O Dépor ABANCA está tocado, pero lonxe de estar afundido. Quedan balas na recámara para salvar a Liga Iberdrola, pero para conseguir este obxectivo esta semana preséntase como vital. Este mércores, 10 de febreiro, as herculinas reciben ás 16:30 horas en Abegondo á SD Eibar.
Aínda quedan 14 xornadas por disputar, máis a recuperación dalgunha adiada, e as branquiazuis seguen colistas pero coas tranquilizadoras e motivantes sensacións que deixa ser quen de vencer a outro equipo.
Na última cita que disputaron as de Manu Sánchez as futbolistas reencontraronse co gol e co trunfo visitando en Badaxoz ao CD Civitas Santa Teresa. Tres puntos que saben a gloria pola vitoria e por ser ante un rival directo nesta disputada loita por aferrarse á máxima categoría do fútbol español.
Na cita deste mércores, as branquiazuis reciben a un rival máis lonxano na clasificación, pero que comparte a mesma meta.
A convocatoria de Manu Sánchez está conformada polas seguintes xogadoras: Esther, Sullastres, Noelia Villegas, Blanco, Iris Arnaiz, Michelle, Athenea del Castillo, Alba Merino, Kika, Gaby, Noe Bermúdez, Helena, Bedoya, Lady Andrade, Peke, Ainoa Campo, Cris Martínez, Carlota, Patri López, Eva Dios e María Figueroa.
O Dépor ABANCA logrou a súa primeira vitoria ante o Eibar
Dépor ABANCA e SD Eibar mediron xa forzas na primeira volta, cun resultado moi favorecedor para as deportivistas. Este partido da décima xornada foi a primeira vez esta tempada que as de Sánchez coñecían a vitoria.
Repetir o bo xogo e dar outra vez coas claves para vencer ás armeras faise moi necesario. Esta semana pode marcar un antes e un despois no futuro do equipo branquiazul.
Fronte á moral alta coa que chega o Dépor ABANCA, as vascas non puntuan desde a fin de semana do 23 de xaneiro. Nos últimos catro partidos, o Eibar sumou un empate ante a Real Sociedad, non puido xogar ante o Tenerife e perdeu ante Atlético de Madrid e Sevilla.
Esta situación, xunto o factor de xogar en casa, pon o partido de maneira favorable para as coruñesas. A salvación está a tres puntos, ou unha vitoria, de distancia e as acadadas ante rivais directos sempre valen dobre.
Outro reto na fin de semana
Catro días despois deste duelo, o domingo 14, as deportivistas teñen outra cita marcada no calendario. É a recuperación do partido ante o Real Betis, adiado o pasado 10 de xaneiro.
As andaluzas tamén están posicionadas na zona baixa da clasificación, actualmente empatadas a puntos coas galegas. O vencedor deste partido dará un paso importantísimo cara a permanencia.
Na escuadra verdibranca milita a galega Mari Paz Vilas que o ano pasado pisaba Riazor no partido de Copa da Raíña no que o Dépor ABANCA se impuxo ao Valencia, conxunto no que daquela xogaba a arousá.
Mari Paz Vilas: “Xogar en Riazor foi un soño feito realidade”
