O Dépor ABANCA, líder e campión de inverno da Primera Federación FutFem da RFEF, recibe hoxe sábado 21 de xaneiro na Cidade Deportiva de Abegondo ao Cacereño, terceiro clasificado e unha pedra no seu zapato na primeira volta da competición. O partido terá lugar a partir das 12:00 horas e poderá seguirse a través da TVG-2.
O cruce entre coruñesas e cacereñas corresponde á 16ª xornada da Primera Federación e arrinca a segunda volta da competición. Empeza polo tanto a conta atrás para acadar o obxectivo do ascenso. O ansiado retorno á elite das Nosas.
Para elo, as coruñesas van paso a paso. O primeiro reto é seguir facendo de Abegondo un fortín. O segundo, ben podería ser, tal e como apuntaba a adestradora Irene Ferreras, aguantar no liderato da categoría de prata varias semanas consecutivas. E o terceiro é continuar o camiño aberto en Granada a domicilio. Diante do equipo andaluz o conxunto deportivista non so levou os tres puntos, as nosas deportivistas víronse capaces de sufrir, de manter un resultado e de vencer a domicilio incluso cando o partido se che pon costa arriba (lesións incluídas).
Irene Ferreras: “Imos tentar manter o liderado na Primera Federación varias xornadas consecutivas”
Logo desa vitoria o Dépor ABANCA colocábase un punto por encima da SD Eibar e tres con respecto ao seu rival deste arranque de segunda volta, o Cacereño, e ao DUX Logroño que tamén ten 28 pero é cuarto por golaverage.
No caso do Cacereño, as ganas de vencer duplícanse. As estremeñas venceron na ida ás galegas por 4-0. Irene Ferreras decía na previa do partido ante os medios que nese cruce posiblement eo Dépor ABANCA ofreceu a súa “peor versión”. No equipo galego quere demostrar e demostrarse a si mesmas que ese partido foi “un accidente e que temos nivel para sacar tres puntos en casa outra vez”. As palabras son de Irene Ferreras, que non ocultaba que ese tropezo inicial é unha espiña que se queren quitar. Así, o desquite do 4-0 de Cáceres poderá ter en Abegondo o seu escenario propicio.
O Cacereño, leva perigo fóra da casa
Aínda que xusto no seu último partido non apañou os tres puntos, o Cacereño adoita ser un equipo que fóra da casa é perigoso para os seus rivais. Á Cidade Deportiva de Abegondo chega logo dunha derrota que seguramente lles amola.
O bloque que adestra Ernesto Sánchez perdía no último partido da primeira volta na cancha do DUX Logroño (2-1). Ese resultado permitou ás logroñesas coller ás estremeñas na táboa da Primera Federación onde agora empatan a 28 puntos. Foi a súa única derrota a domicilio xunto a colleitada contra o CD Alba Fundación (1-0)
Onde si colleitaron triunfos foi nos campos de: Athletic Club B (1-3), UDG Granadilla Tenerife B (0-1), CD Juan Grande Ginelux (0-1) e Real Oviedo (0-1). Ademais finalizaron con táboas as súas saídas ante: CDF Osasuna (0-0) e FC Barcelona B (1-1).
Como reforzo goleador de cara a este segundo acto da competición ligueira, o Cacereño vén de fichar a chilena Sonya Keefe.
OFICIAL |
✅ Sonya Keefe Navarro (@sonya_keefe) nuevo refuerzo en la delantera del Cacereño Femenino.
Jugadora con gran visión de juego que viene a aportar trabajo, sacrificio en la punta de lanza y gol.#BuenvenidaSonya#CPCFem
🔗https://t.co/2CZYpPMAp9 pic.twitter.com/cYqJToPwLL
— Cacereño Femenino (@CacerenoFem) January 20, 2023
Ernesto Sánchez: “O Dépor ABANCA é dos favoritos ao ascenso”
O adestrador do Cacereño, Ernesto Sánchez, consideraba na rolda de prensa previa ao partido contra o Dépor ABANCA, que a derrota ante o DUX Logroño “pódenos beneficiar de cara ao futuro. Somos un equipo que se vai facendo cada vez máis fortes na adversidade. Estos paus fan que nos levantemos con moita máis forza. Ogallá na segunda volta non volvamos vivir situaciones similares”.
O adestrador do Cacereño feminino amosábase satisfeito do traballo do bloque que prepara: “Competimos cada partido. Os rivales síntense incómodos ante o noso plantexamento. Esa é unha das cuestións que debemos maximizar para que, ao final de tempada, este club acade o fito histórico de estar entre os cinco primeiros. É o obxectivo que nos marcamos de inicio. É moi ambicioso, pero polo de agora imos polo bo camiño”.
Sobre o conxunto galego, Ernesto Sanchez explicaba que na súa opinión “o Dépor ABANCA, díxenllo cando viñeron a Cáceres a Irene, é dos favoritos para ascender. Teñen un equipazo, con xogadoras dun grandísimo nivel. Na súa casa son moi potentes e fóra de casa están acadando bos resultados, como o da última xornada. Son moi equipo. Aquí en Cáceres faltoullese iso. Creo que o Dépor estará luchando ata o final polo primeiro posto.
