O sábado 22 de outubro de 2022 é un día histórico para o waterpolo galego. Por primeira vez un equipo de Galicia participa nunha Liga estatal de waterpolo Feminina. Trátase do CW Pontevedra, que despois do seu convenio co CW Pavillón Ourense o pasado ano, conseguiu o ascenso á categoría nacional, disputará esta fin de semana o seu primeiro partido.
O destino quixo que sexa fronte ao actual campión da tempada pasada en liga regular, o Simalga Real Canoe NC (Madrid), comezando o partido ás 17:00 h. O partido poderá verse ao vivo a través da canle oficial en YouTube do Real Canoe NC.
Explican desde o CW Pontevedra que “O equipo galego ten feito unha boa preparación, e co obxectivo de contrarrestar todas as dificultades que van atopar (competición nova, adaptación…). O bloque viaxa a Madrid co equipo nun gran estado de forma física e psíquicamente, e é que a gran motivación e ilusión das xogadoras son clave para un gran traballo diario, e sen poder predicir un resultado, si podemos dicir que realizaron o traballo previo cunha intensidade digna de ser mencionada”.
“Nin a viaxe en coche de 6 horas,nin unha competición nova, son motivos suficientes para escurecer a gran ilusión coa que van as xogadoras”, contan desde o CW Pontevedra. Este grupo de deportistas viaxan camiño á historia, como o primeiro grupo de 13 valentes que foron disputar o seu primeiro partido estando no punto de mira de toda Galicia e todo o territorio estatal. “Buscarán deixar unha magnífica imaxe, e este club xa está orgulloso do gran grupo humano das máis de 20 xogadoras do primeiro equipo”, trasladan desde a entidade pontevedresa.
O CW Pontevedra e o Simalga Real Canoe atópanse no Grupo A da primeira fase da Primera División Femenina española de waterpolo onde tamén militan os seguintes clubs: Santa Eulalia, Alcorcón, Pontevedra, Leioa, Mallorca, Horta e Marbella.
Segundo explican desde o Simalga Real Canoe o obxectivo do club nesta tempada “será conseguir o primeiro lugar na clasificación de grupo e así entrar co maior número de puntos posibles na segunda fase da competición”. Para iso precisa acadar un resultado positivo desde o primeiro ao último partido desta fase. O primeiro paso será recibindo ás debutantes galegas do CW Pontevedra.
O domingo o CW Pontevedra xoga tres partidos de Ligas Galegas
O vindeiro domingo 23 de outubro o Club Waterpolo Pontevedra volve organizar unha nova xornada das ligas galegas de waterpolo na piscina do CGTD de Pontevedra. O club pontevedrés recibirá ao CW Lugo, que ademais de xogar co seu equipo absoluto masculino, por primeira vez competirá en categorías infantil e cadete mixta.
O primeiro partido (9:30 h) será o de Liga Galega Infantil Mixta de waterpolo, onde ademais do equipo visitante, debutarán algúns xogadores do Club Waterpolo Pontevedra, que comezarán a gozar de minutos de xogo para ir sumando experiencia competitiva na piscina.
Ás 11:00 horas está previsto que se dispute o partido de Liga Galega Cadete Mixta, onde o Club Waterpolo Pontevedra continuará rotando aos seus xogadores, xa que esta tempada conta cun bloque moi amplo.
O último partido da xornada (12:30 h) será o de Liga Galega Absoluta Masculina de División de Honra. O equipo pontevedrés, que perdeu na primeira xornada a pesar de dar unha boa imaxe, espera lograr os seus primeiros tres puntos da tempada. Non o terá fácil, xa que o CW Lugo vén motivado tras lograr unha valiosa vitoria na primeira xornada. Os reforzos cos que conta esta tempada están a axudarlle a seguir crecendo. Entre eles, o ex xogador do CW Pontevedra Lucas Puy, que por motivo de estudos vive en Lugo e foi ben acollido polo CW Lugo.
