O Rayo Vallecano puido cun loitador Dépor ABANCA que empezou perdendo, empatou e conseguiu dominar, pero na segunda metade sucumbiu ao empuxe local por 3-1, pese a non deixar de intentar ver porta até o final do partido.
Non terán nin tempo para asimilar esta nova derrota, as futbolistas que prepara o técnico gaqlego Manu Sánchez, que axiña deberán pensar xa no seguinte cruce que lle espera esta mesma semana. O encontro será na Cidade Deportiva de Abegondo, o vindeiro mércores 3 de marzo ás 18:30 horas. Visita a cancha coruñesa o equipo do Sporting Huelva. No partido haberá preto de 150 seareiras nas bancadas. O RC Deportivo habilituou un sistema para solicitar invitación ás persoas socias da entidade.
Recuperar un partido atrasado sempre é unha ocasión para recurtar distancias cos rivais que tes por diante. Pero o conxunto deportivista non puido sacarlle ese rendemento á súa visita ao campo número catro da Ciudad Deportiva Fundación Rayo Vallecano. Ao contrario, perdeu unha oportunidade de sacar a cabeza.
Patri López foi a encargada de suplir no lateral dereito a Noelia Villegas (sancionada por ver cartón vermello no partido anterior). Saíu tamén de inicio Michelle Romero para ocupar o posto de Lady Andrade, convalecente da contusión que recibía tamén encontro previo.
Precisamente a primeira chegada con perigo das galegas sería un envío de Michelle Romero a Peke que a goleadora rematou por encima da portaría defendida por Larqué.
O Rayo marca primeiro pero As Nosas reaccionan
O marcador abrírono as futbolistas do Rayo Vallecano aos 26 minutos de xogo. Paula Fernández anotaba a balón parado colando o esférico pola escuadra, polo que pouco puido facer Sullastres ante o disparo da xogadora local.
Unha vez máis, as galegas non se viñeron a baixo e buscaron a reacción axiña. De feito estivo a piques de marcar Michelle Romero aos poucos minutos. Con todo, o empate das branquiazuis prodúxose no minuto 37 de partido froito dun roubo de balón que lle chegou a Gaby. A venezolana anotaba o 1-1 co que se chegaría ao descanso. O tanto fixo xustiza ao acontecido no campo xa que as galegas estaban dominando o xogo e atacando a meta local para buscar esa igualada no marcador.
O paso por vestiarios serviulle ao Rayo Vallecano para ter claro que non podía deixar xogar ao Dépor tan cómodo e que o partido non se lle podía escapar. O acoso á meta de Esther Sullastres non tardou en chegar. E, aínda que a porteira deportivista salvou ocasións das locais, o tanto rematou por chegar. No minuto 54 de xogo Bulatovic remataba de cabeza un envío de Tere desde o lado dereito do ataque do Rayo e anotaba o 2-1.
Seguiu o RC Deportivo buscando repetir o guion da primeira metade e acadar o empate, pero aconteceu xusto o contrario. Chegou o terceiro das deportistas do equipo de Vallecas. No 77 marcaba Sheila un gol que colocaba no marcador no definitivo resultado de 3-1 para as futbolistas do conxunto local.
FICHA TÉCNICA
3) RAYO VALLECANO FEMININO: Larqué, Pilar García, Paula Fernández, Tere (Patri Hidalgo, min. 82), Sheila (Yasmine, min.. 82), Bulatovic, Auñón, Elena (Isadora, min. 74), Aedo (Zaira, min. 74), Sáez (Andújar, min. 12) e Struck.
1) DÉPOR ABANCA: Sullastres, Cris, Iris, Blanco, Patri López (Helena, min. 77), Ainoa, Alba (María Figueroa, min. 85), Gaby, Michelle (Eva Dios, min. 71), Athenea e Peke.
GOLES: 1-0 Paula Fernández (min. 26); 1-1 Gaby (min. 37); 2-1 Bulatovic (min. 54); 3-1 Sheila (min. 77)
ÁRBITRA: Cebollada López (c. Valenciano). Amonestou con cartón amarelo a Aedo (min. 62)
INCIDENCIAS: Partido aprazado correspondente á xornada 7º da Primera Iberdrola de fútbol celebrado no campo 4 da Ciudad Deportiva Fundación Rayo Vallecano. O partido disputouse a porta pechada.
Abegondo volve abrir as súas portas para ver As Nosas aínda que só a 150 persoas
