O Dépor volve a xogar a competición doméstica tras pasar a cuartos de final da Copa da Raíña o pasado martes, nun partido histórico fronte o Valencia en Riazor. O Dépor ABANCA quere trasladar esa alegría á Liga e desprázase este sábado 15 de febreiro por estrada á primeira hora da mañá cara Madrid para visitar ao Rayo Vallecano.
O duelo xogarase o vindeiro domingo 16 de febreiro (18:30 horas, Ciudad Deportiva do Rayo Vallecano) correspondente á 20ª xornada na Primeira Iberdrola. Pola tarde do sábado, ás 18:30, o equipo galego adestrarase na Cidade Deportiva do Real Madrid en Valdebebas, na última sesión previa ao choque ante as vallecanas.
O conxunto deportivista buscará recuperar sensacións en Liga, tras acumular dúas derrotas seguidas. A primeira, despois da súa visita ao Tenerife Granadilla (5-3) e a segunda, cando caeu a pasada xornada en Abegondo fronte o Athletic Club (0-2). O que foi a primeira derrota na casa no que vai de tempada.
O Rayo Vallecano tampouco chega no seu mellor momento, tras acumular tres derrotas seguidas na competición doméstica e caer eliminadas o pasado martes fronte o Tacón na Copa da Raíña.
O técnico deportivista concedeu o pasado mércores de descanso ás súas xogadoras tras o pase a cuartos de final da Copa da Raíña o martes en Riazor. As branquiazuis comezaron a preparar o partido contra o Rayo Vallecano o pasado xoves en Abegondo. Deste xeito, serán tres as sesións que as herculinas fagan en territorio galego antes de partir cara a capital.
Xoves 13 de febreiro
17:00: Adestramento en Abegondo
Venres 14 de febreiro
17:00: Adestramento en Abegondo
Sábado 15 de febreiro
9:00: Saída en autocar a Madrid e comida en roteiro
16:30 (horario aproximado): Chegada ao hotel AC Coslada
18:30: Adestramento na Cidade Deportiva do Real Madrid en Valdebebas
Domingo 16 de febreiro
18:30: Rayo Vallecano – Deportivo ABANCA, na Cidade Deportiva do Rayo Vallecano
Ao concluír, regreso en autocar á Coruña
Tras o partido, o regreso á Coruña do Deportivo ABANCA será tamén por estrada nada máis concluír o encontro ante o Rayo Vallecano.
Ao Dépor tocoulle o coco na Copa da Raíña
O FC Barcelona será o rival do Deportivo ABANCA nos cuartos de final da Copa da Raíña, a partido único. O choque xogarase o martes 25 ou o mércores 26 de febreiro, en hora por designar, no Estadi Johan Cruyff da cidade condal.
Ambos os equipos víronse as caras en liga o pasado 24 de novembro, no feudo azulgrana, nun partido no que a pesar de que as branquiazuis deron a cara en todo momento resolveuse con vitoria do incontestable líder da Primeira Iberdrola (6-1), que só cedeu 2 empates nas primeiras 18 xornadas do campionato.
Así quedaron o resto de emparellamentos de cuartos de final do torneo do K.O.:
Athletic Club – CD Tacón
FC Barcelona – Deportivo ABANCA
Madrid CFF – Sevilla FC
EDF Logroño – Real Betis
