O Dépor volve á Liga tras o memorable partido copeiro do pasado mércores no Estadio Johan Cruyff contra o FC Barcelona. As branquiazuis visitan o domingo (12:00 horas, Ciudad Deportiva de Valdebebas) ao CD Tacón, un equipo que nos próximos meses pasará a ser o Real Madrid e que esta tempada transita pola zona media da clasificación.
Para o partido en Madrid, Manu Sánchez tivo traballo nestas dúas últimas sesións para recuperar física e mentalmente ao seu plantel e tan só poderá contar con 16 xogadoras no canto de 18. Precisamente o esforzo de Barcelona pasou factura a Athenea del Castillo, que será baixa en Valdebebas por unha lesión muscular. A atacante branquiazul únese ás xa confirmadas de Laura Vázquez e Alba Merino.
O Deportivo ABANCA viaxa este sábado 29 de febreiro pola tarde a Madrid para xogar o partido correspondente á 22ª xornada na Primeira Iberdrola. O regreso á Coruña será tras o partido, en autocar.
O plan de viaxe do conxunto deportivista é o seguinte:
Sábado 29 de febreiro
10:30: Adestramento en Abegondo
16:20: Saída do voo do Aeroporto da Coruña con destino Madrid-Adolfo Suárez
17:30 (horario aproximado): Chegada ao Aeroporto de Madrid-Adolfo Suárez e aloxamento no Hotel AC San Sebastián de los Reyes
Domingo 1 de marzo
12:00: CD Tacón – Dépor ABANCA, en Valdebebas
Ao concluír, regreso en autocar á Coruña
