Tambores, cánticos e gran ambiente na mañá de hoxe en Abegondo para presenciar o Dépor – Athletic de Bilbao. Un partido no que as galegas non estiveron cómodas sobre o verde e as leonas impuxeron o seu xogo directo para acabar gañando 0-2 na primeira derrota na casa das galegas. No feudo coruñés non cabía un alfiler e volveu a recibir as súas con moito cariño e enerxía desde as bancadas. O detalle estivo cando no quencemento previo ao comezo do partido, Tere e Manu Sánchez quedáronse ensaiando falta e ao retirarse cara os vestiaros, ambos foron ovacionados por gran parte da afección coruñesa.
Manu volveu a aliñear a Tere e Alba no once inicial, ‘volta á normalidade’ para recibir na casa a un gran rival. Pero a afección local quedouse muda cando aos nove segundos de partido, Azkona picaba por encima de Sullastres e anotaba o primeiro do partido. O gol chegaba tras un gran pase de M. Oroz que colleu moi fría á zaga local. Tocaba remar outra vez e bancada herculina volvía facer sonar os tambores e os cánticos para animar ás galegas.
Cando transcurría o minuto cinco de partido, Sullastres volvía a facer outra das súas grandes intervencións a un balón cruzado. Hoxe non estaba Misa nin sobre o verde nin no banco por mor dunha lesión, pero de novo, o Dépor pode dar conta de ter a dúas das mellores gardamallas da Liga.
A resposta das herculinas chegaba tras un córner botado por Tere Abelleira, que no rexeite quedaba morto na área pequena pero ningunha das branquiazuis chegaba a lograr conectar co coiro e poñer o empate no marcador.
O Dépor íase quitando a presión e o mazazo do gol tempraneiro con ocasións e posesión. Unha das máis claras chegaría no minuto 16 tras un gran disparo desde a frontal de Alba Merino que petou no longueiro e fixo tembrar a madeira debido á potencia do tiro.
Minuto 20 de partido e Oguiza non puido seguir sobre o verde. A xogadora vasca conducía o balón e notou como o xeonllo esquerdo non lle respondía. Villacampa tivo que facer un relevo e introducir Lucía García a no seu lugar. Unha pena para a xogadora do filial vasco que estaba a gozar de ter minutos co primeiro equipo.
Media hora de partido e Tere estaba a ser a mellor do partido ata este momento, demostrando a súa gran calidade e abarcando moito campo. Recuperando e facendo xogar ao seu equipo. Se Abelleira está a un bo nivel o Dépor nótao.
O conxunto vasco non quería deixar crecer as galegas e nunha incursión por velocidade da recién incorporada, Laura García, chegaba unha gran ocasión para as de Villacampa. Un gran tiro raso e cruzado da dianteira que íase lamendo o pau dereito da meta defendida por Sullastres.
Abegondo nunca falla
Pasaban os minutos e a xente seguía entrando en Abegondo. Ambientazo para agradecer as súas a gran tempada que están a facer. O Dépor ABANCA seguía dominando e xerando ocasión ante un Athletic moi ben plantado no césped e que aproveitaba a velocidade das súas dianteiras para coller ás costas da zaga galega, con descamarques en ruptura moi perigosos de L. García e Erik Vázquez.
Dous erros consecutivos no control de Iria primeiro e Nuria despois, facía que o Athletic gozase da última ocasión antes de que ambos equipos enfilasen o túnel de vestiarios. 0-1 ao descanso e Manu Sánchez tería 15 minutos para realizar os axustes necesarios para darlle volta ao encontro de cara á segunda metade.
A segunda metade comezou coa mesma tónica. O Dépor tetando levar o peso do encontro, mentres que as de Villacampa querían facer dano ás costas de María Méndez e Villegas. Manu Sánchez poñía a quentar a Maya, Kika e as novas incorporacións, Lorena e Arbeláez. Ángel Villacampa tamén movía o banco e daba entrada no minuto 52 a Sierra en detrimento de María Díaz.
O partido ía subindo de revolucións e nunha dura entrada de Garazi, formoúse unha pequena tángana diante do banco galego que saldouse con amarela para para a zaguera vasca. O partido seguía moi trabado e nin o Dépor nin o Athletic estaba totalmente cómodo sobre o verde. Manu movía fichas e daba entrada a Kika por Alba Merino que estaba a notar o cansazo tras un gran traballo na medular.
Partido de pizarra
No minuto 69 Villacampa retirou do campo a Garazi que tiña amarela e estaba a realizar varias accións ao límite do segundo cartón. No seu lugar entrou Valdezate que se colou no mesmo lugar que Garazi, no lado esquerdo da zaga. Mentres, Tere seguía ao seu, levando o peso do xogo do Dépor e deixando os destellos de calidade que sempre demostra. Ainda así, as galegas non estaban cómodas na saída de balón e acumulaban erros que dificultaba moito a circulación do coiro A presión do Athletic era moi boa e poñía en apuros unha saída limpia de balón. Partido de moita pizarra o visto en Abegondo.
Vaselina de bela factura
Cando máis estaba a sufrir as branquiazuis volveu a emerxer a figura de Sullastres. Tras un dobre esbarón de María Méndez, quedaba o balón para un man a man de Erika contra Sullastres. No duelo venceu a cancerbeira catalana tras unha gran mano. Na seguinte xogada, no 75, non tería tanta sorte o cadro galego e Lucía García facía un gol de bela factura tras unha espectacular vaselina na que a gardamallas do Dépor non puido facer nada.
No minuto 79 Abegondo ovacionaba a Tere que saía sustituida por Maya. A galega fixo un gran encontro, unha mágoa que non se vira reflexado no luminoso, nin no xogo global do equipo. No intres finais, o conxunto herculino seguía moi espeso na saída do balón e non conseguían conectar coas xogadoras de ataque.
A falta de cinco minutos para o final, Manu meteu máis madeira e introduciu a Michelle Romero por Noelia Villegas. Iria colocouse no centro da zaga. A pesar dos intentos das galegas, o marcador non se movería máis e as vascas igualarían a puntos (30 puntos) as locais, eso si, o Dépor cun partido menos. As herculinas xogan o vindeiro partido de Copa da Raíña no Riazor-ABANCA o martes 11 de febreiro ás 20:00 horas no que seguro que será un partido moi especial por ser o primeiro oficial en Riazor.
FICHA TÉCNICA
DÉPOR ABANCA: Sullastres, Cris, María Méndez, Villegas (Michelle, minn. 87), Nuria, Iris, Teresa (Maya, min. 80), Merino (Kika, min. 61), Athenea, Peke e Gabi.
ATHLETIC CLUB: Ainhoa, Oihane, Garazi, Gimbert, Moraza (Eunate, min. 77), Damaris, Oroz, Oguiza (Lucía García, min. 25), Murua (Valdezate min. 68), María Díaz (Sierra, min. 52), Erika e Azkona.
GOLES: 0-1 Azkona (min. 1); 0-2 Lucía García (min. 75).
COLEXIADAS: Peláez Arnillas (c. Castellano-Leonés). Amonestó a Merino (min. 48), Garazi (min. 55), Villegas (min. 74) e Kika (min. 74).
INCIDENCIAS: Partido da 19ª xornada de Primeira Iberdrola disputado na Cidade Deportiva de Abegondo ante uns 1.000 espectadores.
