O Dépor recibe ao Athletic Club en Abegondo o vindeiro domingo ás 12:00. As pupilas de Manu Sánchez chegan ao partido con ganas de recuperar sensación diante do seu público despois da derrota por 5-3 da semana pasada contra o UDG Tenerife Granadilla.
As branquiazuis comezaron a preparación do partido, correspondente á 19ª xornada na Primeira Iberdrola, o pasado mércores. O adestrador galego, disporá de catro sesións de adestramento na Cidade Deportiva de Abegondo antes de recibir as leoas.
As galegas reciben as vascas, que ocupan a sétima posición da táboa con 30 puntos. As branquivermellas están tan só un posto por debaixo do Dépor, e de acadar unha vitoria en feudo herculino, igualarían as galegas. Sempre tendo en conta que as galegas teñen un partido menos, o adiado por mor do temporal contra a Real Sociedad, que disputarase o vindeiro mércores 19 de febreiro ás 19:00.
A planificación semanal, sempre susceptible de sufrir variación por razóns técnicas, é a seguinte:
Mércores 29 de xaneiro
17:00: Adestramento en Abegondo
Xoves 30 de xaneiro
17:00: Adestramento en Abegondo
Venres 31 de xaneiro
17:00: Adestramento en Abegondo
Sábado 1 de febreiro
10:30: Adestramento en Abegondo
Domingo 2 de febreiro
12:00: Deportivo ABANCA – Athletic Club
Adeus de Silvia Mérida e Érika
O Deportivo ABANCA chegou a un acordo con Silvia Mérida e Érika para a rescisión dos contratos que as vinculaban ao club branquiazul coa intención de que ambas poidan buscar unha nova oportunidade profesional na que seguir crecendo nas súas respectivas carreiras.
Silvia Mérida, defensa central nada en Benalmádena (Málaga) hai 22 anos, chegou ao Dépor ao comezo da Tempada 2017-2018, polo que estaba na súa terceira campaña como xogadora branquiazul. No seu paso pola Coruña disputou 46 encontros entre Liga e playoff de ascenso, nos que anotou 6 goles.
Érika Sâmia Lima da Silva, lateral ou extremo brasileira de 23 anos de idade, aterrou na Coruña ao comezo do curso pasado. Desde entón xogou 24 partidos entre Liga e playoff (3 deles en Primeira Iberdrola), levando a súa rúbrica un total de 4 tantos.
O conxunto herculino despedíuse das xogadoras e quixo “agradecer moi sinceramente a Silvia e Érika a súa aposta por sumarse ao proxecto do Deportivo ABANCA e o seu traballo, esforzo, dedicación, profesionalidade e deportivismo, protagonizando momentos históricos do Club como o ascenso a Primeira Iberdrola logrado o pasado verán. Por todo iso o club deséxalles moita sorte nos seus futuros desafíos profesionais e persoais”.
