Media ducia de clubs da cidade herculina estiveron representados na cuarta conversa do ciclo ‘Deporte para a igualdade‘ que organiza o Concello da Coruña, por medio da Concellaría de Deportes.
A conversa foi moderada por Miguel Ángel González, do Club Hércules Termaria, e na cita estiveron Paula Otero, presidenta do club Fillas de Breogán de fútbol gaélico, Humberto Ramírez, director deportivo do CRAT Coruña de rugby, Bernardo Romay, presidente do Judo Club Coruña, Rosa Rilo unha das xogadoras do equipo fundacional das Brigantias de Roller Derby, Esther Garea do Club Halterofilia Coruña e Leonardo Lorenzo, directivo da AFAC (Asociación de Fútbol Aficionado da Coruña).
Consultados sobre a evolución do deporte feminino nas súas entidades ata a situación actual, as experiencias foron diversas, como tamén o son as disciplinas que se practican nos diferentes clubs que nesta xornada se reuniron no ciclo ‘Deporte para a igualdade‘.
Bernardo Romay, fundador e presidente do Judo Club Coruña, explicaba que as primeiras mulleres que acudiron, hai anos, á entidade que representa, fixérano para “aprender defensa persoal. Non facían competición, so exhibicións”. Explicaba Bernardo Romay que ao tratarse “dun deporte de contacto, o arranque foi complicado pero as mulleres foron entrando”.
Lembrou Romay nesta conversa do ciclo ‘Deporte para a igualdade‘ como a chegada de referentes foi un punto de inflexión. Neste sentido, como alguén que o viviu en primeira persoa, xa que formaba parte do equipo da federación naquel momento, Bernardo Romay puxo en valor o ouro de Miriam Blasco nos Xogos Olímpicos de Barcelona 1992. A partir do empuxe que supuxo contar cunha campioa olímpica española, o judo feminino foi progresando no ámbito estatal, no autonómico e no local. “Continuouse traballando nos clubs, aplicando as mesmas técnicas e disciplina que facíamos cos rapaces”, relatou o presidente do Judo Club Coruña.
No caso do fútbol gaélico “partimos da desvantaxe de que a xente non sabe de que vai este deporte”, explicaba Paula López, representante das Fillas de Breogán. Por iso, dar a coñecer a disciplina é o primeiro paso. Segundo relatou Paula López Fillos de Breogán foi o primeiro club de Galicia en practicar o fútbol gaélico, neste caso en categoría masculina e hai 12 anos. Cando se formou o primeiro equipo feminino na Coruña, o Fillas de Breogán “foi un grupo espectacular”, que conqueriu unha chea de títulos.
Contou Paula López, que un feito diferencial do fútbol gaélico “é que se divide por rexións. Non hai Selección Española. Hai Selección Galega e Selección Ibérica”. Tal e como narrou a deportista no fútbol gaélico “tivemos un momento de moda e logo chegou unha etapa de baixón. Éxiste un reto actual que é que o noso deporte medre. Estamos nunha etapa de captación de máis xogadoras”.
“O equipo feminino é o buque insignia do CRAT”, explicaba Ramírez
Humberto Ramírez confesaba neste debate do ciclo ‘Deporte para a igualdade‘ ter “a sorte a e honra de ser un dos primeiros adestradores que tivo o CRAT feminino. Ao principio era un deporte máis social, pero a evolución foi espectacular. Agora téñense presentes no equipo cuestións a todos os niveis deportivos, por exemplo, a nutrición”.
Segundo explicaba o director deportivo do CRAT Coruña, o “rugby feminino ten medrado en toda España. Contamos con dúas categorías estatais. A principal está patrocinada por Iberdrola e transmítense todos os partidos”. Tal e como contaba Humberto Ramírez, agora mesmo no CRAT Coruña “o noso buque insignia do club é o equipo feminino”.
Rosa Rilo é unha das fundadoras do equipo As Brigantias que practica o Roller Derby na Coruña. Para contextualizar e dar a coñecer unha disciplina se cadra menos coñecida para o gran público, Rosa Rilo explicou as orixes deste deporte. “Esta modalidade deportiva nace en Estados Unidos contra os anos 30 coma unha disciplina mixta e interracial”, algo que ía contracorrente nesa etapa histórica en USA. Logo, contaba Rosa Rilo, “o Derby moderno parte dos anos 90 cando se propuxo un deporte por e para as patinadoras no que se traballa de xeito transversal a través de comités. O 90% dos equipos son femininos”.
