O Dépor ABANCA B e o Victoria CF disputaron a oitava edición do Trofeo Teresa Herrera de fútbol feminino que organizan cada ano o Concello da Coruña e o RC Deportivo. As Nosas deportivistas e as Cebras empataron 1-1 no tempo regulamentado e tiveron que xogarse o torneo desde os 11 metros. O triunfo caeu finalmente do lado das branquiazuis que na quenda de penaltis impuxéronse por 5-3.
O trofeo Teresa Herrera mudou a calor de agosto e as festas de verán da cidade da Coruña, polo frío e a choiva do inverno e o tempo de Nadal. Pero a pandemia de COVID-19 non puido co veterano trofeo de fútbol herculino que mudou de data pero non se deixou tumbar polo coronavirus.
Así, o Teresa Herrera alcanzaba hoxe, domingo 20 de decembro de 2020, a súa 75 edición a pesar das restriccións de aforo nos eventos deportivos, dos peches perimetrais e dos protocolos de protección que non baixaron a guardia nesta cita deportiva. O torneo decano dos amigables venceu á COVID-19 nunha xornada de fútbol atípica en Riazor.
Ao mediodía disputouse a final masculina, que enfrontou ao RC Deportivo con un combinado de xogadores de fútbol modesto con triunfo 6-0 para o equipo que adestra Fernando Vázquez. Mentres que pola tarde disputouse a final feminina entre o RC Deportivo Abanca B e o Victoria C.F. No caso das féminas o torneo chega a súa 8ª edición. O triunfo foi para as deportivistas.
Abría o marcador no minuto 45, xusto antes de pór rumbo á vestiarios o Dépor ABANCA por medio de Eva Dios (1-0). No minuto 87, cando xa o partido morría, chegou o tanto das Cebras. O Victoria CF anotaba por medio de Gara e obrigaba aos dous equipos coruñesas a xogarse o VIII Teresa Herrera na lotaría dos penaltis.
O conxunto deportivista mandou sobre o tepe de Riazor na primeira metade. Antes de chegar ao minuto 30 de partido xa contaran con ocasións futbolistas como Aroa Guerra, Lucía, Eva Dios e Marta Rico. Ao Victoria CF custáballe levar perigo á área rival, pero contou cunha boa oportunidade nas botas de Tati que case marca cunha vaselina. O seu disparo rematou por quedarselle curto e atallouno a gardamallas deportivista Jessi.
Xustamente unha vaselina foi o tipo de disparo polo que optou a branquiazul Eva Dios cando xa estaba disputándose o tempo engadido da primeira metade. O resultado do seu tiro foi o 1-0 para o Dépor ABANCA, un tanteo co que as futbolistas porían rumbo a vestiarios. O pase dérallo Aroa Guerra.
Non mudou moito o guión na segunda metade. Dominio deportivista e boas actuacións da cancerbeira do Victoria CF, Clara. A choiva foi a gran protagonista deste segundo periodo no que futbolistas e terreo de xogo sufrían á par por mor das inclemencias meteorolóxicas.
Un cuarto de hora para o asubío final do #DéporABANCABVictoriaCF polo VIII #TeresaHerrera en #ABANCARIAZOR! pic.twitter.com/1DmPCRnqw7
— RC Deportivo (@RCDeportivo) December 20, 2020
Como sucedera na primeira metade o gol chegou na segunda ao borde de rematar o período. Desta volta no 87 e para as cebras. O tiro foi de Gara que disparou desde lonxe tocando o esférico nunha defensa e descolocando completamente a Jessi que no puido máis que mirar como a pelota se introducía na súa portaría (1-1).
Con ese resultado chegouse ao final dos 90 minutos polo que o VIII Teresa Herrera tivo que decidirse desde o punto de penalti. Andrea Ansede marcou para o Dépor e Jessi detivo o primeiro tiro do Victoria CF, obra de Andra. O resto dos disparos remataron en gol polo que o Dépor ABANCA B levouse o triunfo na quenda de penaltis por 5-3.
