Se no anterior partido en Abegondo a efectividade foi case de 100%, nesta ocasión o Dépor ABANCA sufriu para acadar o gol que lle deu un triunfo merecido. As branquiazuis chegaban e chegaban sen conseguir ver porta.
Desde o primeiro minuto de xogo as galegas que adestra Irene Ferreras tiveron oportunidade de perforar a meta rival, pero non foi ata o último minuto do encontro que as deportivistas conseguiron o gol que lles deu o triunfo ante o SE AEM por 1-0.
Aínda non se consumira o primeiro minuto de xogo e Charle tivo unha ocasión de ouro a pase de Ainhoa Marín. A porta baleira, a futbolista do Dépor ABANCA non puido rematar ben e habilitou para Millene, que enviou o esférico por fóra dos tres paus. Máis tarde sería Ainhoa Marín a que enviase o primeiro tiro entre os tres paus obrigando a Laura Martí a facer unha estirada.
Serían as primeiras de numerosas ocasións que o Dépor ABANCA tivo neste choque co SE AEM. Pero por moito que as branquiazuis xeraban ocasións de perigo, o tanto non chegaba.
Pasaban os minutos, as chegadas deportivistas levaban lume pero o ansiado gol non subía ao marcador da Cidade Deportiva de Abegondo.
O premio chegou para o Dépor ABANCA no tempo engadido. Pasaban xa catro minutos do 90 cando Sara Navarro lanzou unha falta na frontal. O seu tiro petou na barreira e acabou no fondo da portería. As veces o fútbol é xusto.
FICHA TÉCNICA
1) RC DEPORTIVO ABANCA: Lucía, Cris Martínez, Inés Altamira, Raquel García, Samara, Paula Gutiérrez, Henar, Ainhoa Marín, Eva Dios (Carlota Suárez, min. 71), Charle (Sara Navarro, min. 64) e Millene.
0) SE AEM: Laura Martí, Cristina, Minori, Iris, Lara (Patri Teixidó, min. 82), Andrea Gómez, Yiyi, Jeni Santiago, Astudillo, Anita, Laura Fernández (Abril, min. 90+1).
GOL: 1-0 Sara Navarro (min. 90+4)
EQUIPO ARBITRAL: Sánchez García (c. Castelán-Manchego). Amoestou a Jeni Santiago (min. 14), Iris (min. 72) e Yiyi (min. 82).
INCIDENCIAS: Partido correspondnte á oitava xornada da Primera Federación FutFem da RFEF disputada na Cidade Deportiva de Abegondo ante uns 700 espectadores nas bancadas.
