Máis dunha hora durou a ledicia na casa das Nosas contra un correoso rival, o UD Costa Adeje Tenerife, quinto na táboa da Liga F con 25 puntos, nun 2026 que as branquiazuis estrean cun punto que sabe a pouco. O Dépor ABANCA adiantouse no electrónico grazas á eficiencia da número 10, Millene Cabral, que mandou ao fondo das mallas e tras unha magnífica asistencia de Ainhoa Marín a primeira que tivo e con tan só 11 minutos de encontro desputados. Berraba o seu nome un ABANCA Riazor que nesta mañá por veces chuviosa presentou unha asistencia de 589 espectadores.
Foron superiores as de Fran Alonso, cun esquema ordeado no que entraron Elena e Espe Pizarro como principais novidades respecto ao derradeiro encontro da competición doméstica desputado, o da xornada 14 versus a Real Sociedad en Zubieta. Plantexou un esquema de 4-3-3 con Inês Pereira; Samara, Raquel, Elena e Vera; Lucía M., Paula e Olaya e Ainhoa, Millene e Espe Pizarro.
O Dépor ABANCA pecha a primeira volta así con 14 puntos e décimo terceiro na clasificación fagan o que fagan os seus rivais e cunhas boas sensacións tras ser superior a un rival de moita entidade como o son as tinerfeñas.
Dominaron As Nosas gran parte do encontro, nun primeiro tempo sólido tanto a nivel táctico como físico ante un UD Costa Adeje Tenerife que non tivo problemas en cederlles a posesión do esférico. Partiron cun esquema de 4-4-2 con Nay Cáceres en portería, defensa con Zaremba, Cintia, Verges e Patricia Gavira; Claudia Blanco, Sandra Castello, Natalia Ramos e Paola Hernández no medio do campo e Gramaglia e Ouzraoui Diki como xogadores máis adiantadas na punta de ataque.
As isleñas gozaron dun par de ocasións na primeira parte nuns primeiros 45 minutos nos que o Dépor ABANCA soubo manter a calma e contemporizar o manexo de balón. Mágoa case a finalizar a primeira parte que, tras unha carreira de Millene para desputarlle a pelota a Patricia Gavira, cargando e facendo caer á brasileira que nun feo xesto co ombreiro tivo que marchar do terreo de xogo en padiola. Substituíu á 10 das Nosas deportivistas Lucía Martínez, unha das máis destacadas na segunda metade e moi incisiva pola banda dereita.
Cambios no Dépor ABANCA á volta do descanso
No inicio da segunda metade, Fran Alonso deu saída a Paula Novo en lugar de Samara Ortiz, que tiña un cartón amarelo, e para non favorecer unha segunda amonestación que deixaría en inferioridade ás locais. Espe Pizarro tivo unha clara ocasión de gol ao chisco de asubiar a colexiada o inicio da segunda metade, máis non puido materializala.
Pouco despois, a colexiada do encontro, Ainara Acevedo, tivo que ir ao VAR para consultar unha posible pena máxima a favor do UD Costa Adeje Tenerife que finalmente quedou en nada. Foi un partido tremendamente intenso, no que os servizos médicos tiveron que saltar ao céspede ata en 5 ocasións.
Como comentabamos con anterioridade, tivo un papel destacado Lucía Rivas pola banda dereita, atacando continuamente as costas dunha Clau Blanco que sería decisiva para o seu equipo no minuto 68 e tras revolucionar o encontro Yerai Martínez, adestrador visitante, dándolle entrada a Koko por Paola para ser continuamente un perigo para as branquiazuis. Precisamente das súas botas naceu o empate, que converteu Clau Blanco nun perfecto disparo imposible para a gardamallas portuguesa Inês Pereira.
Redru, Bárbara e Marina Artero correron cara o céspede para substituír a Olaya, Espe e Elena para xogar os case que quince derradeiros minutos e conter a un Tenerife en claro in crescendo.
Ao rematar o encontro, reparto de puntos que fan que o Dépor Abanca durma oito puntos por riba do descenso e conscientes de que, xogando así, van chegar máis alegrías que tristuras.
FICHA TÉCNICA
1) DÉPOR ABANCA: Inês Pereira; Samara Ortiz (Paula Novo, 46′), Raquel García, Elena Vázquez (Marina Artero 79′), Vera Martínez; Lucía Martínez, Paula Gutiérrez, Olaya (Redru, 76′); Ainhoa Marín, Millene Cabral (Lucía Rivas, 45′), Espe Pizarro (Bárbara Latorre, 79′).
1) UD COSTA ADEJE TENERIFE: Nay Cáceres; Zaremba, Cinta, Verges, Patricia Gavira, Claudia Blanco; Sandra Castello, Natalia Ramos, Paola Hernández (Koko, 67′); Gramaglia, Ouzraoui Diki (Mari Jose, 82′).
GOLES: 1-0 Millene Cabral (11 min.) 1-1 Claudia Blanco (68 min).
EQUIPO ARBITRAL: Ainara Andrea Acebedo Dudley (Cataluña). Amonestou a Espe Pizarro, Samara Ortiz e Raquel García por parte do Dépor ABANCA. Tamén viron cartón amarelo Koko e Mari Jose polas visitantes.
INCIDENCIAS: Partido correspondente á xornada 15.ª da LigaF disputado no Estadio Municipal ABANCA – Riazor ante preto de 600 seareiros.
