- “A competitividade subiu moitísimo e iso é bo porque aumenta o nivel”
- “Cando saímos fóra da casa nos sentimos máis liberadas”
O parón de Nadal chega á Primera Nacional con boas perspectivas para varios dos equipos galegos. O podio da categoría no grupo 1 está ocupado plenamente por conxuntos irmandiños, sendo o bronce para o Sárdoma CF que adestra David Ferreiro.
O conxunto branquiazul chega á fin da primeira volta con 26 puntos, obtidos en oito vitorias e dous empates. No apartado goleador, o equipo suma 24 goles a favor por 13 tantos en contra. Como visitante, as xogadoras ás ordes de Ferreiro son o mellor equipo visitante, puntuando en todos os partidos que xogou fóra da casa.
O técnico valora moi positivamente os primeiros meses de competición para o Sárdoma, nunha categoría que considera cada vez máis dura, pero para a que as súas futbolistas, como Irene, a terceira máxima goleadora, están preparadas. