A xogadoras do Dépor ABANCA saltaron á cancha do Estadio de Matapiñoneras vestidas coa equipación verde pero o seu fútbol non as fixo pasar inadvertidas sobre o tepe. No seu enfrontamento co Madrid CFF as herculinas amosaron carácter e capacidade para repoñerse. Ata dúas veces estiveron por debaixo no marcador, pero foron quen de erguerse e seguir loitando por puntuar ata que, finalmente, asinaron un valioso empate.
Falaba Manu Sánchez na previa da importancia no cambio de superficie para este partido. Para este compromiso único cambio que aplicou o adestrador galego foi o regreso á titularidade de Athenea en substitución de Michelle Romero.
O arraque do choque foi moi vivo con chegadas ás dúas porterías. Nunha delas, Silvia Rubio era quen de bater a Sullastres. Corría o minuto catro de partido e a cancerbeira das deportivistas xa tivera que sacar oficio nunha ocasión previa. Non baixaron os brazos as coruñesas que tiveron chance nas botas de xogadoras como Athenea, Nuria ou Gaby.
A seis minutos do final do primeiro período Gaby remataba coa testa un balón que puña as táboas no marcador. Así, camiño do descanso, o partido voltaba a estar aberto no que ao resultado se refería.
Di o refrán que dura pouco a ledicia la casa do pobre e nada máis principiar o segundo tempo as branquiazuis recibían outro xarro de auga fría en forma de gol. Alba Mellado foi a autora.
As de Manu Sánchez tiñan outra vez co marcador en contra, outra vez case todo un período por diante para buscar darlle a volta ao resultado. Pero outra vez o fixeron coa seguridade e a certeza de que era posible. E foi. Claro que foi. Botáronse arriba as herculinas á procura do gol. Tere, Athenea e Peke foron as que máis chegada protagonizaron. E a vasca foi que tivo o premio co gol do empate (2-2) no miuto 63. Sendo francos, o Madrid CFF tamén tivo unha boa ocasión cun remate ao traveseiro de Ronsel. Pero non conseguiron gol.
Ao final, reparto de puntos que alarga a racha sen poder gañar do equipo da capital e deixa branquiazuis a un paso do pódio da Liga Iberdrola.
As herculinas xogan a vindeira xornada en Abegondo (sábado 21, ás 13.00) ante unha Real Sociedade que ven en racha de vitorias. O primeiro adestramento para ese cruce será o martes 17 ás 17:00 horas en Abegondo.
FICHA TÉCNICA
MADRID CFF: Poza, Catalá, Turmo, Mari, Laura Fernández (Julia Hernández, min. 74), Mellado, Rubio, Estela, Laura Teruel, Giovana Queiroz (Delie, min. 74) y Yasmin (Reina, min. 66).
DÉPOR ABANCA: Sullastres, Cris, María Méndez, Laura (Villegas, min. 68), Nuria, Alba Merino (Maya, min. 73), Iris, Teresa Abelleira, Gaby, Athenea (Michelle Romero, min. 82) y Peke.
GOLES: 1-0 Silvia Rubio (min. 4); 1-1 Gaby (min. 39); 2-1 Alba Mellado (min. 46); 2-2 Peke (min. 63)
AMONESTACIÓNS: 90′ Yasmi.
COLEXIADAS: Díaz García (colexio Tinerfeño). Partido correspondente a 13ª xornada da Liga Iberdrola disputado no Estadio de Matapiñoneras.