O #DéporABANCAB, campión do VIII #TeresaHerrera en #ABANCARIAZOR, ao impoñerse na quenda de penaltis por 5-3! #DéporABANCABVictoriaCF pic.twitter.com/QGFFSrS08k
— RC Deportivo (@RCDeportivo) December 20, 2020
O filial blanquiazul súmase no palmarés do Teresa Herrera de fútbol feminino ao Victoria CF (2013 e 2014), Rayo Vallecano (2015), RC Deportivo ABANCA (2016), Athletic Club (2017 e 2018) e UD Granadilla Tenerife (2019).
O Teresa Herrera retoma o seu fin solidario
A alcaldesa do Concello da Coruña, Inés Rey, acompañada da concelleira de Deportes, Mónica Martínez, e do edil de Relacións Institucionais, Juan Ignacio Borrego, presidiu o 75 Trofeo Teresa Herrera de Fútbol, que nesta edición diferente derivada da pandemia regresou a súas orixes solidarias, axudándolles ás entidades benéficas e homenaxeando o fútbol modesto.
Os fondos recadados hoxe destinaranse ao Proxecto Convivindo, da Fundación Amigó, un servizo gratuíto que pretende darlles unha resposta especializada a aquelas familias que se atopan en situacións de conflito e en risco de exclusión social.
A alcaldesa, Inés Rey, entregoulles ás e aos participantes unha Torre de Hércules de Sargadelos ao remate dos encontros, tanto no partido masculino coma no feminino.
O Concello da Coruña explicaba que con esta celebración acada “os dous principais obxectivos, como son manter a celebración do torneo de fútbol a pesar da crise sanitaria, aínda que nunha data pouco común, e ao mesmo tempo, respectar a finalidade benéfica coa que naceu o trofeo que leva o nome da benefactora Teresa Herrera”. O Concello xa anunciou hai uns días que destinará “o aforro derivado do gasto do tradicional trofeo a gasto social, tan necesario nestas datas para reforzar o escudo social e loitar contra a crise sanitaria derivada da pandemia”.
FICHA TÉCNICA
RC DEPORTIVO ABANCA B: Jessi, Patri López, Sara, María Figueroa (Paula, min. 80), Navia (Laura Rivas, min. 57), Nuria Torres, Marta Rico (Lara, min. 70), Tati (María Calvo, min. 63), Eva Dios (Andrea Ansede, min. 83), Lucía (Carlota, min. 46) y Aroa Guerra (Carmen, min. 80).
VICTORIA CF: Clara (Antía, min. 70), Sofi (Silvia, min. 30) (Iria, min. 46), Tati (Sandra, min. 70), Toro (Ana, min. 46), Miga (Teso, min. 70), Paloma (Leo, min. 46) (Carlita, min. 70), Andrea Merino (Gara, min. 46), Laura Souto (Lau, min. 46), Ceti (Bita, min. 70), Alba García (Charín, min. 35) y María (Andrea, min. 46).
GOLES: 1-0 Eva Dios (min. 45+1); 1-1 Gara (min. 87).
QUENDA DE PENALTIS: Andrea Ansede (gol, 1-0); Andrea (para Jessi); Nuria Torres (gol, 2-0); Ana (gol, 2-1); Carmen (gol, 3-1); Iria (gol, 3-2); Laura Rivas (gol, 4-2); Lau (gol, 4-3); Carlota (gol, 5-3).
ÁRBITRO: Eugenia Gil Soriano do Colexio Galego de Árbitros, amonestou con cartón amarelo ás futbolistas Marta Rico (min. 21), Lucía (min. 29) e Leo (min. 67).
INCIDENCIAS: Partido correspondente á VIII Edición do Trofeo Teresa Herrera de Fútbol Femenino disputado no Estadio ABANCA-RIAZOR con aforo limitado a 1.000 espectadores debido ás restriccións froito da pandemia de COVID-19 que vivimos.
