O Concello da Coruña, a través da Concellería de Deportes, convoca á todas aquelas persoas representantes do deporte coruñés a participaren o mércores, 25 de novembro, nunha campaña con motivo da celebración do Día Internacional da Eliminación da Violencia contra a Muller, baixo o lema “O deporte di NON á violencia”.
A alcaldesa da cidade, Inés Rey, así como o alumnado das Escolas Deportivas Municipais, tamén participarán nesta iniciativa. Rey destaca o papel das e dos deportistas da cidade que “amosan unha vez máis o seu compromiso coa defensa da igualdade en todos os ámbitos”.
A concelleira de Deportes, Mónica Martínez, e a edil de Benestar Social e Igualdade, Yoya Neira, tamén participarán nesta iniciativa. Martínez acompañará durante a xornada a todas e todos os deportistas participantes.
En negro contra as violencias
As persoas participantes na campaña faranse unha fotografía no Pazo dos Deportes de Riazor. A bandeira “En negro contra as violencias” tamén ondeará para estas instantáneas, que suporán un símbolo máis na loita para a eliminación da violencia contra a muller. As imaxes publicaranse nas canles sociais da Concellería de Deportes e nas do Concello da Coruña.
Ademais, ás 12:00 e ás 17.:00 horas, os participantes nas Escolas Deportivas Municipais realizarán un acto na explanada do Pazo dos Deportes de Riazor. Este alumnado levará camisetas da Carreira da Muller 2020, co lema “Querémonos vivas”, que non se puido realizar o pasado mes de marzo por mor da pandemia.
