O Dépor ABANCA volve a casa e intentará sumar os tres puntos ante o Valencia CF, na 27ª xornada. O partido terá lugar o domingo, 25 de abril, ás 12:00 horas.
Esta será unha gran oportunidade para as de Manu Sánchez de retomar as boas sensacións previas ao parón da Liga Iberdrola e vencer para seguir na loita pola permanencia.
O panorama complicouse na última xornada, cun contundente 9-0 en contra na visita ao Barcelona, pero, segundo declara o adestrador das coruñesas, os ánimos no equipo non decaeron.
Manu Sánchez: “O equipo está comprometido coa situación e o obxectivo”
Actualmente, as branquiazuis ocupan a última posición, con 17 puntos obtidos en cinco partidos gañados e dous empates. A liña de salvación a marca o RCD Espanyol, con 23 puntos, seis máis que as galegas.
O fortín de Abegondo
Como punto a favor nesta fin de semana para o Dépor ABANCA está o factor Abegondo. Non só as deportivistas xogan mellor como locais e suman máis puntos, senón que o seu rival é peor se compite como visitante. Así que temos os ingredientes para unha ‘tormenta perfecta’.
O Valencia non é quen de engadir ao seu casilleiro tres puntos a domicilio desde outubro, cando venceu por un 1-2 ao Sporting de Huelva. Desde entón acumula cinco empates e sete derrotas.
Atendendo a unha clasificación na que só contasen os partidos como visitante, as valencianas serían, con 12 duelso disputados, 15ª, un posto por riba do Dépor ABANCA como local, que sería 16º, con 13 encontros xogados.
Na primeira volta, a vitoria foi para as valencianas, cun 3-0 ao seu favor. Agora chegan a Abegondo tamén dunha vitoria, tras impoñerse ante o Madrid CFF cun 2-0.
O plantel do Dépor ABANCA (case) ao completo
Ademais, a diferenza da convocatoria ante o Barça, Manu Sánchez disporá dun número máis amplo de xogadoras para este partido.
Gaby, Alba Merino, Ainoa e Athenea volven ás filas do primeiro equipo. A primeira delas sufriu unha lesión a principios de abril no tríceps sural, e non puido competir desde entón. Para este domingo, Gaby xa está recuperada e retomou o contacto nas sesións de adestramento, polo que está lista para xogar ás ordes de Manu Sánchez.
Pola súa parte, tanto Alba Merino como Ainoa Campo cumpriron na xornada contra o Barcelona a sanción imposta e poderán volver ao céspede. De igual forma, Athenea del Castillo volta á lista tras non viaxar a terras catalás por precaución.
A convocatoria complétase coas canteiranas Jessica, Eva Dios, Tati, Carlota, Patri López e María Figueroa.
Esta é a lista completa de xogadoras convocadas no Dépor ABANCA:
- Sullastres
- Villegas
- Blanco
- Iris Arnaiz
- Michelle
- Athenea
- Alba
- Gaby
- Helena
- Bedoya
- Lady
- Peke
- Ainoa
- Cris Martínez
- Carlota
- Jessi
- Patri López
- Eva Dios
- María Figueroa
- Tati