Tal e como explicaba a representante das Brigantias Roller Derby, este é un deporte que ten como elementos fundamentais “o feminismo e a autoxestión”. Aínda que apuntaba Rilo que se están a dar pasos para abrirse máis aló do binarismo.
Neste momento As Brigantias Roller Derby compite no ámbito internacional ao integrarse na WFTDA (The Women ‘s Flat Track Derby Association).
Dende a AFAC (Asociación de Fútbol Aficionado da Coruña), Leonardo Lorenzo Solá salientaba a “evolución da muller no fútbol” explicando que a consideraba “moi positiva”. Lorenzo Solá relatou que na Coruña hai neste momento 25 equipos integramente femininos (non se contarían os mixtos) e 215 masculinos. Considera que é “un salto moi grande cando se pensa que se partía de nada hai uns anos”. Na opinión de Leonardo Lorenzo “en poucos anos vaise equiparar o fútbol masculino co feminino”.
O Club Halterofilia Coruña estivo representado no ciclo ‘Deporte para a igualdade‘ por Esther Garea. Trátase dunha modalidade deportiva tradicionalmente masculina que na Coruña conseguiu unha enorme evolución entre as féminas. Esther Garea explicaba que desde o ano 2.000 estamos nos Xogos Olímpicos”. Puxo Garea en valor tamén a importancia de contar con referentes ao lembrar que poucas persoas coñecen o nome dos mellores halteras masculinos españois pero moita xente sabe hoxe en día quen é Lidia Valentín.
Esther Garea defendeu que “a halterofilia é un deporte moi completo que precisa de moitos máis factores, non so da forza”. Explicou que nun primeiro momento no Club Halterofilia Coruña se incidiu na procura de halteras femininas na captación de talentos e búsqueda de novas deportistas, pero que agora mesmo no club hai incluso máis mulleres que homes. Nesta entidade militan destacadas deportistas femininas no ámbito internacional como é o caso das halteras Irene Martínez ou Irene Blanco, dúas das chamadas a postularse nese relevo xeracional que algún día precisará a figura de Lidia Valentín.
📺 Xa podes ver na nosa canle de YouTube a charla de clubs do ciclo #DeporteParaAIgualdade ▶ https://t.co/c2NPkL2lxD
Participaron:
▪ Esther Garea
▪ Bernardo Romay Pérez
▪ Humberto Ramirez Fouz
▪ Rosa Rilo
▪ Paula López
▪ Leonardo Lorenzo Solá
🗣️ Miguel Ángel González pic.twitter.com/uzIl6089iq— A Coruña Deportes (@coruna_deportes) November 30, 2022
Quenda para o xornalismo no ciclo Deporte para a Igualdade
A vindeira cita do ciclo ‘Deporte para a igualdade‘ do Concello da Coruña, celebrarase esta tarde de xoves 1 de decembro no Pazo dos Deportes de Riazor a partir das 17:00 horas. Nesta ocasión o protagonismo será para as e os xornalistas. Moderará o debate o director do xornal DxT Campeón, Alberto Torres, e participarán na conversa Pepe Torrente, de COPE Coruña, a fotoxornalista Vanessa Casteleiro, a xornalista radiofónica Sara Gallego de Radio InterCoruña, e os xornalistas da TVG Xosé Antón Fraga, e de La Opinión de A Coruña, María Varela.
Máis ‘Deporte para a igualdade’ 💜
🗓 1 de decembro, 17.00 h, no Palacio dos Deportes.
🔹 Xornalistas
▪ @pepe_torrente (@copecoruna)
▪ @v_casteleiro
▪ @SaraGallego11 (@Intercoruna)
▪ @MeriVarela (@laopinioncoruna)
▪ @xebelo (@TVGalicia)🗣️ @AlbertoTorresTw (@dxtcampeon) pic.twitter.com/ZaGYNhsjyp
— A Coruña Deportes (@coruna_deportes) November 30, 2022
O ciclo ‘Deporte para a igualdade’ reúne a seis deportistas de élite afincados na Coruña
O ciclo ‘Deporte para a igualdade’ empezou polo principio, polas pioneiras
