Paso a paso, partido a partido, pero cada día máis preto do obxectivo. O Dépor ABANCA sumou de tres en Lezama onde se impuxo ao Athletic Club B pola mínima (0-1) cun gol de Millene.
🔚 El filial cae por la mínima en Lezama en la 24ª jornada de la Primera @FutFemRFEF
Ezin izan dute punturik lortu gure harrobiko neskek.#AthleticClubFem B 0⃣-1⃣@RCDeportivoFem#AthleticBDépor #AthleticLezama 🦁 pic.twitter.com/f2Duz1sEeS
— Athletic Club (@AthleticClubFem) April 13, 2024
As Nosas deportivistas están hoxe un pouco máis preto da elite. Un chanzo menos que subir para regresar ao máis alto do futfem estatal.
Con todo, o triunfo ante as bilbaínas custou. Non quedan rivales doados. Ninguén regala nada nesta Primera Federación, tampouco os de abaixo. O Athletic Club B, penúltimo e xa descendido, non foi un contrincante ao que as branquiazuis conseguiran dobregar con facilidade. De feito, nalgunhas etapas do encontro revolvéronse.
Vamoooooooos! 💙💙
🚂 #Deportivistas esperámosvos a TODOS o domingo en #ABANCARIAZOR
💙 #SentímoloNoCorazón pic.twitter.com/qwL5KH1o6S
— Dépor ABANCA (@RCDeportivoFem) April 13, 2024
Pero a meta, os tres puntos no peto para regresar á Coruña, conseguiuse. Anotaba Millene no minuto 66 un gol que serviu para que as galegas do Dépor ABANCA avancen no obxectivo final: o ascenso.
Tras a disputa da xornada 24 o Dépor ABANCA conta con 52 puntos, os mesmos que o Barça B que é líder pero que non pode ascender por ser filial dun club que xa milita na categoría superior.
O ascenso directo está en xogo entre as deportivistas e o RCD Espanyol de Barcelona. As catalás son terceiras con 48 puntos. Tampouco fallaron nesta xornada. Se o Dépor ABANCA xogaba coas penúltimas elas fixéronono coas últimas (tamén descendidas. As pericas endosaron un 5-0 ao Madrid CFF B.
O Dépor ABANCA depende de si mesmo para ascender
Matematicamente o retorno á máxima categoría podería ser posible para as herculinas a vindeira xornada. E as galegas dependen delas mesmas.
Quedan dous partidos e as branquiazuis avantaxan ás súas rivais en 4 puntos. O partido da xornada 25 é contra o Cacereño Femenino (9º clasificado) e vaise xogar o vindeiro domingo 21 de abril no Estadio ABANCA Riazor. con horario unificado ás 12:00 horas.
Soñar coa festa antes de tempo sabe o deportivismo que non é bo “que cha quitan dos fuciños”, pero e se si? E se desta vai e o ascenso desde a Primera Federación á Primera División vívese no Estadio ABANCA Riazor? O xogo das nosas merece verse no templo do deportivismo, polo que con ascenso ou non como colofón final, o encontro semella que paga a pena ser vivido ao vivo (tamén se poderá seguir pola canle de YouTube do RC Deportivo)
Hai unhas semanas o Dépor ABANCA xogaba no mesmo escenario e lograba xuntar 7.527 persoas animando desde as bancadas. O partido, ante o CE Europa remataba con táboas. O tepe de Riazor garda unha vez máis ás Nosas que confían en volver congregar a un número importante de deportivistas nas bancadas.
O conxunto que adestra Irene Ferreras depende de si mesmo para subir. Quedan dúas xornadas. Serán dúas finais, por que tal e como se viu co Athletic Club B ninguén vai regalar nada.
As Nosas regresan ao traballo mañá luns 15 de abril en Abegondo con sesión de ximnasio ás 9:15 para logo pasar ao verde a partir das 10:00, segundo informa o club coruñés.
🔋 #AsNosas descansan mañá domingo e volven a #Abegondo o luns
🔗 https://t.co/lBVitotOTX pic.twitter.com/wQVV9OAgvd
— Dépor ABANCA (@RCDeportivoFem) April 13, 2024
FICHA TÉCNICA
0) ATHLETIC CLUB B: Astralaga, Amaia, Bengoa, Laida, Nerea, Claudia Fernández, Iribarren, Irati Martín, Oihane San Martín, Thais e Uranga.
1) RC DEPORTIVO ABANCA: Lucía, Samara (Lucía Rivas, min. 70), Inés Altamira, Raquel García, Clara (Elena, min. 46), Henar, Paula Gutiérrez, Ainhoa Marín (Lucía Martínez, min. 85), Eva Dios, Charle (Ana de Teresa, min. 46) e Millene.
GOL: 0-1 Millene (min. 66).
EQUIPO ARBITRAL: Coral Couso Cadrado (colexio catalán).
INCIDENCIAS: Partido correspondente á 24ª xornada de liga na Primera Federación Iberdrola disputado no campo 8 das Instalacións Deportivas de Lezama.
