Suma e segue. O Dépor ABANCA soña e atrévese a facelo en alto. As branquiazuis saen con todo e baléirasen en cada partido na súa loita por salvar unha categoría que lles custou conseguir e néganse a perder sen dar a batalla. Hoxe, en partido recuperado da xornada 25 (que se adiara por casos de COVID-19), as coruñesas puntuaron na difícil cancha do Atlético de Madrid (1-1).
Un punto máis é un punto menos para achegarse ao Rayo Vallecano, conxunto que agora mesmo marca o posto de salvación a Liga Iberdrola de fútbol. As futbolistas do Dépor ABANCA veñen de facerse cun valiosísimo empate diante dun rival da zona alta, o Atlético de Madrid.
O Dépor ABANCA saltou ao tepe do Complexo Deportivo Wanda de Alcalá de Henares coas pilas postas e a mirada posta na portaría local. De contado chegaron as ocasións. Nin dez minutos se levaban consumidos cando a dupla Peke – Athenea del Castillo tentaba facer das súas no campo colchonero. O tiro da cántabra foi parar ás mans da cancerbeira local, Pauline. Logo chegaría un disparo de Peke que puxo de novo a traballar á gardamallas.
Velaí os dous primeiros avisos que daban conta dunha declaración de intencións: Estamos aquí, estamos vivas, e vimos para andarnos con medias tintas. Imos a por todas.
Pero o Dépor non xogaba so. Enfronte estaba todo un Atlético de Madrid que cando ten ocasión saca a relucir a súa efectividade. Fíxoo no minuto 11 cun centro da internacional Amanda Sampedro que peiteou Van Dongen na frontal da área enviando o esférico ao fondo da meta defendida por Sullastres.
De novo tocaba empezar por detrás no marcador. E de novo o conxunto coruñés deu a cara. Pouco durou o disgusto nas filas branquiazuis xa que no minuto 18, Athenea del Castillo empataba o partido cun disparo case sen ángulo pegada á liña de fondo. Táboas (1-1) e volta a comezar.
Aínda gozaría o Dépor ABANCA de máis ocasións pero sen conseguir ver porta, polo que se chegaría ao descanso co empate a uns no marcador.
Descanso na Cidade Deportiva Wanda! #AtletiDéporABANCA 1-1#TocaVolverseMollar ⚽️ #UnÚnicoLatido 💙 #razónDÉcorazón pic.twitter.com/Ffh1lTVJVl
— RC Deportivo (@RCDeportivo) May 19, 2021
Logo duns primeiros 45 minutos de dominio galego, e tras un par de chegadas no arranque do segundo acto, as tornas mudaron. O Atlético de Madrid tomou o control do partido e o Dépor ABANCA tivo que facerse forte en defensa para aguantar as embestidas locais, e conformarse coas ocasións ao contragolpe na faceta atacante.
As xogadoras que adestra Manu Sánchez conseguiron, con moitísimo esforzo físico e orde no campo, manter o empate e traerse cara a Galicia un punto de ouro que as coloca a só catro da salvación. Un trunfo e un empate, simplemente e nada menos, segundo se mire. Pero As Nosas deportivistas seguen vivas, na loita e saben que é certo: PÓDESE!
Fiiiinaaaal do #AtletiDéporABANCA na Cidade Deportiva Wanda, 1-1: traballado e merecido punto d #asnosas, un pasiño máis cerca!#TocaVolverseMollar ⚽️ #UnÚnicoLatido 💙 #razónDÉcorazón pic.twitter.com/QEgciMIceW
— RC Deportivo (@RCDeportivo) May 19, 2021
O domingo, o Dépor ABANCA visita ao Sporting de Huelva
O Dépor ABANCA regresaba por estrada hoxe mesmo á Coruña e mañá mesmo, na tarde, contra das 17:30 horas as futbolitas volven estar citadas para un adestramento de recuperación en Abegondo (no caso das titulares en Alcalá de Henares).
Na mente, o seguinte hito, que será medirse este domingo 23 de maio ás 12:00 horas ao Sporting Huelva no campo de fútbol da Orde, en terras andaluzas. Será en partido correspondente á 31ª xornada na Primera Iberdrola.
As onubenses, ubicadas na táboa en terra de ninguén, lévanlles dez puntos ás coruñesas. O grupo que adestra Manu Sánchez saltará ao campo sabendo xa quen resultou gañador no encontro entre Betis e Rayo. Se as madrileñas caen e o Dépor gana, a salvación quedaría a un punto. Outro fantástico estímulo que seguir soñando en alto!
FICHA TÉCNICA
ATLÉTICO DE MADRID: Pauline, Kazadi (Bernabé, min. 36), Tounkara (Aleixandri, min. 46), Van Dongen, Strom, Santos, Claudia (Meseguer, min. 52), Amanda Sampedro (Ajibade, min. 65), Knaak (Bonetti, min. 46), Laurent e Ludmila.
RC DEPORTIVO ABANCA: Sullastres, Cris, Ainoa, Iris, Villegas, Eva Dios (Patri López, min. 48), Bedoya, Alba (Carlota, min. 72), Gaby, Peke (Lía, min. 62) e Athenea.
GOLES: 1-0 Van Dongen (min. 11); 1-1 Athenea (min. 18)
ÁRBITRA: Cebollada López (c. valenciano). Amonestó a Gaby (min. 11), Kazady (min. 28), Van Dongen (min. 47) e Ainoa (min. 61).
INCIDENCIAS: Partido correspondente á 25ª xornada da liga na Primera Iberdrola, adiado no seu día por mor da detección de casos de COVID-19 nas filas colchoneras. O cruce tivo lugar no Complexo Deportivo Wanda de Alcalá de Henares.
