A pasada fin de semana celebrouse en Pontevedra o XVII Campionato Galego de Longa Distancia, fase territorial do Campionato de España de natación desta modalidade. A vencedora na categoría absoluta de 3.000 metros libres foi María de Valdés.
Cun tempo de 32:30.54, a nadadora do galego CN Liceo colgouse a medalla de ouro nesta proba, vital para o próximo torneo estatal. Seguina de preto a tamén coruñesa Ana Veiga, do Club del Mar de San Amaro, quedando case catro segundos por debaixo. Pecha o podio unha compañeira súa de equipo, Nerea Alvite.
Paula Otero, do Club Natación Arteixo, tamén acadou un ouro en 3.000 metros libres, pero esta en categoría Júnior 1. Desde os primeiros metros, a proba situouse de cara para a nadadora coruñesa, que logrou vencer cun tempo de 33:30.32. Desta forma, Otero clasifícase para o vindeiro campionato estatal en Fase Nacional.
Por detrás dela quedaron Alicia Bouzas, do Club Natación Galaico, e Alexia Camba, do C.N. Pabellón Ourense.
En Júnior 2, o ouro foi para Carla Faro, do C.N. Ponteareas, seguida da súa compañeira Andrea Domínguez. Na terceira posición quedou Lucía Cal, do Real Club Náutico de Vigo.
En infantil, a campioa foi, de novo, Carla Faro, cun tempo de 24:12.12. Na prata repite o mesmo club, con Sofía Carballo. No posto de bronce situouse Paula Fariña, do Galaico.
En total ata 12 clubs e 42 nadadoras participaron nas diferentes probas femininas que tiveron lugar no torneo galego en Pontevedra. Na clasificación por clubs, sumando as categorías masculinas, o gañador foi o C.N. Ponteareas, seguido polo C.N. Galaico e o Club del Mar de San Amaro.
