O Dépor ABANCA segue dando pasos para afianzarse na zona alta da Reto Iberdrola, sumando un novo triunfo na tempada. Desta vez, as branquiazuis impuxéronse ao Atlético de Madrid B en terras madrileñas, remontando o partido e asinando a vitoria por un 2-3.
Despois de perder na Copa da Raíña ante o Granada CF, o equipo adestrado por Miguel Llorente volve a acumular boas sensacións e resultados. Tras disputar a novena xornada, as coruñesas son segundas con 22 puntos, a dous do Levante Las Planas.
Remontada branquiazul
As herculinas chegaban ao Wanda para enfrontarse a un conxuto xove e dinámico. Nos primeiros minutos, Ainhoa iniciou unha xogada creando perigo na área madrileña, servídolle o esférico a Laura, quen porén se atopou na portería coa man de Alba.
Malia o bo ritmo en ataque, o primeiro gol foi das locales, nunha acción na que Alba Zafra foi quen de superar a Ana Valles. A xogadora do filial do Atlético de Madrid aproveitou un balón morto para adiantar ao seu equipo.
O Dépor ABANCA non se quedaba atrás en ocasións, e respondeu na seguinte xogada cun tanto de Laura, quen aproveitou un pase ao espazo de Paula para entrar na área e cun disparo cruzado abrir a lata branquiazul. A base de insistencia chegaría o segundo gol galego, obra de Paula, quen non dubidou desde os 30 metros, anotando o 1-2 co que se chegaría ao descanso.
Na segunda metade, de novo Laura tivo ocasión de aumentar a renda coruñesa, pero unha acertada Alba baixo paus impediu o gol. O terceiro tanto das visitantes, que afianzaría a vitoria herculina fíxose esperar.
Despois de varios intentos de María Ruiz e Laura, finalmente sería Ainhoa Marín quen poría o terceiro do Dépor ABANCA no electrónico, despois dun saque rápido de Inés ao espazo. Con todo, o equipo de Llorente non se puido relaxar na vitoria, xa que minutos despois e pouco antes da finalización do partido, un erro en defensa puxo o 2-3 no marcador. Faltaban dous minutos para o pitido final cando un disparo de Cristin Rincón deu en Cris Martínez para subir ao taboleiro madrileño.
O susto quedou aí para as galegas, que finalmente se levaron os tres puntos da vitoria de volta a casa.
FICHA TÉCNICA
ATLÉTICO DE MADRID B: Alba, Sara (Mirian Valladolid, min. 60), Yolanda Sierra, Alba Zafra, Claudia (Laura Aguado, min. 85), Isabel Pala (Ángela Gamero, min. 85), Reyes Moreno (Alba Dargel, min. 80), Laura Teruel, Laura Tanarro, Alexia e Laura Cuadrado (Cristina Rincón, min. 60).
DÉPOR ABANCA: Ana Valles, Cris Martínez, Raquel García, Inés Altamira, Andrea Sierra (Goretti, min. 65), Carlota Sánchez, Paula Gutiérrez, Ainhoa Marín, María Ruiz, Laura Fernández (Adule, min. 86) e Ale Serrano (Jone Ibáñez, min. 69).
GOLES: 1-0 Alba Zafra (min. 8); 1-1 Laura Fernández (min. 10); 1-2 Paula Gutiérrez (min. 36); 1-3 Ainhoa Marín (min. 84); 2-3 Cris Martínez -pp- (min. 88)
ARBITRAXE: Contreras Patiño (colexio madrileño). Amonestou a Inés Altamira (min. 31), Isabel Pala (min. 57), Ale Serrano (min. 62) e Laura Teruel (min. 64)
INCIDENCIAS: Partido correspondente á novena xornada da Reto Iberdrola disputado no campo 2 do Centro Deportivo Wanda de Alcalá de Henares.
