A piscina do CD Álvaro Pino en Ponteareas acolleu o XVIII Campionato Galego de Longa Distancia en piscina, no que María de Valdés, do CN Liceo, proclamouse campioa absoluta. Na competición, que tamén contou con categorías júnior e infantil, Paula Otero, Alicia Bouzas e Lucía Villarnovo tamén colgáronse o ouro.
Na clasificación por clubes o C.N. Galaico foi o mellor clasificado, seguido do C.N. Ferrol que foi segundo e o C.N. Ponteareas, terceiro.
Os ouros de longa distancia
Na categoría infantil, ata 22 nadadoras citáronse na piscina de Ponteareas, onde Lucía Villarnovo, do CN Ferrol, sería a mellor clasificada, cunha marca de 23:59.28 que lle permitiría rematar en primeira posición. O segundo posto foi para Inés Mourenza, do CN Portamiñá Lugo, chegando 21 segundos por detrás da vencedora. Finalmente, o podio destes 2000 metros libres pechouno María Álvarez, do Rías Baixas, cun tempo de 24:49.41.
Nas listaxe da categoría júnior 1, a campioa foi Alicia Bouzas, do CN Galaico, rematando a competición dos 3000 metros libres cun tempo de 34:34.62. En segundo lugar chegaría Iria Lemos, do Ponteareas, cunha marca de 35:32.22. Pola súa banda, Sofía Carballo, tamén do Ponteareas, sería terceira cun 36:13.28.
Xa en júnior 2, entre as catro nadadoras que competiron a mellor foi Paula Otero, do CN Arteixo, campioa cun 34:03.90. Eva Pardo, do CN Ferrol, foi segunda, cun 36:33.04. Finalmente, Andrea Domínguez, do Ponteareas, foi bronce cun 38:06.30.
Paula Otero: “Ver pasar aos olímpicos ao meu carón pareceume unha pasada”
Na competición absoluta, a andaluza María de Valdés foi a vencedora, rematando a proba en 32:47.38. A prata foi para Ana Pérez, do Galaico, quen fixo un tempo de 36:18.81 e o bronce para Ana Veiga, do CN Arteixo, cunha marca de 37:00.01.
Valdés estará co Equipo Nacional Absoluto no Campionato do Mundo
A vencedora do Campionato Galego de Longa Distancia María de Valdés estará presente no Campionato de Mundo en piscina de 25 que comeza este xoves 16 en Abu Dhabi ao entrar na convocatoria do Equipo Nacional Absoluto. A competición rematará o 21 de decembro e De Valdés competirá nos 400 e 800 libre.