O Dépor ABANCA recibirá este sábado 6 de decembro a partir das 12:00 horas no Estadio ABANCA-Riazor ao Granada CF, dirixido pola ex adestradora deportivista Irene Ferreras.
O vestiario branquiazul, que conseguiu o ascenso á primeira categoría durante a etapa de Irene Ferreras, garda un recordo moi positivo da técnica madrileña. O sentimento é mutuo, xa que ela non deixa pasar ocasión de evocar con certa nostalxia o seu pasado na Coruña e de dedicarlle palabras de aprecio ás xogadoras que a acompañaron naquela etapa.
O Dépor ABANCA recibirá este sábado 6 de decembro ás 12:00 horas no Estadio ABANCA-Riazor ao Granada CF, despois do parón ligueiro polas datas FIFA. O encontro presenta unha oportunidade clave para as branquiazuis, que teñen a posibilidade de darlle un xiro á tempada, recuperar a confianza sobre o verde e comezar a construír unha base sólida que se traduza en resultados positivos, regularidade no xogo e, sobre todo, en tratar de afastarse da zona baixa da táboa e pelexar por algo máis que manter a categoría.
O equipo coruñés, dirixido neste momento polo técnico Fran Alonso, chega a esta cita deportiva con urxencia de puntos para revertir a mala situación que atravesa. Mentres que o Granada CF, situado no 11º posto da clasificación, intentará escalar posicións na LigaF e manterse de lonxe da presión da parte baixa, aínda que moi afastado da meritoria 5ª praza que acadou no curso anterior.
Sobre o papel estamos ante un duelo no que emoción e intensidade estarán presentes en cada balón disputado sobre o tepe do municipal herculino.
Volta das internacionais do Dépor ABANCA
Inês Pereira, Michi Apóstol, Antía Viega e Espe Pizarro (esta última sofre unha lesión muscular no recto femoral da perna dereita) foron as catro xogadoras deportivistas chamadas a formar parte das súas seleccións estatais.
A gardameta lusa, Inês Pereira, é unha habitual nas convocatorias de Portugal, onde comparte vestiario con grandes figuras da Liga F, como a atacante barcelonista Kika Nazareth ou a centrocampista Andreia Jacinto, militante da Real Sociedad.
Mentres tanto, Michi Apóstol é internacional coa selección de Venezuela, onde comparte espazo con futbolistas de renome, como a ex deportivista Gaby García, agora xogadora do Atlético de Madrid, ou a dianteira Deyna Castellanos, con pasado na liga española e ex do Mánchester City.
Espe Pizarro forma parte do cadro uruguayo, aínda que a súa recente lesión obrigouna a regresar á Coruña antes do previsto polas datas internacionais.
En canto a futbolista Antía Veiga, está chamada a ser un dos grandes relevos xeracionais da Selección Española absoluta. Con só 16 anos, a xogadora de Ames formou parte do 11 titular no último encontro do combinado Sub-17 na primeira rolda do Campionato Europeo, que finalizaron como líderes de grupo con pleno de vitorias.
Copa da Raíña
O Dépor ABANCA que adestra Fran Alonso xogará os oitavos de final da Copa da Raíña o vindeiro domingo 21, ás 12:00 horas, en Riazor. Trátase dunha eliminatoria a partido único contra un dos rivais máis duros da competición, aínda que un vello coñecido do cadro deportivista.
No pasado curso producíase este mesmo cruce e na mesma fase do torneo: Dépor ABANCA e Real Sociedad competiron nun duelo moi igualado o 22 de decembro de 2024; naquela ocasión as vascas saíron vitoriosas. Agora, a realidade é distinta. A Real Sociedad ocupa o 2º posto na Liga F con 27 puntos, só por detrás do FC Barcelona, que suma 33.
Un escenario delicado para o equipo dirixido por Fran Alonso, pero no que poden saír vencedoras se presentan un bo plan de xogo e saltan ao campo con seguridade e ambición.
