A choiva, como non podía ser doutro modo en Galicia, foi testemuña de luxo dun día histórico en Riazor. O Deportivo ABANCA xogaba o seu primeiro partido oficial no templo herculino, correspondente aos oitavos da Copa da Raíña. Foi unha cita histórica para todo o deportivismo pero tamén será un día que tanto Peke como Athenea non olviden nas súas vidas. Para a ocasión, recibía un Valencia encabezado por unha galega, e deportivista recoñecida, a súa dianteira e capitá Mari Paz Vilas. Todos os alicientes para o que foi unha festa do fútbol feminino, con moitos goles e emoción.
Manu Sánchez saíu co seu once de gala para o debut histórico do Dépor en Riazor, coa única excepción de Bedoya no lugar de Noelia Villegas. A colombiana tiña os seus primeiros minutos como titular desde que chegara no mercado invernal. Tere Abelleira volvía portar o brazalete nunha noite que, de seguro, nunca olvidará.
10 segundos para loitar por un futuro
O Valencia puxo o balón en xogo tras o asubío da colexiada e o balón estivo parado durante os dez primeiros segundos. Dez segundos que serven como protesta polo que é xusto, por un futuro do fútbol feminino que segue parado tras o estancamento da firma do convenio. Dez segundos que parece pouco tempo pero significa moito.
Arrancou o partido e non puido comezar mellor para as galegas. Tras uns primeiros minutos no que ambos equipos mediron as súas forzas, rápido o Dépor impuxo a súa calidade. Chegando ao minuto 5 de partido, o balón chegaba a Peke en banda dereita e, a máxina goleadora histórica deportivista, foise do seu par con varios caneos, apurou liña de fondo e deixou a pracer para que a súa dupla de ataque anotara o primeiro. Gol de Athenea que puxo de manifesto que o engranaxe e a dupla atacante Peke-Athenea funciona ás mil marabillas. Seguide lendo e veredes que o festival goleador non acaba aquí.
As de Carolina Miranda, única entrenadora muller de toda a Liga Iberdrola, quixeron sacudirse a presión cunha clara ocasión nas botas de Bonsegundo. A arxentina aproveitou a súa gran velocidade e plantouse diante de Sullastres, tras un gran pase ás costas da zaga deportivista. A cancerbeira catalana resolveu con moita templanza no man a man. O partido non estaba a defraudar e estaba á altura da cita histórica.
Se primeiro anotou Athenea, agora era o turno de Peke. Imparable a dupla de ataque deportivista. Agora foi a cántabra a que asistiu a Peke cun pase brillante, tras unha gran deixada de Gaby. O balón chegou aos pés da dianteria vasca que non perdoou. Sentou unha rival e bateu a Pi polo pau curto. Manu pode presumir de ter a dúas das mellores dianteiras da categoría.
Con 2-0 no luminoso de Riazor, as valencianistas tiveron a súa recompensa ao esforzo. Miranda subíu as liñas de presión do seu equipo e trataron de dominar ás de Manu Sánchez. Froito de esa presión coordinada, as ches atoparon espazos ás costas da defensa branquiazul. Un erro na saída de balón terminou no primeiro tanto visitante, obra de Paula Guerrero tras varios rexeites na área no que a zaga galega no foi quen de despeixar o coiro.
Tras recortar distancias, chegaron os peores momentos para as galegas. Bonsegundo foi a xogaora que máis perigo creou para as da cidade do Turia e tras unha boa xogada por banda dereita, superou en velocidade a Nuria. A de Santiago de Compostela derrubou á 11 valencianista provocando unha falta lateral moi perigosa e gañándose o primeiro cartón amarelo do partido.
Se Peke e Athenea estaban a soster o Dépor en ataque, Sullastres foi un muro baixo paus. Tras o lanzamento da falta, outra vez emerxeu a figura da catalana para dar seguridade e frustrar as posibilidades de empate das visitantes.
Peke-Athenea, conexión letal
A 9 e a 18 foron un verdadeiro pesadelo para Berta Pujades e Van Den Berg, as zagueiras ches. Athenea recibía o coiro en banda esquerda e tras encarar ao seu par, puxo o balón na área pequena para que Peke fixera o terceiro das galegas e o segundo na súa conta particular. Ben é certo que a defensa non estivo moi contundente nin expeditiva. Aínda así, en días como hoxe, Peke e Athenea forman unha parella letal para as zagas.
Tere Abelleira portou o brazalete e non parou de dar ordes ao pedir o balón. Como xa é habitual, volveu lucir canos e detalles de moita calidade que fixo poñer en pé aos case 8.000 afeccionados que estaban nas bancadas de Riazor.
