Primeiros tres puntos en xogo na Ok Liga Ibedrola 2022-23 e primeiros no peto para as verdibrancas do HC Deportivo Liceo. Debut na casa, ante a súa afección con boa imaxe e resultado positivo.
Máis positivo aínda para Marlena Rubio que se estreaba coa elástica liceísta e fíxoo anotando o gol do triunfo. O equipo que por segundo ano adestra Stanis García, ofreceu bo xogo pero tivo que loitar moito ante un Solidelo PHC Sant Cugat que non o puxo doado ás liceístas. De feito a vitoria foi pola mínima e traballada.
Hai que ter presente que no bando local, o HC Deportivo Liceo aínda non conta con importantes figuras dentro da cancha como as internacionais Bea Gaete e Adriana Soto, pendentes de incorporación máis adiante.
Dispuxo Alba Garrote dunha falta directa como unha das mellores ocasións das liceístas na primeira metade pero o marcador non se movería ata despois do descanso.
Foi cando quedaban 17 para o final do partido cando Marlena Rubio Ramón anotaba no seu debut coa camiseta verdibranca (1-0). O gol sería definitivo.
Tres puntos loitados, sudados e gañados a pulso das coruñesas neste primeiro cruce da Ok Liga Ibedrola diante o equipo que adestra Alberto Borregán.
Seguinte rival na Ok Liga: o Cerdanyola
O próximo reto do HC Deportivo Liceo na Ok Liga Iberdrola será contra o Cerdanyola CH Feníe Energía o domingo 25 de setembro ás 13:30 horas. Arbitrará o partido o colexiado Albert León Figuerola auxiliado por Ignacio Montón López.
O rival das herculinas estará dolido logo de recibir un contundente 10-0 por parte do Martinelina CP Manlleu. Froito da goleada dúas das xogadoras do CP Manlleu figuran como segunda e terceiras máximas goleadoras logo desta primeira xornada (Ona Castellví Payés con catro goles, e Anna Casaramona con tres). O Martinellia CP Manlleu é líder da Ok Liga Iberdrola precisamente por esa diferencia de goles. Síguenlle Generali HC Palau de Plegamans e o CP Vila-Sana.
FICHA TÉCNICA
1) HC DEPORTIVO LICEO: Viky Caretta, María Sanjurjo, Lara Yáñez, Marlena Rubio e Alba Garrote – quinteto inicial -. Tamén xogaron: Cris Diz, Lucía Paz (C) e Alejandra Martín.
0) SOLIDELO PHC SANT CUGAT: Irache Candal, Laura Porta, Andrea Massons Obach, Texell Gimeno Moreno e Alba Ambrós (C) – quinteto inicial -. Tamén xogaron: María Just Ardevol, Adriadna Avilés Lara e Anna Martín Jiménez.
GOL: 1-0 min. 33 Marlena Rubio.
EQUIPO ARBITRAL: Lorenzo Bosch que amosou cartón azul a Andrea Massons por parte do Sant Cugat.
INCIDENCIAS: Partido disputado no Pazo dos Deportes de Riazor na Coruña, correspondente á primeira xornada da Ok Liga Iberdrola de hoquei sobre patíns da FEP.
