Despois dun 2020 cheo de altibaixos para o Dépor ABANCA, o equipo branquiazul recibía este martes en Abegondo ao FC Barcelona, o mellor equipo da categoría e un dos máis fortes de Europa, para poñer fin ao ano e despedir a competición ata o 2021. Rematou nunha derrota, 1-6, pero que non apaga as boas sensacións das coruñesas.
Como era previsible, as herculinas recibiron unha goleada (1-6), pero o resultado ten unha lectura positiva xa que foron o segundo equipo en lograr marcarlle un gol ás azulgranas esta tempada.
Manu Sánchez: “Facerlle un gol ao Barcelona non é sinxelo”
“Estou orgulloso do traballo do equipo. Penso que traballou arreo os 90 minutos e levamos un premio que é o obxectivo interno que tiñamos. O ano pasado fumos o primeiro equipo que lles marcou gol na tempada e este ano somos o segundo. Facerlle un gol ao Barcelona non é sinxelo”, sinalaba o adestrador herculino, Manu Sánchez.
O Dépor ABANCA faise forte na casa, pero cae ante o líder
Atendendo á traxectoria de ambos equipos, en Abegondo prevíase un festival de goles azulgranas. Finalmente así foi, pero o Barça tivo dificultades para xerar as primeiras ocasións de perigo.
O Dépor ABANCA logrou manter a porteria a cero durante os primeiros vinte minutos de partido e unha única ocasión da catalá Oshoala foi a única ameaza que tivo Noe Bermúdez baixo paos.
Tampouco houbo sorte nos primeiros minutos para as branquiazuis. No 16, Gaby perdeu a ocasión de estrear o marcador ao non chegar a rematar o pase de Athenea tras unha gran acción de índose de ata cinco rivais. Minutos despois, Iris colleu un rechace e pasoulle o balón a Gaby, que tivo outra ocasión que se foi rozando o pao.
Sete minutos sentenciaron o encontro en Abegondo
As deportivistas collían confianza e ritmo, que en seguida víronse freados en seco pola pegada catalá. Sete minutos foron suficientes para sentenciar o partido. No minuto vinte Hermoso abriu a lata de goles para o Barcelona. As visitantes atoparan a fórmula para facerlle dano ao Dépor: centro desde a esquerda e cabezado ao fondo da porteria.
Nos minutos 25 e 27 as azulgranas repetiron a xogada, logrando así dous tantos máis ao seu favor. Pouco antes da pausa polo descanso Aitana logrou o cuarto gol dunha maneira parecida, rematando un pase desde a esquerda. Case chegou o quinto da cabeza de Mariona, pero a gardameta branquiazul foi quen de freala.
Esta táctica pareceu ser a necesaria para que o Barcelona demostrase a súa superioridade no terreo de xogo, xa que a área central estaba ben defendida polas coruñesas e deixaba poucas opcións ao xogo culé.
O gol da honra, de Alba Merino
Tras o paso por vestiarios as visitantes saíron con ganas de rematar o comezado. Bastaron cinco minutos para que Oshoala asinase o quinto gol. Porén, o Dépor mostrouse forte mentalmente e o último que fixo foi baixar os brazos.
Con moito esforzo, o premio para as de Sánchez chegou no minuto 64. Unha gran xogada de Lía permitía que Alba Merino rematase sen dúbidas, asinando o primeiro gol deportivista e o segundo que reciben as catalás en toda a tempada.
Pero o Barcelona aínda tiña máis que dicir e, a case dez minutos do final, Marta Torrejón puxo o sexto e definitivo gol culé. Un 1-6 final que non refrexa o bo facer das deportivista no campo e que da motivos para ser optismistas cara o 2021.
Ata logo de Lía que regresa a Estados Unidos
Este partido, ademais de ser o derradeiro do ano, foi o último de Lía, que marcha aos Estados Unidos a seguir crecendo na súa carreira profesional. Por iso, o adestrador, Manu Sánchez, decidiu outorgarlle o brazalete de capitá e formou parte do once inicial.
“Pensei que sería un bo detalle para ela, que foi unha das que iniciaron este proxecto e agora nos deixa”, declaraba o técnico tras o partido. “Ao final o que consigo é poñela máis nervosa do que xa sae aos partidos, pero foi un detalle bonito. A súa participación no gol foi moi importante, e leva o seu sello de como xoga ela, do mellor que sacamos hoxe”, engadiu.
GRAZAS LÍA por estes meses, por esta segunda etapa como unha d #asnosas. Moita sorte no futuro! #ANosaCasa será sempre a túa.#TocaVolverseMollar ⚽️ #UnÚnicoLatido 💙 #razónDÉcorazón pic.twitter.com/DoinSqm6y6
— RC Deportivo (@RCDeportivo) December 22, 2020
Cambios no once e no sistema
Para este duelo, o adestrador tomou a decisión de fortalecer o centro do campo, en detrimento dos extremos, como intento de frear o xogo do Barcelona. “Cun equipo como o Barcelona tes que descartar zonas. A idea era descartar as bandas onde elas son superiores e traballan moi ben o dous para un. Asumir que iso o tiñamos perdido e fortalecernos por dentro e buscar dúas interiores que saian ás exteriores e provocar que non nos fixeran dano por dentro”, explicou.
Sobre o rival tamén declarou que “é un equipo que te sorprende con cada iniciativa que leva porque son moi superiores e o executan con nobreza no campo. É un pracer telas aquí en Abegondo, non o é o resultado, pero temos que sufrir”, asegurou.
Manu Sánchez: “Era moi complicado, estamos ante un dos mellores equipos do mundo tranquilamente”
Non conseguiron parar ás rivais, pero “o partido foi o que esperabamos. Era moi complicado, estamos ante un dos mellores equipos do mundo tranquilamente”.
Con todo, o técnico está orgulloso do seu equipo e móstrase optimista cara o que resta de tempada. “Penso que un partido como este non pode levarnos ás vacacións de Nadal con mal sabor de boca. O equipo ven en liña ascendente. Este é un mal trago que tiñamos que pasar e a pensar no que ven”. O Dépor ABANCA volverá ao traballo o próximo 30 de decembro.
FICHA TÉCNICA
DÉPOR ABANCA: Noe Bermúdez, Cris, Ainoa, Stephannie Blanco (Lorena Bedoya, min. 91), Villegas, Iris Arnaiz, Lía (Helena Torres, min. 78), Arbeláez, Gaby, Athenea del Castillo (Michelle Romero, min. 65) e Alba Merino.
FC BARCELONA: Paños, A. Pereira, Ana María Crnogorcevic, Melanie (Leila, min. 63), María León, Oshoala, Patri (Losada, min. 57), Aitana (Alexia, min. 63), J. Hermoso, Mariona (Falcón, min. 77) e Martens (Marta, min. 76).
GOLES: 0-1 (J. Hermoso, min. 20), 0-2 (J. Hermoso, min. 25), 0-3 (Oshoala, min. 27), 0-4 (Aitana, min. 35), 0-5 (Oshoala, min. 50), 1-5 (Alba Merino, min. 64), 1-6 (Marta, min. 78),
ÁRBITRA: Alicia Espinosa Ríos. Amonestó a Helena Torres, do Dépor ABANCA, no minuto 91.
INICIDENCIAS: Partido correspondente á décimo terceira xornada na Primera Iberdrola de fútbol feminino español disputado na Cidade Deportiva de Abegondo ante un centenar de persoas.
