O Dépor ABANCA chegaba o pasado martes ás Palmas de Gran Canaria para iniciar na tarde de hoxe, mércores 5 de novembro, a súa andaina copera ante o CD Guiniguada Apolinario. No encontro da Copa da Raíña, que se disputará ás 20:00 horas no Estadio Parque Atlántico, o cadro herculino tratará de recuperar a confianza despois dun arranque ligueiro por debaixo das expectativas.
O cadro dirixido por Fran Alonso, enfróntase na Copa da Raíña a un rival da Segunda Federación, o que posiciona ao conxunto galego como claro favorito para facerse coa vitoria nesta primeira rolda da competición. Un bo resultado serviría ás galegas para recuperarse das malas sensacións que veñen arrastrando nos últimos partidos na máxima categoría do futfem estatal.
O propio técnico deportivista admitía, en declaracións aos medios, sentirse “decepcionado” pola escaseza de puntos sumados no que vai de curso, o que as posterga a unha amarga 13ª posición da táboa na Liga F Moeve. Con todo, Fran Alonso manifestaba a súa plena confianza no equipo e na súa capacidade de traballo. Unha fortaleza que, a estas alturas da tempada, aínda pode inverter a dinámica das blanquiazuis e posibilitar o ascenso de postos na clasificación.
Por máis que o Dépor ABANCA milite nunha categoría superior, cómpre non subestimar a un rival que ocupa o terceiro posto na súa categoría e ter en conta que o cadro herculino debe adaptar o seu xogo ao céspede artificial. Esta última circunstancia supón un desafío para un equipo habituado a xogar en herba natural. E por outro lado, na Copa da Raíña calquera pode dar a sorpresa.
Rival de envergadura na Liga F
Días intensos para o Dépor ABANCA, que disputará dous encontros na mesma semana. Tras enfrontarse ao CD Guiniguada Apolinario, o conxunto deportivista terá que medir as súas forzas na Liga F Moeve contra un dos rivais máis difíciles do panorama futbolístico actual, o FC Barcelona, un partido que se celebrará o vindeiro domingo ás 12:00 horas no Estadi Johan Cruyff.
Unha xornada ligueira que se presenta realmente complicada para o cadro galego, que no pasado curso perdeu os dous encontros que xogou contra as catalanas.
As culés, veñen de coñecer a derrota por primeira vez na tempada contra a Real Sociedad, nun partido no que a plantilla corta, as baixas e a acumulación de minutos de algunhas xogadoras despois das datas FIFA, lle pasaron factura. Despois do revés do Barcelona, o Dépor ABANCA debe demostrar que se pode plantar cara ao equipo considerado, por moitos, como o mellor do mundo, e loitar pola vitoria.
PRÓXIMOS PARTIDOS DO DÉPOR ABANCA NA LIGA F MOEVE
- FC BARCELONA – DÉPOR ABANCA – Domingo 9/11 ás 12:00 h.
- DÉPOR ABANCA – LEVANTE UD – Venres 14/11 ás 19:30 h.
- SEVILLA – DÉPOR ABANCA – Sábado 22/11 ás 12:00 h.
- DÉPOR ABANCA – GRANADA CF – Domingo 7/12 ás 17:00 h.
- REAL SOCIEDAD – DÉPOR ABANCA – Domingo 14/12 ás 17 h.
