Aínda que poida semellar recente, cumpríronse dúas tempadas dende que o Dépor ABANCA regresou ao lugar do que nunca debeu saír: a máxima categoría do futbol estatal. Permanecerá para sempre gravado na retina dos 14.000 afeccionados que arrouparon As Nosas deportivistas en Riazor aquel día no que o cadro coruñés selou o seu regreso á elite do futfem, vencendo ao Cacereño Feminino por 3-1.
Aquela tarde bateuse un récord de asistencia a un partido do Dépor ABANCA, congregando a 14.057 espectadores nas bancadas. O emblemático estadio coruñés foi testemuña dos dous tantos de Millene Cabral e dun de Ainhoa Marín, que devolveron ao equipo, aínda dirixido por Irene Ferreras (hoxe adestradora do Granada CF), á Liga F despois de tres anos de intentos frustrados.
Retorno complexo á Liga F
A tempada 24/25, a primeira tras o regreso do equipo á máxima categoría, resultou realmente complicada. O conxunto herculino, que, por azar, se estreou nada menos que contra o titán do fútbol feminino, o FC Barcelona, notou o gran salto de nivel existente entre a Primeira Federación e a Liga F, navegando polos postos de descenso durante boa parte do curso.
Pese a todo, e cun cambio de adestrador no transcurso da tempada (Irene Ferreras foi substituída por Fran Alonso), o equipo competiu, resistiu e acabou asegurando a permanencia. Foi no encontro diante do Sevilla FC, na xornada 29; o cadro andaluz adiantouse no marcador no minuto 90, pero pouco despois un gol da estadounidense Elyse Bennett (agora xogadora do Orlando Pride) salvou de maneira matemática ás galegas, pois o empate xa lles era suficiente para garantir a continuidade na elite.
Un inicio 25/26 por debaixo das expectativas
Eran moitas as expectativas que se tiñan depositadas no cadro herculino ao inicio do curso 2025-26. Cun mercado de verán que traía varias caras novas e aseguraba a continuidade dalgunhas pezas clave do equipo, a afección agardaba un salto de nivel no xogo do Dépor ABANCA.
Moi sonadas foron as renovacións de contrato das dúas estrelas do equipo, Millene Cabral e Ainhoa Marín, e con gran entusiasmo viviu tamén a afección a fichaxe de Olaya Rodríguez, ata o momento cedida polo Real Madrid, así como as incorporacións de Merle Barth, Sara Extremera, Espe Pizarro e Colette Cavanagh, que reforzaban notablemente o plantel das blanquiazuis.
Especialmente aplaudidas foron tamén as continuidades da gardameta Inês Pereira, un ano máis en calidade de cedida polo Everton FC, e da defensa Marina Artero, tamén en préstamo polo Athletic Cub. A isto sumouse a sorpresa da chegada de Marisa García, outra cesión do Real Madrid, na que se teñen depositadas grandes expectativas debido á calidade e ao crecemento que amosou nos últimos anos.
Ademais, consolidáronse no primeiro equipo varias xogadoras da canteira, como Elena Vázquez, Paula Novo, Monteagudo e Redru.
En canto ás baixas, deixaron o plantel do Dépor ABANCA Pancha Lara, Elyse Bennett, Blessing Nkor, Hmírová e ADT, mentres que a capitá Cris Martínez, causou baixa por maternidade.
O porvir do conxunto coruñés semellaba ilusionante, e entre os deportivistas incluso se fantaseaba con que o equipo fora quen de asentarse nos postos medios da táboa clasificatoria ou, quen sabe, dar a sorpresa, como xa ocorrera na tempada 19/20 (a primeira na máxima categoría), cando as blanquiazuis, daquela dirixidas por Manu Sánchez, acadaron a cuarta praza no seu debut na entón chamada Liga Iberdrola.
Porén, a evolución do equipo non respondeu ás expectativas iniciais. No comezo da tempada, o cadro deportivista amosaba certos indicios de mellora, pero non lograba consolidarse nin definir un estilo de xogo plenamente recoñecible. A primeira aparición no presente curso produciuse ante o FC Badalona Women, conxunto que concluíra a campaña anterior na 13ª posición e que, sobre o papel, semellaba un rival accesible; non obstante, o Dépor tivo que conformarse cun empate sen goles.
A situación repetiríase na segunda xornada, fronte ao RCD Espanyol, cun discreto 1-1. Non foi ata a terceira cita ligueira cando o Dépor ABANCA deu un paso adiante e superou ao Athletic Club por 1-0, sumando tres puntos que devolveron a ilusión ao vestiario.
O Dépor ABANCA soumou sete partidos sen gañar
Por desgraza, a alegría sería efémera. Nas sete xornadas posteriores, as galegas encadearon sete partidos sen coñecer a vitoria, acumulando cinco derrotas e dous empates, (a excepción do partido de Copa da Raíña, no que se impuxeron ao Guiniguada por 1-3), unha mala racha que colocaba de novo equipo nas proximidades dos postos de descenso.
Con todo, a reacción non se fixo agardar. As xogadoras dirixidas por Fran Alonso souberon sobrepoñerse ás dificultades e, no seu último encontro, acadaron un valioso triunfo ante o Levante UD, no estadio de Riazor, por 1-0.
Mañá, ás 12:00 horas, o Dépor ABANCA visitará ao Sevilla FC, actualmente sétimo clasificado cun total de 17 puntos, sete máis que o cadro galego, que deberá medirse tamén ao Granada CF o vindeiro 6 de decembro e á Real Sociedad, tanto en liga, o día 14 de decembro, como en Copa da Raíña, o día 21, antes do parón de Nadal.
