Consúmense as xornadas e o Dépor ABANCA segue sen sumar. O conxunto branquiazul caía goleado esta xornada co Levante UD por un tanteo de 4-1. Nin sequera ter recuperado Cris serviu ás de Manu Sánchez para acadar un mellor resultado.
Os goles recibidos no arranque do partido marcaron o encontro. O tanto que inauguraba o marcador anotábase no minuto 3. Era a primeira chegada do Levante á meta deportivista defendida por Noelia Bermúdez. Foi chegar e encher. Carol anotaba para as locais o 1-0.
Case se tempo a asumir que xa ían por detras no marcador, as galegas recibían outro golpe. No minuto 9 de partido chegaba o 2-0. Natasa Andonova enviaba unha vaselina cara a portería do Dépor ABANCA superando á gardameta branquiazul Noelia Bermúdez.
Non se rendiron as deportivistas que tiveron ocasións por medio dun tiro lonxano de Athenea del Castillo e unha aproximación perigosa de Michelle.
Irene Guerrero anotaba o terceiro para as granotas no minuto 31. O Dépor ABANCA tiña como reto remontar un 3-0 a domicilio. Intentárono por medio de Gaby e de Blanco, pero as incursións herculinas non tiñan éxito.
Logo do descanso, o escenario non mudou moito no que atinxe a ocasións. As galegas querían pero non podían e o Levante UD facía da efectividade a súa razón de ser. O 4-0 chegou no minuto 65 por medio de Aldana Cometti. A xogada xurde dun saque desde o curruncho que remataba a futbolista local. Esa mesma xogadora frustrou ocasións de Gaby e de Athenea.
Alba Redondo desaproveitou un penalti de Noe Bermúdez, que foi amonestada. A execución da futbolista do Levante UD foise alta desperdiciando una pena máxima coa que podería ter posto no marcador un rotundo 5-0.
Ainoa marcou o gol da honra
O gol da honra o marcaría para as deportivistas Ainoa Campo no minuto 83. O resultado 4-1 sume ao RC Deportivo ABANCA na súa peor racha competitiva.
Non é a primeira vez que nesta tempada o primeiro equipo feminino do Dépor sae goleado por unha diferencia de tres goles. Pasoulle xustamente no partido previo, contra o Real Madrid, no que perdeu por 3-0.
As Nosas deportivistas regresan a Riazor contra o Atlético de Madrid
Manu Sánchez citou de novo as futbolistas para adestrar o martes 17 de novembro ás 17:30 horas en Abegondo para arrancar a semana de preparación. A seguinte cita na Liga Primera Iberdrola será recibindo a visita do Atlético de Madrid Femenino. O encontro está fixado para o domingo 22 de novembro ás 16:15 horas no Estadio Municipal ABANCA-RIAZOR.
As colchoneras non parecen o mellor dos rivais para que as galegas rematen coa mala racha de resultados que atesoran. As madrileñas son sempre aspirantes a todo. Neste momento da tempada 2020 – 2021 ocupan a terceira posición, é dicir, están en postos de Champions League con 14 puntos acadados, so un menos que o FB Barcelona. Dos sete partidos que levan disputados, gañaron catro, empataron dous e perderon so un. No lado contrario da balanza está o Dépor ABANCA, faroliño vermello con sete partidos perdidos de sete disputados eunha diferencia de goles de -12.
Con estos números sobre a mesa, é obvio que gañar ao Atlético de Madrid o domingo en Riazor – ABANCA sería unha auténtica xesta, pero nada hai imposible e a necesidade agudiza o inxenio.
FICHA TÉCNICA
LEVANTE UD: María López, María Méndez, Irene, Andonova (Lucía, min. 63), Zornoza, Carol (Fiamma, min. 76), Jucinara, Alharilla, Eva Navarro (Alba Redondo, min. 63), Esther (Lloris, min. 87) e Cometti (Paula Tomás, min. 87).
RC DEPORTIVO ABANCA: Noe Bermúdez, Cris Martínez, Bedoya (Iris, min. 73), Ainoa, Blanco, Patri López, Alba (Lía, min. 84), Arbeláez, Gaby, Michelle (Helena, min. 65) e Athenea (Kika, min. 84).
GOLES: 1-0 Carol (min. 3); 2-0 Andonova (min. 9); 3-0 Irene (min. 31); 4-0 Cometti (min. 65); 4-1 Ainoa (min. 83).
ÁRBITRA: Espinosa Ríos (c. madrileño). Amonestou a Blanco (min. 37), Athenea (min. 47), Cometti (min. 73), Noe Bermúdez (min. 79) e Lloris (min. 92).
INCIDENCIAS: Partido correspondente á oitaba xornada da competición na Primera Iberdrola. O encontro disputouse a porta pechada no Campo Héctor Roda da Ciudad Deportiva de Buñol, por mor das restricións que están a ter as competicións deportivas na pandemia de COVID-19 na que se atopa España. Neste partido As Nosas deportivistas estrearon a terceira equipación desta tempada.
