Xa falaba Luis Treviño durante a previa da igualdade entre ambos equipos, e foi así. O derbi galego entre o Dépor B e o Viajes Interrías terminou en empate (3-3). As herculinas poñéronse por diante moi cedo, no minuto 5, cando Nuria Torres remataba un balón que quedaba morto na área pequena tras un saque de esquina.
O Dépor de Kevin Cabado entrou moi ben ao partido e tan só dous minutos despois, Nuria facía o segundo do partido e o da súa conta particular. Esta vez tras convertir un lanzamento de penalti. A reacción das de Villalonga chegaría ao pouco, cun golazo espectacular de Laura tras un lanzamento desde 30 metros que colábase na escuadra defendida por Jessica. Tan só levábamos 12 minutos e o partido xa sumaba tres goles.
Con moita actitude e moi bo xogo as pupilas de Luis Treviño conseguiron remontar e irse ao tempo de lecer con 2-3 no luminoso. “Incluso puidemos irnos ao descanso con maior diferencia de goles xa que erramos varias ocasións moi claras”, lamentábase Treviño das ocasións erradas do seu equipo.
Tras o tempo de refresco, chegaba unha acción que marcaría o devir do encontro. Preto do minuto oito da segunda metade, Machado sería expulsada por un codazo sobre Nuria que a colexiada interpretou como agresión e sacou cartón vermello directo á 7 do Interrías. “O partido marcouno a expulsión de Machado”, comentaba Luis Treviño tras o pitido final.
Con este resultado, o Interrías segue no máis alto da táboa , a expensas do partido do Monte, que de gañar, igualaría a puntos ás galegas. O Dépor B, continúa no posto de bronce e xa pensa no súa visita a Oviedo da vindeira semana, cun rival directo polo terceiro posto, o Oviedo Moderno B.
Luis Treviño, adestrador do Viajes Interrías: “Non lles podo pedir máis ás miñas xogadoras, tiveron moita actitude e souberon repoñerse do 2-0 inicial. Mantemos a distancia co Dépor e sabemos que puntuar en Abegondo sempre é complicado”.