Ernesto Sánchez, adestrador do Cacereño dá por bo rañar un punto en Abegondo: “Imos ir a polos tres puntos, pero un empate sería algo bo nese campo”
“A vitoria na Coruña pasa por ser moi fieis a como traballamos. Estaremos moi esixidas tanto en defensa como en ataque e nas transicións”.
“Imos ir a polos tres puntos, pero un empate sería algo bo nese campo”, confesaba o adestrador do Cacereño.
As baixas do Dépor ABANCA para xogar co Cacereño
Lamentablemente a enfermaría do Dépor ABANCA non está baleira para este partido contra o Cacereño. Aroa Guerra mantense en recuperación tras ser operada de apendicite; Samara Ortiz, que volvía a pasada xornada, tivo que deixar por molestias o partido co Granada CF e será baixa para esta 16ª xornada da Primera Federación. Segundo parte médico feito público polo RC Deportivo, os Servizos Médicos da entidade herculina “realizaron probas complementarias nas que se confirmou unha lesión muscular no bíceps femoral da defensa deportivista”.
Si será da partida Laura Fernández, que na última xornada levou un golpe coa súa compañeira Henar Muiña. De feito, a futbolista non volveu co resto do equipo de Granada debido a que tivo que pasar polo hospital a curar un corte na fronte.
#ASNOSAS | Todo vai quedar nun susto e no recordo para sempre de máis puntos dos debidos en Granada.
Ánimo, boa e pronta recuperación e bo regreso a casa!
Forza @Heenaar4, @LauraFdezBorge!
Grazas @Hospital_HVN, @GranadaCF, @GranadaCF_Fem! https://t.co/7qTHZiDYKT pic.twitter.com/RBs2JUtMwG
— RC Deportivo (@RCDeportivo) January 15, 2023
Precisamente Henar Muiña non entra na convocatoria nesta xornada, pero no seu caso a ausencia é por sanción ao ter acumuladas amonestacións.
Lonxe de preocuparlle estas ausencias, Irene Ferreras mira a situación con actitude positiva e observa unha oportunidade “para outras xogadoras”. Unha delas é a canteirana Paula Monteagudo. A viguesa volve entrar na convocatoria e recibiu moi boas palabras por parte da adestradora deportivista que gabou o seu traballo.
A adaptación de Paula Monteagudo “un proceso para enmarcar”
Irene Ferreras falo en rolda de prensa da reconversión da xogadora para fornecer as carencias que o equipo tiña de xogadoras zurdas. “É un proceso para enmarcar”, aseguraba a adestradora. Ferreras relatou que falou coa xogadora en pretempada, e tamén hai un mes. Explicoulle que, aínda que non fose a súa posición, a futbolista podía contar coa “oportunidade de traballar aí e de ter algunha oportunidade no primeiro equipo”, e as ocasións están petando na porta da deportista galega.
Non lle escondeu Irene Ferreras a Paula Monteagudo que o camiño había ser “longo” e que había de estar “moitos meses sen entrar e expoñéndose a situacións nas que non se había sentir cómoda”. A futbolista recolleu a luva da adestradora e traballou para ofrecerlle ao Dépor ABANCA o que precisaba dela.
Sobre a súa evolución e actitude, Irene Ferreras declarou: “Foi incrible a madurez coa que o afrontou. É unha moza que todos os días adestra en dinámica do primeiro equipo. Non pon unha mala cara para nada. Sufriu un proceso de transformación en canto á súa posición e adaptouse moi ben. Hai un mes ou mes e medio víaa adestrando cunha soltura que non vira antes. Iso sumado ao feedback que me dá Cris Oreiro de como estaba a competir co filial facíame exporme darlle algunha oportunidade”.
Ferreras manifestou aos medios que falou con ela “hai un mes e lle dixen que fose paciente, que valorabamos moito o seu traballo, que nos estaba axudando moito, tanto en adestramentos como en sentir ao equipo con moitas máis opcións e máis sólido. Un mes despois dáse esta situación. Entrou en convocatoria por méritos propios”.
Coa recaída de Samara Ortiz ante o Granada CF chegou a ocasión para Paula Monteagudo. “Foi incrible como saíu ao campo, como se desenvolveu. Deunos máis finura na saída de balón, máis claridade. A partir de aí o equipo empezou a xogar mellor. Teremos que seguir traballando moitos aspectos porque non é a súa posición e aínda lle custa. Aquí o mérito de todo o proceso teno ela e o traballo que puxo. Estou encantada da predisposición que tivo para axudar ao equipo”, declaraba a adestradora deportivista.
Esta é a lista de convocadas por Irene Ferreras para medirse ao Cacereño:
#AsNosas convocadas para a 16ª xornada de #PrimeraFederaciónFutFem, o #DéporABANCACacereño de mañá ás 12:00 h. na Cidade Deportiva de Abegondo (📺 @TVGalicia 2)! pic.twitter.com/3CBRWJgtRh
— RC Deportivo (@RCDeportivo) January 20, 2023