As galegas pediron penalti no 40 por unha caída na área de Athenea tras un cano e cando xa estaba a cargar a perna dereita para fusilar a meta de Pi. Con esta última ocasión chegaríase ao descanso dun gran partido de fútbol, con moita emoción e moitos goles. A salsa deste deporte.
Un soño cumprido
A galega Mari Paz cumpría hoxe un soño, xogar en Riazor. O soño non quedaría aí e, tras o tempo de lecer, no minuto 47 perforaba a rede de Sullastres dun cabezazo tras un bo centro de Calligaris. Isto é o bonito do fútbol, que ás veces, os soños fanse realidade.
Un erro de Alba Merino no centro do campo custou caro ás galegas e puxo as valencianistas a tan só un gol de empatar a eliminatoria.
Hat trick de P3k3
Cando o Dépor está en apuros aí están Peke e Athenea para saír ao rescate. A 9 deportivista, outra vez espectacular, deixou atrás o seu par e volveu a poñer en bandexa o coiro para que Peke fixera o seu hat trick. Carolina Miranda xa non sabía como parar as killers branquiazuis.
As ches non perdían a cara ao partido, e encabezadas por Mari Paz, buscaban poñer en apuros as galegas. Preto do 60 o Valencia gozaría dunha chegada por banda dereita. O balón acababa na área pequena de Sullastres e María Méndez salvaba o terceiro case na liña de gol.
Póker Peke
A dianteria vasca é moi grande. O quinto gol do Dépor e o cuarto na súa conta particular chegaría da súa bota esquerda. Se decimos gol, falamos de Peke e se estamos ante unha gran xogada con asistencia, temos que falar de Athenea. A dupla volveu a demostrar o seu talento. 5-2 e partido estaba listo para sentencia co Dépor en cuartos de final da Copa da Raíña.
O Valencia seguíuno tentando e Cris salvou un gol 77′ ante unha gran xogada de Coleman que enfilaba soa a meta de Sullastres. A lateral dereita de Astorga cruzouse moi ben do camiño da 7 valencianista e evitou o gol che. Tres minutos despois chegaría un gol moi festexado e moi especial, o gol da galega Tere Abelleira. A 3 sumouse ao festival de goles tras un bo zapatazo cruzado desde dentro da área.
Para poñer o punto final a unha goleada e unha noite irrepetible chegaría o gol da central María Méndez que pechou o partido e marcou o sétimo gol tras unha xogada de pizarra botada por Maya. As galegas xa son equipo de cuartos de final da Copa da Raíña e fixeron vibrar e gozar as case 8.000 persoas que animaron e presenciaron o partido desde a bancada de Riazor. Goleada das que fan historia.
FICHA TÉCNICA
DÉPOR ABANCA: Sullastres, Cris, María Méndez, Bedoya, Nuria (74′), Alba (67′), Iris (86′), Tere (C) (86′), Gaby, Peke, Athenea.
Suplentes: Misa, Micheller, Miriam, Kika (86′), Arbeláez (86′), Maya (67′) e Noelia Villegas (74′).
VALENCIA FEMENINO: María Pi, Van den Berg, Paula Guerrero (67′), Sandra Hernández, Mari Paz Vilas (C), Flor Bonsegundo (53′), Carol Férez, Berta Pujadas, Viola Calligaris, Natalia Gaitán, Bea Beltrán.
Suplentes: Enith Salón, Mónica Flores, Marta Carro, Zenatha Coleman (53′), Cara Curtin, Naiara Beristain e Asun (67′) Martínez.
GOLES:
Min. 4 Gol de Athenea (1-0)
Min. 15 Gol de Peke (2-0)
Min. 17 Gol de Paula Guerrero (2-1)
Min. 31 Gol de Peke (3-1)
Min. 47 Gol de Mari Paz (3-2)
Min. 59 Gol de Peke (4-2)
Min. 71 Gol de Peke (5-2)
Min. 80 Gol de Tere Abelleira (6-2)
Min. 90 Gol de María Méndez (7-2)
ÁRBITROS: Ainara Acevedo, Matilde Esteves-García, Mariona Peralta, Eugenia Gil.
INCIDENCIAS: Partido correspondente aos oitavos de final no que enfrontou no Estadio de Abanca-Riazor ao Deportivo Abanca co Valencia Club de Fútbol Feminino. Antes do asubío inicial ó conxunto deportivista agasallaba aos 5.000 primeiros afeccionados cunha bufanda. Ademais, tras o inicio, as xogadoras tanto locais como rivais non rodaron o balón reivindicando o convenio colectivo. 7.569 espectadores.
