O Deportivo ABANCA enfróntase mañá domingo 15 ao Madrid CFF (12:00 horas) no campo Matapiñonera de San Sebastián de los Reyes, en choque correspondente á 13ª xornada na Primeira Iberdrola.
Manu Sánchez citou para este choque a 18 futbolistas. “Imos con todo”, apunta o adestrador coruñés. Caen da convocatoria por lesión Miriam, Patri Díaz e Silvia Mérida, esta como consecuencia dunha escordadura no ligamento lateral interno dun xeonllo.
Existe un precedente esta tempada entre Madrid CFF e Deportivo ABANCA. Foi con motivo dun amigable celebrado no campo da Eragudina de Astorga o pasado 4 de agosto. Naquela ocasión venceron as madrileñas (0-2), quizais con algo de máis fortuna de fronte ao gol na que foi a segunda cita de pretemporada para o Dépor ABANCA.
Preocupación ante un campo de herba sintética
No vestiario branquiazul preparan o partido coa alerta non só do cambio de superficie senon tamén pola experiencia do conxunto madrileño na categoría. Manu, cambiou escenario dalgún adestramento desta semana, para aclimatar ás futbolistas á herba sintética. Ademais, falou en rolda de prensa sobre a importancia que podría ter o cambio de superficie no partido.
A expedición do Dépor ABANCA, tras o último adestramento desta mañá, viaxa por estrada a Madrid segundo esta folla de roteiro:
Sábado 14 de decembro
11:30: Saída en autocar a San Sebastián de los Reyes
18:30 (horario aproximado): Chegada ao AC hotel by Marriott San Sebastián de los Reyes
Domingo 15 de decembro
12:00: Madrid CFF – Deportivo ABANCA, no campo Matapiñonera (San Sebastián de los Reyes)
Ao concluír, viaxe de regreso por estrada á Coruña
Tras o encontro, Manu Sánchez citou ao seu persoal o martes 17 de decembro en Abegondo ás 17:00 para un novo adestramento.
