A necesidade presiona cada vez máis ao Dépor ABANCA. O conxunto branquiazul empatou esta fin de semana na Cidade Deportiva de Abegondo 1-1 co Valencia CF. As xogadoras que adestra Manu Sánchez viron como dous puntos se lles escapaban do seu feudo. Dous puntos que, a estas alturas da competición, son vitais de cara a manter a categoría.
A fortuna non sorriu ás coruñesas que viron como o Valencia CF empataba un partido no que se tiñan gañado a pulso o trunfo. Unha xogada desgraciada daba ao traste coas aspiracións das galegas que están a ver como cada xornada a permanencia se lles complica máis e máis, por moitos méritos que fagan sobre o tepe.
Un gol de Alba Merino no minuto dous de xogo facía presagiar que a sorte estaría de cara para as coruñesas, pero non. A cántabra Athenea del Castillo internouse polo extremo dereito do ataque deportivista superando por velocidade a Berta Pujadas. O seu centro á área non foi quen de despexalo Kerlly Real e Alba Merino non dubidou para adiantarse e mandar o balón ao fondo das redes defendidas por Enith Salón.
Primeiro cuarto de hora en #Abegondo no #DéporABANCAVCFFem!#TocaVolverseMollar ⚽️ #UnÚnicoLatido 💙 #razónDÉcorazón pic.twitter.com/xzzk6zP3aC
— RC Deportivo (@RCDeportivo) April 25, 2021
Recibir un tanto tan cedo no minguou os folgos das chés. O Valencia CF non baixou os brazos, o Dépor ABANCA tampouco e o partido entrou nunha fase de xogo na que ambas as dúas escuadras buscaban chegadas combinativas. O resultado foi moito centrocampismo e pouco tempo pisando áreas para as unhas e as otras. So o balón parado levaba perigo ás portarías.
Athenea foi a futbolista con máis mordente entre as branquiazuis. Enviu un pase da morte a Ainoa, que rematou desviado; provocou un saque desde o curruncho que a piques estivo de converter en gol de cabeza Gaby (xa recuperada da súa lesión); e unha falta que lle fixeron no lateral do área tamén estivo a un tris de rematar en gol para o Dépor ABANCA. A pegada da cántabra aparecía en todas a ocasións de perigo deportivistas nesta primeira metade.
Descanso en #Abegondo! Ocasións moi claras de Ainoa, por dúas veces, e Gaby no treito final para ampliar a vantaxe! #DéporABANCAVCFFem 1-0#TocaVolverseMollar ⚽️ #UnÚnicoLatido 💙 #razónDÉcorazón pic.twitter.com/HwhCweFSDs
— RC Deportivo (@RCDeportivo) April 25, 2021
Logo do descanso Athenea del Castillo volveu ás andadas e contra o minuto 50 de xogo provocou unha falta na parte dereita da área do Valencia CF. Alba Merino boutouna e o remate de cabeza de Peke foise por riba do longueiro.
O Dépor recibe o empate
A mala fortuna fixo que un remate coa testa de Cubedo rematase en gol da laranxa logo de que o esférico dese un mal bote debido a auga. Para colmo, o balón fóiselle entre das mans a Sullastres e entrou paseniño na meta herculina.
Co paso dos minutos e a choiva, o terreo de xogo volveuse pesado e o lastre do empate tamén se lle viu enriba ao Dépor ABANCA. Seguírono intentando as branquiazuis pero con menos perigo ca no tempo previo a recibir o tanto valencianista.
A piques de pitarse o final, outra vez a mala sorte freou as deportivistas. Athenea primeiro e Gaby despois, estiveron por marcar, pero os pés da súa compañeira Michelle Romero, no primeiro caso, e Marta Carro no segundo, impediron que o Dépor ABANCA se levase un trunfo que tiña merecido en Abegondo.
O resultado 1-1, coloca ao equipo que adestra Manu Sánchez con 18 puntos, a 5 dos postos que outorgan a permanencia.
Logo do descanso que terán na xornada de luns, as branquiazuis poranse a traballar na preparación do cruce co Madrid CFF, de novo en Abegondo. Será o vindeiro domingo 2 de maio ás 11:30 horas.
FICHA TÉCNICA
DÉPOR ABANCA: Sullastres, Cris, Blanco, Iris, Villegas, Eva Dios (Michelle Romero, min. 81), Alba Merino, Ainoa, Gaby, Peke (Lady Andrade, min. 77) e Athenea.
VALENCIA CF FEMENINO: Enith, Kerlly (Paula Guerrero, min. 61), Jiménez, Berta Pujadas, Esther (Bea Beltrán, min. 46), Candela Andújar, Anna Torrodà, Marta Carro, Salmi (Anita Marcos, min. 46), Ellen Jansen e Asun (Sandra, min. 75).
GOLES: 1-0 Alba Merino (min. 2); 1-1 Cubedo (min. 70).
ÁRBITRA: Peláez Arnillas (c. castellano-leonés). Cartón amarelo a Salmi (min. 11), Athenea (min. 27), Esther (min. 42), Jiménez (min. 49), Candela Andújar (min. 58) e Bea Beltrán (min. 60).
INCIDENCIAS: partido da 27ª xornada da Primera Iberdrola disputado en Abegondo con asistencia limitada a 150 espectadores debido a la pandemia de COVID-19.
