O deporte escolar contará con reforzo da man da Xunta de Galicia. O organismo autonómico comprometeuse esta semana a artellar un programa de apoio á disciplina, integrándoa en todos os niveis educativos. A proposta nace baixo o protocolo asinado polo conselleiro de Cultura Román Rodríguez e o secretario xeral para o Deporte, José Ramón Lete Lasa. Ambos departamentos colaborarán nun grupo de traballo integrado por profesionais da educación e da actividade física para impulsar esta última entre o alumnado.
Os expertos analizarán a situación actual do deporte nas escolas e deseñarán accións para fomentalo, especialmente no horario lectivo. Estudarase a implantación de novas prácticas físico-deportivas, como as disciplinas urbanas.
Tamén se porá o foco en estimular o interese no estudantado que non o presenta e tratarase de implantar hábitos saudables nas súas vidas. Para iso, o programa creará e difundirá diverso material didáctico nos centros educativos e retomarase o proxecto Xogade.
O deporte escolar, chave no desenvolvemento do alumnado
Tal e como explicou o conselleiro de Cultura, Román Rodríguez “este protocolo é tan só un paso máis na busca conxunta de sinerxías positivas que dean resposta ás necesidades e demandas do alumnado galego”. Con el o goberno autonómico busca favorecer a implementación de proxectos de vida activa nos centros educativos mediante a colaboración interinstitucional.
Román Rodríguez, conselleiro de Cultura: “O deporte escolar é un factor de desenvolvemento persoal e social do alumnado”.
Neste sentido, o conxelleiro Román Rodríguez afirmou que o fomento da práctica deportiva integrada dentro do horario lectivo fai posible que o 100% da poboación escolar a desenvolva, garantindo que todos teñan acceso a estas prácticas físico – deportivas.
O responsable de Cultura da Xunta de Galicia, salientou o papel do deporte escolar como “un factor de desenvolvemento persoal e social do alumnado”. Entre os seus beneficios, a Xunta enumera a mellora da saúde e da calidade de vida dos máis novos e o reforzo que supón para o seu rendemento académico.
Pola súa parte, o secretario xeral para o Deporte, José Ramón Lete Lasa, amosou do mesmo xeito o seu respaldo á actividade física nas aulas. Para o responsable da área de deporte na administración autonómica galega: “Son unha presenza insubstituíble para o desenvolvemento persoal e social”. Así o indicou José Ramón Lete Lasa.
Aposta pola implantación temperá para crear “hábitos”
A través desta e doutras iniciativas, a Xunta de Galicia pretende que buscar como meta cos escolares adquiran o hábito desde “as idades máis novas”. A experiencia di que xerar hábitos de vida saudable é moi positivo. O grupo de educadores traballará para que aprendan de xeito continuo “condutas e valores” vencellados á actividade física, así como ás “contornas naturais de colexios, familias e por suposto entidades” dedicadas a estas prácticas.
O secretario xeral para o Deporte quixo destacar a importancia de formar aos alumnos e alumnas nestes principios desde os anos máis temperás, cando é máis sinxelo crear “hábitos que os van acompañar toda a vida”. Neste sentido puxo en valor a importancia dos docentes e das agrupacións dedicadas ao deporte escolar, que cualificou como chaves para a integración dunha práctica deportiva “cada vez mais estendida, e sempre libre, democrática e igualitaria”.
Volve o programa Xogade e o deporte escolar “inclusivo e mixto”
A colaboración institucional inclúe a posta en valor do labor desenvolvido desde hai anos entre a poboación educativa polo programa Xogade. “É pioneiro e único en España por contemplar a actividade federada entre os 6 e os 16 anos”, indicou Lete Lasa na sinatura do convenio.
A Xunta de Galicia ampara directamente a iniciativa a través do seu seguro deportivo. A meta de Xogade é, segundo indica o goberno galego, dar pe a un “modelo “inclusivo e mixto” que estea ademais libre de prexuízos.
José Ramón Lete Lasa, secretario xeral para ao Deporte da Xunta de Galicia: “O programa Xogade é pioneiro e único en España por contemplar a actividade federada entre os 6 e os 16 anos. Ademais é un modelo inclusivo e mixto”
Xunto ao regreso deste programa, terá lugar a volta de arredor de 130.000 nenos e nenas ao deporte escolar. A institución autonómica asegura que este regreso será seguro, e estará axustado ao protocolo FISICOVID-DXTGALEGO. Ademais, cada entidade participante deberá contar cun responsable COVID que xestionará a notificación de posibles incidencias.
Un complemento para o Plan Recupera
O grupo de educadores que traballará para integrar o deporte escolar nas aulas non o fará en solitario. A iniciativa desenvolverase ao abeiro do Plan Recupera, que pretende reforzar as aprendizaxes que o alumnado non puido consolidar por mor do coronavirus.
O novo documento asinado entre os departamentos autonómicos galegos de cultura e eeporte complementará esta iniciativa. A actividade física axudará, neste sentido, a “reforzar as competencias non adquiridas polos escolares” así como a “manter os estándares de calidade do sistema educativo galego”.
O goberno autonómico alude a informes como o PISA e ás cifras sobre a redución do abandono temperá para dar conta da súa xestión no eido educativo. Hoxe o obxectivo é, segundo indican desde a administración autonómica, “é apoiar ao alumnado que máis o precise e que ninguén quede atrás desde o punto de vista académico”.
Para iso contémplanse diversas medidas, que teñen a intención de manter e mellorar os resultados malia o contexto do virus. En concreto, a Xunta de Galicia integrou no Plan Recupera unha serie de estratexias educativas de recuperación das competencias. Están orientadas a identificar os puntos febles na formación do alumnado para compensar os posibles efectos xerados pola excepcionalidade do curso 2020-2021, “o máis esixente en moito tempo”, segundo apunta o goberno galego.
Dentro destas medidas, a Xunta vén de constituír un grupo de traballo específico no seo do Comité Educativo formado por un equipo multidisciplinar e técnicos da Consellería de Cultura, Educación e Universidade. Os expertos definirán as accións e planificarán as estratexias deste plan. Entre outros, abordaranse expresamente os novos desafíos no ámbito do deporte como un elemento transversal, incidindo no papel que xoga a actividade física para a formación integral do alumnado.
