manifestaba o deportista Pedro Muñoz Fole quen aseguraba que é “unha cuestión de educación. Estamos ante un problema social que está en todos os ámbitos da vida dunha muller”.
A lanzadora de xavelina Carmen Sánchez, coincidía en que “é un tema social. Non haberá igualdade no deporte ata que non exista na sociedade”, aseguraba na conversa.
💜 Xa estamos no Fórum Metropolitano co ciclo de debates #DeporteParaAIgualdade.
Na imaxe os e as 💬 participantes na charla de hoxe, con deportistas de elite:
▪ @diegovillares8
▪ @CristinaMtnezG
▪ @David_Arcay
▪ Carmen Sánchez
▪ @sofiatoropp
▪ @pedromufo🗣️ @madoglez pic.twitter.com/bb3lX2OZRO
— A Coruña Deportes (@coruna_deportes) November 28, 2022
“A maternidade non pode ser un problema na carreira dunha deportista”
A regatista galega e actualmente xerente do Clúster Galego do Deporte, Sofía Toro, reflexionaba ao respecto da maternidade e de como pode afectar á carreira dunha deportista de elite. “Cando chega o momento de ser nais, as mulleres paramos a nosa vida profesional en xeral, pero no deporte, máis”. Na opinión da campioa olímpica: “Ser nai non pode ser un problema na carreira profesional dunha deportista”, e apelou a necesidade de contar con axudas en materia de igualdade.
Outra cuestión que se abordou na conversa é a alta taxa de abandono da práctica deportiva das mulleres na adolescencia. Na opinión de Sofía Toro todo o sistema está pensado para homes e por homes. A deportista propoñía “adaptar a oferta para evitar o abandono a determinadas idades. Sobre todo pensando en manter hábitos de vida saudables. Iso vai garanter, en boa medida, adultos máis sáns”.
Cris Martínez: “Estou a favor das 15 futbolistas”
A polémica rodea á Selección Española feminina de fútbol que adesra Jorge Vilda desde que quince xogadoras solicitaron non ir convocadas ata que se levasen a cabo cambios no sistema de traballo do combinado estatal. E dicir, esas quince deportistas prantáronse.
A situación xerou división. Hai quen está a favor da postura das futbolistas e hai quen non. E hai tamén quen considera que esta discrepancia que ten derivado en liorta podería estar facendo dano á imaxe do fútbol femenino español.
Xustamente nesa última liña, no posible dano á imaxe do futfem, apuntaba a pregunta que lle facía desde o público Mar Barcón, a futbolista do Dépor ABANCA Cristina Martínez. A deportista non se escondeu.
Cristina Martínez, futbolista: “Se 15 xogadores da Selección Española masculina dixeran o que elas dixeron, pregúntome se Luis Enrique seguiría no seu posto”
Admitía Cristina Martínez que a situación “é complicada”, pero deixaba clara a súa postura sen deixar lugar á dúbida: “Eu estou a favor das 15”.
A deportista leonesa que actualmente milita no Dépor ABANCA lanzaba unha pregunta como reflexión que dera resposta á situación xerada, unha pregunta para que cada quen lle dea resposta e pense en consecuencia: “Se 15 xogadores da Selección Española masculina dixeran o que elas dixeron, pregúntome se Luis Enrique seguiría no seu posto? Elas pediron algo que se teñen gañado. Estamos diante dunha decisión que vai máis aló do futbolístico”, aseguraba Cris Martínez.
A seguinte parada deste ciclo de debates co título ‘Deporte para a igualdade‘ que organiza o Concello da Coruña, a través da Concellaría de Deportes, nas súas actividades ligadas o #25N, reunirá mañá, martes 29 de novembro no Pazo dos Deportes de Riazor a diferentes adestradores como José Carlos Tuñas (atletismo), Rosa García (patinaxe artística), Stanis García (hoquei a patíns), Raúl Solleiro (natación) e María Castiñeira (montañismo). A cita, que moderará Ana Yaquimenko, do Ximnasia Coruña, ten previsto comezar contra das 17:15 horas con acceso libre ata encher o recinto habilitado para este debate.
🟣 O 29 de novembro, ás 17.15 h, estaremos no Palacio dos Deportes con:
▪ @josecarlostunas (@CorunaComarca)
▪ Rosa García (@cpa_maxia)
▪ @Stanis06 (@HockeyClubLiceo)
▪ Raúl Solleiro (@CNCORUNA1)
▪ María A. Castiñeira (@amimontanismo)🗣️ @AnaYaquimenko (@ximnasiacoruna) pic.twitter.com/iVXgwMq77q
— A Coruña Deportes (@coruna_deportes) November 28, 2022
O ciclo ‘Deporte para a igualdade’ empezou polo principio, polas pioneiras
