O RC Deportivo ABANCA venceu (0-1) no seu segundo amigable de pretemporada ao Viaxes InterRías FF, club que milita na Primeira Nacional, e adxudicouse dese xeito o Trofeo Concello de Sanxenxo.
As futbolistas que adestra o técnico Miguel Llorente continuaron coas boas sensacións transmitidas no Trofeo Teresa Herrera en ABANCA-RIAZOR, a pesar de que caeron nos penaltis diante do Valadares Gaia FC. Fronte ás portuguesas, o dominio do xogo foi totalmente branquiazul e só faltou puntería nos metros finais.
Desta volta, no Novo Campo de San Pedro de Vilalonga o mando do partido tamén foi branquiazul. Faltaron, iso si, ocasións claras pero decidiu o choque o acerto goleador de Jone na segunda metade.
As futbolistas locais, conscientes dá as diferenzas de categoría, tentaron pechar filas ao redor da súa portería e aproveitar algún erro branquiazul, circunstancia que non se produciu.
Neste partido, o adestrador do Dépor ABANCA, Miguel Llorente, non puido contar por problemas físicos con Alba Merino, Laura Fernández e Ainhoa Marín.
Xogaron polo RC Deportivo ABANCA:
María Sampalo (Nuria, min. 72), María Figueroa (Eva Deus, min. 71), Aroa Guerra (Carlota, min. 71), Andrea Sierra, Inés Juan, Paula (Marta Rico, min. 72), Alejandro Serrano ‘ Ale’ ( Tati, min.46), Raquel, Jone, Goretti ( Patri López, min. 46) e María Ruíz (Noela, min. 85).
