O último partido do ano finalizou con empate para o Dépor ABANCA. As galegas chegaron líderes a San Bartolomé de Tirajana e logo de asinar táboas (1-1) co pecha cancelas, o CD Juan Grande Ginelux, cederon o primeiro posto na táboa da Primera Federación do fútbol feminino da RFEF. Gañar lonxe de Abegondo continúa a ser complicado para as branquiazuis que adestra Irene Ferreras.
Ver esta publicación en Instagram
A superioridade foi branquiazul na primeira metade con triunfo do Dépor ABANCA ao descanso, pero no minuto 77 da segunda metade chegaba o empate.
O Dépor ABANCA gozou de numerosas ocasións ao longo da primeira metade, aos 5 minutos, xa creara perigo o equipo galego. O gol foi froito dun disparo cruzado de Ainhoa Marín no minuto 11 de xogo (0-1).
A posesión do esférico e o dominio do tempo do partido era branquiazul e con iso foron chegando as ocasións de perigo sobre a meta local. Paula Gutiérrez chegou a mandar un balón por riba do traveseiro no 41 tal e como antes fixera Letti Sevilla no 30.
Galegas e grancanarias foron ao vestiario e á volta as locais melloraron a súa pegada. O Dépor ABANCA continuou apretando pero tamén o fixeron as xogadoras do CD Juan Grande Ginelux, tanto que o gol do empate chegaría no minuto 77 de partido da man de Nuria. Foi nunha acción a balón parado que a futbolista cabeceou logo de que o pau rexeitase o primeiro tiro (1-1).
Non baixou os brazos o Dépor ABANCA que volcouse na meta rival e tivo chance para acadar os tres puntos, aínda que finalmente o ansiado segundo gol non chegase.
O Dépor ABANCA é mellor local que visitante
Resísteselle o triunfo a domicilio ás galegas que suman 6 de 18 puntos fóra da casa. Leva tres empates colleitados lonxe de Abegondo que si é un fortín para as branquiazuis. Son xa catro as xornadas seguidas sen perder para o Dépor ABANCA, que remata 2022 con 25 puntos acadados en 13 xornadas disputadas. As deportivistas que adestra Irene Ferreras ceden o liderato pero mantéñense na zona alta da táboa da Primera Federación FutFem da RFEF.
FICHA TÉCNICA
1) CD JUAN GRANDE GINELUX: Recalde, Alba, Cora, Núria, Daysy Bareiro, Valeria (Raquel, min. 72), Morán (Eli, min. 65), Kiang-Si (Alba Quintana, min. 55), Anna Lizarraga (Iris, min. 72), Mar Rubio e Fanny Godoy.
1) RC DEPORTIVO ABANCA: Lucía, Lorena Reina, Inés Altamira, Raquel García, Cris Martínez (Patri López, min. 58), Henar, Letti (Eva Dios, min. 58), Paula Gutiérrez, Ainhoa Marín, Carlota Suárez (Aroa Guerra, min. 75) e Charle.
GOLES: 0-1 Ainhoa Marín (min. 11); 1-1 Núria (min. 77).
EQUIPO ARBITRAL: María Monesma Sánchez (c. aragonés). Cartón amarelo a Henar (min. 76), Inés Altamira (min. 87) e Fanny Godoy (min. 88).
INCIDENCIAS: Partido correspondente á 13ª xornada da Primera Federación FutFem da RFEF disputado no Estadio Municipal Castillo del Romeral (concello de San Bartolomé de Tirajana na illa de Gran Canaria).
