- Dobrete de medallas para Sara del Castillo e Inés Poncela no Campionato de España Sub-17 no que foron ouro e prata en individuais e prata xuntas na competición de dobres femininos.
A pasada fin de semana celebrouse en Granollers o Campionato de España Sub-17 con grandes resultados para o bádminton galego. Tanto que a Federación Galega desta disciplina cualifica o campionato como “inesquecible para o bádminton galego”.
A gran protagonista foi Sara del Castillo, que asinou unha actuación estelar coroándose campioa de España en individual feminino tras unha final fronte á tamén coruñesa Inés Poncela, quen loitou ata o último punto para acadar unha merecidísima medalla de prata. Hai que recordar que ambas as dúas deportistas compiten xuntas en dobres. E da man repetían podio.
Del Castillo e Poncela, prata en dobres
Sara del Castillo e Inés Poncela, deportistas do Club del Mar de San Amaro, volveron subir ao podio, desta vez xuntas, conquistando a medalla de prata en dobres femininos. “Sen dúbida un resultado brillante que reflicte o enorme esforzo e dedicación destas dúas xogadoras, exemplo do gran momento que vive o bádminton galego”, apuntan desde a federación autonómica.
O resto da expedición galega estivo conformada por: Darío Míguez, Guillermo Valdés, Paula Casas (5º posto en dobres mixtos e dobres femininos xunto con Xulia Otero, Maia Freire, Marta Álvarez, Carlota Balboa e Lucía Cid.
