Para o Dépor ABANCA e para calquera equipo, nada está rematado até que remata. E As Nosas branquiazuis está claro que van poñer ata o último alento e gañarse a pulso a súa permanencia na elite do fútbol feminino español. Esta mañá de sábado vencían con rotundidade ao Rayo Vallecano en Abegondo cun 3-0 que outorga foltos, puntos e esperanza. As tres cousas moi necesarias nas fías do RCD ABANCA.
Hai unha semanas as branquiazuis regresaban do campo do Rayo Vallecano cunha derrota 3-1 nun partido que fora adiado. Hoxe desquitáronse e devolvéronlle a pelota ás madrileñas impoñéndose por 3-0 con goles de Athenea del Castillo no minuto 23, (tanto co que se chegaría ao descanso 1-0), Alba Merino no 51 (2-0) e de novo Athenea del Castillo no minuto 61 sentenciaba o partido anotando o 3-0.
Final do #DéporABANCARayoFemenino, 3-0! Novo pulo d #asnosas cara a permanencia na #PrimeraIberdrola!#TocaVolverseMollar ⚽️ #UnÚnicoLatido 💙 #razónDÉcorazón pic.twitter.com/WS2WTpxwmn
— RC Deportivo (@RCDeportivo) March 13, 2021
As futbolistas do Dépor ABANCA foron donas e señoras do partido desde o seu nacemento até a súa conclusión. As branquiazuis xogaron un dos mellores partidos deste curso anticipándose sempre aos movementos das súas rivais.
Con todo, antes xusto do final da primeira metade, e pese a que todas as ocasións tiñan sido coruñesas, o Rayo Vallecano deu un bo susto e estivo a piques de anotar no 44 pero a través dun despexe de Alba Merino que case sorprende á súa compañeira Esther Sullastres que, atenta, despexou ao saque de curruncho o envío.
Contra o minuto 6 da segunda metade sería precisamente Alba Merino a que aumentaría a ventaxa das galegas. Ocorreu nunha internada por banda esquerda. Gaby meteu a bica da bota e habilitou cara á capitá que entraba desde atrás. Con potencia e colocación, Alba Merino enchufaba un disparo cruzado raso diante do que nada puido facer Patricia Larqué (2-0).
Superado o cuarto de hora de xogo do segundo tempo chegou a sentencia. A canteirana Eva Dios avanzou pola posición de extrema esquerda enviando un centro baixo. Peke que estaba no primeiro pau, non chegou, pero si o fixo no segundo a súa compañeira Athenea del Castillo que agardaba coa caña preparada para asinar o seu segundo tanto da xornada e o 3-0 para o Dépor ABANCA.
O Dépor ABANCA xa non é colista
Aínda puido caer algún máis, pero o trunfo xa era claro para as galegas que volven coller folgos e esperanzas no seu duro camiño cara á salvación e vence no golaverage ao Rayo Vallecano, no caso de que ese factor decidise a sorte de ambos os dous equipos neste curso 2020-2021.
Este resultado fai que o Dépor ABANCA sume 17 puntos. Deixa así o faroliño vermello e queda a so dous puntos do RCD Espanyol, que é o club que marca a zona de permanencia na categoría de elite do fútbol feminino estatal. É dicir, as futbolistas que adestra Manu Sánchez están a unha victoria de manter a categoría.
FICHA TÉCNICA
RC DEPORTIVO ABANCA: Esther Sullastres, Cris, Iris Arnaiz, Stephannie Blanco, Villegas, Eva Dios (Carlota, min. 86), Alba Merino (María Figueroa, min. 86), Ainoa (Michelle Romero, min. 72), Gaby, Peke e Athenea del Castillo (Lady Andrade, min. 66).
RAYO VALLECANO: Patricia Larqué, Isadora, Cris Auñón, Struck, Hayden (Zaira, min. 69), Catalá (Ruth Bravo, min. 69), Aedo (Yasmin Mrabet, min. 79), Pilar García, Paula Fernández (Patricia Hidalgo, min. 79), Sheila García y Elena (Teresa Morató, min. 69).
GOLES: 1-0 Athenea del Castillo (min. 23); 2-0 Alba Merino (min. 51); 3-0 Athenea del Castillo (min. 61).
ÁRBITRA: Díaz García (Colexio Tinerfeño). Amosou cartón vermello a Cris Auñón ao finalizar o partido por protestar. Previamente viran artón amarelo a Catalá (min. 26), Hayden (min. 65), Teresa Morató (min. 82) e Cris Auñón (min. 87).
INCIDENCIAS: Partido correspondente á 22ª xornada da Liga Primera Iberdrola disputado na Cidade Deportiva de Abegondo con asistencia limitada a 150 espectadores debido ás medidas de prevención de contaxios por mor da pandemia de COVID-19.
