O enorme traballo de contención defensiva e orde realizado polo Dépor ABANCA durante máis de 80 minutos foi ao lixo por mor de dúas accións a balón parado coas que o Granada CF colleitou dous goles.
O Dépor ABANCA fixo un bo traballo defensivo en El Nuevo Los Cármenes, non así no capítulo ofensivo no que foi pouco ambicioso.
As Nosas deportivistas foron sumando minutos con 0-0 no marcador contendo as chegadas do Granada CF Todo a puntaba a que o decisivo sería o partido de volta que se vai xogar o vindeiro sábado 10 de xuño a partir das 12:00 horas (Youtube RCDeportivo) na Ciudad Deportiva de Abegondo. Pero tanto vai o cántaro á fonte que… O Granada CF recollía o premio á súa teima por intentar perforar a meta defendida por Lucía con dous goles colleitados nos minutos 88 e 96 (na prolongación do partido).
Pese a se 2-0 todo está por decidir de cara ao ascenso a Liga F nese partido de volta da vindeira semana en Abegondo.
En El Nuevo Los Cármenes o Dépor ABANCA empezou o cruce co Granada CF que adestra Roger Lamesa indo a polo partido. Pero pouco a pouco o encontro empezou a xogarse máis no medio campo sen que ningún dos dous conxuntos pisase área rival con perigo.
A deportivista que contaba con máis verticalidade e construía máis de cara á meta rival foi unha vez máis Ainhoa Marín pero as súas internadas pola dereita non atopaban réplica cunha remataora branquiazul na área rival.
Aos poucos o ataque deportivista foi esmorecendo. Pero a orde e seriedade en defensa fíxose aínda máis forte. A contención das coruñesas facía que as granadinas tampouco chegasen a crear perigo. Inés Altamira contou con varias ocasións para demostrar a súa agudeza e a súa capacidade para cortar os intentos locais de achegarse á meta de Lucía.
Na segunda parte o Dépor deixou o partido en mans do Granada CF
A segunda metade foi totalmente de control local. O Dépor ABANCA parecía ter renunciado ao ataque posicional e as contras non se producían. O Granada CF foise facendo forte, crendo máis nas súas posibilidades e gañando terreo ás deportivistas.
Lucía demostrou por varias veces a súa calidade evitando goles que xa cantaba a grada. Inés Altamira mantivo o seu gran nivel defensivo. Pero en xeral a colocación e orde defensivo do equipo que adestra Irene Ferreras foi notable.
Coa lesión de Ainhoa Marín, que tivo que deixar o terreo de xogo, o Dépor ABANCA perdía a súa xogadora máis ofensiva. Xa tiñan entrado no campo Carlota Suárez e Carlota. A elas sumouse para substituir á catalá por mor da súa lesión, Sara Navarro.
Todo parecía indicar que o Dépor ABANCA estaba xogando ao 0-0 buscando resolver a eliminatoria na ida en Abegondo. Pero o Granada CF estaba volcado en intentar levar unha renda a terras coruñesas e finalmente conseguiuno. No minuto 88 botaban un córner que Marta Carrasco peiteaba no primeiro pau e Lauri enviaba ao fondo da rede defendida por Lucía (1-0).
O partido alongouse por mor das interrupcións e na prolongación chegaría a puntilla en forma de segundo gol. Unha vez máis a balón parado, unha vez máis dun saque dende o curruncho. Logo de ter asinado varias paradas que evitaron goles cantados, Lucía non puido despexar correctamente o centro e, coa porteira batida, Pamela González anotaba o 2-0.
Quedan 90 minutos para decidir quen se suma ao Eibar nos postos de ascenso á Liga F. Para conseguir o seu regreso á elite, as branquiazuis deberán gañar por dous goles de diferenza ao Granada CF en Abegondo o vindeiro sábado 10 de xuño a partir das 12:00 horas.
FICHA TÉCNICA
2) GRANADA CF: Sandra, Alba Pérez, Postigo, Marta Carrasco, Gaste, Alicia, Pamela González, Laura Pérez, Lauri (Inés, min. 90+3), Naima e Ángeles (Noe, min. 75).
0) RC DEPORTIVO ABANCA: Lucía, Cris, Inés Altamira, Raquel García, Samara (Monteagudo, min. 86), Paula Gutiérrez, Henar, Ainhoa Marín (Sara Navarro, min. 65), Laura Fernández (Carlota Suárez, min. 61), Charle (Carlota Sánchez, min. 61) e Millene (Eva Dios, min. 86).
GOLES: 1-0 Lauri (min. 88); 2-0 Pamela González (min. 90+6).
EQUIPO ARBITRAL: Coral Couso Cuadrado (colexio catalán). Cartón amarelo a Millene (min. 32), Samara (min. 73) e Postigo (min. 77).
INCIDENCIAS: Partido de ida correspondente á final do play-off de ascenso a Liga F disputado no Estadio Nuevo Los Cármenes de Granada.
