Na volta de Irene Ferreras a Riazor o Dépor ABANCA acadaba un valioso triunfo por un tanteo de 2-0 que lle da aire nunha situación que por momentos preocupa. Sobre todo no xogo, que no conxunto deportivista non remata de carburar e que, desta volta, si funcionou.
Tardou en arrancar o equipo deportivista para amosar a súa pegada. Non foi ata mediada a segunda parte, pese a que fora por diante no marcador desde a primeira.
O xogo nos primeiros 45 e no arranque da segunda foi máis para Granada CF, pero chegou o momento no que saltou a faisca e as galegas empezaron a manexar os tempos, a facerse coa posesión e a decidir o ritmo de xogo. Xogaron con cabeza e o fútbol fixo o resto. Foron os mellores minutos de xogo do Dépor ABANCA no que vai de tempada na Liga F. A recompesa: tres puntos no peto que valen ouro e dan tranquilidade ás galegas.
Logo do parón FIFAo Dépor ABANCA afrontaba o reto de facerse cos tres puntos diante da súa afición e dar unha boa imaxe diante dun rival complicado que aspiraba a respirar máis tranquilo nunha zona cómoda da táboa clasificatoria da Liga F.
Para sorpresa de ninguén o marcador abriuno Ainhoa Marín e fíxoo nun momento crucial do encontro, ao filo do descanso. Contra do minuto 42 anotaba o 1-0 Ainhoa Marín. A futbolista do Dépor ABANCA encarou portaría e mandou no seu primeiro disparo o esférico ao pau. Ela mesma recolleu o rexeite e rematou o traballo marcando o gol que abría o marcador no electrónico do Estadio Municipal ABANCA-Riazor. A xogada, na linde de cumplirse o tempo da primeira metada, foi un aire para as branquiazuis de cara a poñer camiño a vestiarios. Gol psicolóxico que daba folgos ás galegas de cara á segunda metade.
Inês Pereira salvaba o empate do Granada CF no arranque da segunda metade cando o tiro dunha falta foi camiño da cepa do pau dereito da meta defendida pola lusa. A cancerbeira do equipo herculino despexaba o balón e gañaba o aplauso dunha grada que sabe do valor na portaría da gardamallas portuguesa. Un auténtico seguro de vida nun posto chave.
O Dépor ABANCA amosa a súa mellor faciana
No arranque da segunda metade o Granada CF volcouse en atacar ao Dépor ABANCA. Súa foi a posesión, a iniciativa e as ocasións, non moitas, pero suficientes para que o conxunto galego non estivese cómodo cunha vantaxe dun único gol.
Con Samara levantándose logo de recibir un golpe na cara (sen que o equipo arbitral parase o xogo cando o protocolo indica que cun golpe na cabeza debera deterse), chegou a xogada de maior perigo do Dépor ABANCA ata ese momento. Corría o minuto 60 cando Ainhoa Marín iniciaba un contragolpe pola dereita, quedábase con dúas contrarias e envía o esférico á esquerda por onde entraba Millene Cabral que intenta furar á porta rival por medio dun disparo con efecto, pero o seu tiro foise por fóra dos tres paus.
Pouco tempo para lamentarse xa que na seguinte xogada chegaría o segundo tanto do Dépor ABANCA. Foi no minuto 63 e novamente a autora do tanto foi a futbolista catalá Ainhoa Marín. A deportivista aproveitaba un erro defensivo da zaga visitante. Facíase co balón con viveza e avanzaba cara a porta coa verticalidade que a caracteriza. O seu disparo foi un tiro cruzado axustado ao pau longo e anota o segundo 2-0 para o conxunto galego. Eficiencia máxima a dunha futbolista crucial que é o picante de todas as salsas no ataque deportivista e que transformou unha alta porcentaxe das súas chegadas á meta rival en ocasións de gol.
Chegados ao minuto 69 unha vez máis a dupla conformada por Ainhoa Marín e Millene Cabral son as que levan o perigo á meta rival. Desta volta o disparo de Millene non viu porta, pero o Granada CF sufría coas chegadas do Dépor ABANCA.
