O RC Deportivo Abanca debutará na Copa da Raíña ante o Valencia nos oitavos de final, a partido único. O sorteo puro, entre os 16 equipos da Primeira Iberdrola, emparellou ao cadro branquiazul co conxunto ché, co que se medirá os días 11, 12 ou 13 de febreiro.
Dita eliminatoria disputarase a partido único en Abegondo. O sorteo celebrado este venres no Salón Luís Aragonés da Cidade do Fútbol de Las Rozas permitirá volver verse as caras a dous equipos que xogaron en Liga o pasado 6 de xaneiro, no Estadio Antonio Puchades de Paterna (Valencia). Houbo empate (1-1) aínda que o triunfo estivo máis preto ao lado deportivista por xogo e ocasións.
Nas filas do Valencia destaca a galega Mari Paz, que fai tan só uns días igualaba a Kempes e superaba ao guaje Villa como goleadora histórica do club con 130 tantos.
Manu Sánchez, “satisfeito” co sorteo, ve a eliminatoria “ao 50 %”
Manu Sánchez mostrouse “satisfeito” polo sorteo, “principalmente porque nos tocou xogar en casa. Para ser o noso debut nesta competición é importante estar arroupados pola nosa xente”. “É unha nova ilusión para todos nós esta Copa e imos ver se podemos saír ben desta primeira eliminatoria”, apunta.
Manu Sánchez, adestrador do Dépor: “É unha nova ilusión para todos nós esta Copa e imos ver se podemos saír ben desta primeira eliminatoria”.
Prefire non falar de favoritos: “Nós estamos a levar unha boa traxectoria na competición regular, pero é unha nova competición na que imos debutar ante un rival que, aínda que na liga non o estea pasando moi ben, ten moita entidade en España. A partido único pode pasar calquera cousa. Imos ver como chegamos os dous equipos en canto a estado de forma, lesións e demais. Agora mesmo é unha eliminatoria ao 50%”.
Manu Sánchez, adestrador do Dépor: “A partido único pode pasar calquera cousa. Imos ver como chegamos os dous equipos en canto a estado de forma, lesións e demais. Agora mesmo é unha eliminatoria ao 50%”.
Ao técnico deportivista gústalle o modelo de competición da Copa: “Paréceme fantástico porque participamos todos os equipos da Primeira Iberdrola. Anteriormente só facíano os 8 primeiros. É un novo impulso, a estas alturas de competición, para os equipos que non teñen xa certos obxectivos. É unha nova motivación para seguir competindo”.
