Os cambios comezan a dar os seus frutos no Dépor ABANCA, que evita a derrota unha xornada máis. Un punto non era suficiente para deixar atrás os pesadelos do descenso, pero o empate (0-0) ante a SD Eibar permite que as branquiazuis abandoen a posición de colista.
O primeiro reto desta semana tan importante para o futuro das branquiazuis na Liga Iberdrola foi superado, pero sen nota. As galegas lograron deixar a súa portería a cero, pero non foron tan efectivas en ataque.
Un partido sen gol
Nos 90 minutos ambos equipos tiveron algunha ocasión de anotar tantos, pero a maior parte do partido disputouse no centro do campo.
O primeiro susto que viviron as locais foi da man de Ane Pérez, cabeceando unha falta lateral que Sullastres sacou case baixo paos. As oportunidades para as branquiazuis chegaban en forma de accións a balón parado, saques de esquina ou faltas laterais, sen que as futbolistas dirixidas por Manu Sánchez foran quen de convertelas en gol.
A tiveron nas súas botas xogadoras como Stephanie Blanco e Gaby, pero o pulso do xogo non estaba nas porterías, senón no mediocampo.
Na segunda metade a tónica do encontro foi moi similar, con dous equipos de igualado nivel agardando un erro contrario para adiantarse. Con todo, as xogadas de ataque tiveron máis protagonismo, aínda que sen resultado.
Ao disparo de Carla para o Eibar, que rematou nas mans de Sullastres, responderon as galegas do Déporco tiro de Lady Andrade desde a borde da área. As oportunidades seguían alternándose, destacando no ataque local Peke.
A dianteira branquiazul estivo preto de dar o gol da vitoria ás coruñesas, nunha xogada iniciada no extremo esquerdo e colocándolle a pelota a Alba Merino, coa mala sorte de que o disparo da extremeña deu contra o pao.
Momentos despois, a máxima amenaza no conxunto visitante, Kgatlana, unha das mellores atacantes da categoría, foi quen de poñer o gol na rede, pero a súa posición de fóra de xogo descartou o tanto.
No bando do Dépor ABANCA tamén tivo os seus destellos Athenea, que provocou un libre directo lanzado por Lady Andrade e dez minutos despois case logra darlle unha asistencia a Peke.
O partido rematou cunhas táboas merecidas, entre dous equipos que loitaron durante os noventa minutos por asinar un gol que nunca chegou.
Un punto que fai que as coruñesas abandoen despois de varias semanas a última posición, pero que deixa a permanencia a catro puntos de distancia.
A valía do empate do Dépor ABANCA dependerá do resultado do domingo
O novo esquema de Manu Sánchez, con Iris Arnaiz como central e Ainoa como pivote está a dar resultados. As branquiazuis xa levan dúas xornadas deixando a súa portería a cero.
Unha táctica que previsiblemente repetirá ante o Betis, actual colista, este domingo, 14 de febreiro. Aínda que Manu Sánchez non queira falar de finais, o certo é que gañar este partido será un paso de xigante para lograr a permanencia, dando esquinazo a un rival directo como as andaluzas.
Este partido “extra” que terá o Dépor ABANCA, ao ter que recuperar o encontro ante o Betis, é unha oportunidade de ouro para converterse nun claro aspirante á permanencia.
FICHA TÉCNICA
DÉPOR ABANCA: Sullastres, Cris, Iris Arnaiz, Blanco, Villegas, Alba Merino (Kika, min. 87), Ainoa, Gaby, Lady, Athenea e Peke (Michelle, min. 87).
SD EIBAR: Noelia, Carla, Ane Pérez, Matlou (Jujuba, min. 74), Jimena López, Ruth, Sheila, Mar, Llompart, Kgatlana e Arola (Sara Navarro, min. 74).
GOLES: Sen goles.
ÁRBITRA: Cebollada López (c. valenciano). Tarxeta amarela a Alba Merino (min. 41), Kgatlana (min. 60), Matlou (min. 69), Athenea (min. 72) e ao técnico visitante Iker Dorronsoro (min. 89).
INICIDENCIAS: partido de la 20ª xornada de Primera Iberdrola disputado en Abegondo a porta pechada.