O conxunto deportivista empezou a gustarse e tivo neses minutos o que sería a posesión máis longa ata ese momento do partido e, á postre, de todo o encontro. As branquiazúis sentíanse ceibes de presas, manexando a pelota con calma. Tocando o esférico con criterio e facendo correr ao Granada CF. Así, sen estress, e seguras de controlar o encontro, amosaron a súa mellor versión.
No minuto 75 Millene controla con calidade un envío, baixaba o balón, aínda que finalmente remata por fóra da portaría rival, pero con perigo.
Así, si. Contando co control da redonda, manexando os tempos e sabendo que poden ser capaces de todo se cren en si mesmas e nas súas capacidades. Carburando coma un equipo. Pensando en bloque e movendo a redonda con criterio. Sen apresurarse e pensando antes de recibir o balón onde o queres mandar. Este Dépor si gusta.
De feito, foron posiblemente os mellores minutos do Dépor ABANCA en Riazor no que levamos de Liga F 25-26. As ocasións foron chegando e caendo, por que cando o fútbol fai acto de presencia as ocasións acaban aparecendo.
No tempo engadido aínda houbo tempo para un susto cun disparo ao pau do Granada CF, pero no chegou o sangue ao río.
Triunfo por 2-0 con tres puntos de ouro para o peto no equipo que adestra Fran Alonso. Con este resultado o Dépor ABANCA sube un posto na táboa da Liga F (do 13 ao 12) e colócase xusto por detrás do seu rival desta 13.ª xornada da competición. Hai un empate a 13 puntos do posto 8.º ao 12.º que ocupa o conxunto deportivista. Aínda que o RCD Espanyol (8.º), o FC Badalona Women (9.º) e o Athletic Club (10.º) teñen que disputar os seus partidos esta fin de semana.
A Real Sociedad de Fútbol é o próximo rival na Liga F Moeve para ás Nosas deportivistas. O cruce está marcado para o 14 de decembro ás 12:00 h nas Instalacións de Zubieta.
O seguinte chanzo para o Granada CF será recibir a visita do Real Madrid o vindeiro sábado 13 de decembro ás 12:00 h.
FICHA TÉCNICA
2) RC DEPORTIVO ABANCA: Inês Pereira; Samara, Vera, Raquel, Barth, Paula Novo (Cavanagh, m.89); Redru (Lía, m.67), Paula Gutiérrez (Artero, m.89), Lucía Martínez; Millene (Marisa, m.80), Ainhoa Marín.
0) GRANADA CF: Laura Sánchez; Manoly, Alba Pérez, Blanca (Solvoll, m.74), Yoli (Clara, m.81), Postigo; Ari Mingueza 0( (Andrea Gómez, m.81), Leles, Lauri; Laura Pérez, Barquero (Keefe, m.56).
GOLES : 1-0, m.43: Ainhoa Marín. 2-0, m.65: Ainhoa Marín.
EQUIPO ARBITRAL: Elisabeth Calvo (c. madrileño). Amonestó con tarjeta amarilla a Leles (m.34), a Yoli (m.48) y a Alba Pérez (m. 56) del Granada.
INCIDENCIAS: Partido correspondiente á 13.ª xornada da Liga F disputado no Estadio Municipal ABANCA-Riazor coa presenza de 753 espectadores na bancada de Preferencia. Irene Ferreras, ex adestradora deportivista recibiu o aplauso da afección local que ao remate do encontro coreou o seu nome. A técnica, agora á fronte do banco do Granada CF, achegouse a devolver o cariño e os aplausos ao público facendo un aceno de apertas cara á afección deportivista que garda dela un grato recordo que, polas verbas da adestradora nas entrevistas concedidas na última semana, é mutuo. Antes do inicio do partido Millene Cabral recibiu unha camiseta conmemorando so seus 100 partidos co RC Deportivo ABANCA.
