Non puido rascar máis ca un empate o Dépor ABANCA no seu partido contra o Granada CF. Na primeira metade as galegas pagaron os seus erros con goles. Chegaron a ter o partido 0-2 pero prenderon á mecha no segundo acto e recurtaron distancias ata o empate 2-2. A épica da remontada con vitoria non foi posible. Táboas ante un rival directo co que interesaba poñer terra de por medio aproveitando que o partido se disputaba en Abegondo co alento de “a nosa forza”.
Logo da disputa deste partido Depor ABANCA e Granada CF continúan a estar separados por 1 punto na táboa. As coruñesas quedan pendentes dos resultados da SD Eibar e do Osasuna. En xogo, a orde da táboa para os postos máis ansiados, os que permiten dar un paso adiante cara á seguinte categoría (de xeito directo ou previo paso polo play-off).
As primeiras en chegar á área rival e tirar a porta foron As Nosas deportivistas que adestra Irene Ferreras, pero quen viu antes porta foi o Granada. Un tiro que se foi alto pola dereita desde a frontal asinado por Laura Fernández foi a primeira aproximación branquiazul. Pero o gol que abriría o marcador foi granadino e a balón parado. Naima botaba unha falta cara ao punto de penalti e Lauri adiantarse á saída da gardameta local Lucía para tocar o xusto por encima da porteira berciana e pór o 0-1 no marcador.
Continuaron as galegas tentando chegar pero o partido púxose aínda máis costa arriba nun disparo que pegou nas costas da zaga e ao que Noe chegou antes que Lucía para facer o segundo tanto visitante e obrigar a buscar o máis difícil aínda cunha hora por diante (0-2).
O Dépor ABANCA perdía pero foi quen de marchar cara aos vestiarios con bo sabor de boca froito dun gol no final da primeira metade. Foi un golazo de Millene que enviou un tiro raso cruzado que traspasou a meta rival e deixaba todo aberto para o segundo acto (1-2).
O Dépor ABANCA saltou ao campo na segunda metade a por todas. O seu esforzo so tivo como premio o empate. Foi froito dun gol de Raquel García no minuto 74 (2-2). Antes, un zapatazo de Millene desde a frontal obrigou a lucirse á gardameta visitante para despexar a córner.
A seguinte cita competitiva para o Dépor ABANCA está fixada para o domingo 16 de abril ás 12:00 na Ciudad Deportiva Andrés Iniesta ante o CD Alba Fundación, en partido correspondente á 26ª xornada da Primera Federación a RFEF.
Final do #DéporABANCAGranada, 2-2!
Retransmisión patrocinada por Auga de Parada pic.twitter.com/spxWLrxLjj
— RC Deportivo (@RCDeportivo) April 1, 2023
FICHA TÉCNICA
RC DEPORTIVO ABANCA: Lucía, Cris Martínez (Aroa Guerra, min. 67), Inés Altamira, Raquel García, Monteagudo, Paula Gutiérrez, Henar (Letti, min. 14), Ainhoa Marín (Samara, min. 82), Laura Fernández (Carlota Suárez, min. 82), Charle (Eva Dios, min. 67) e Millene.
GRANADA CF: Sandra, Marta, Alicia, Pamela, Lauri, Alba, Gaste, Macías (Inés, min. 67), Naima, Postigo e Noe (Ángeles, min. 73).
GOLES: 0-1 Lauri (min. 17); 0-2 Noe (min. 31); 1-2 Millene (min. 44); 2-2 Raquel García (min. 74).
EQUIPO ARBITRAL: Fírvida Fernández (c. aragonés). Amoestou a Pamela (min. 21), Charle (min. 52) e Ainhoa Marín (90+5).
INCIDENCIAS: Partido correspondente á 25ª xornada de Primera Federación Iberdrola disputado na Cidade Deportiva de Abegondo ante unhas 400 persoas na bancada.
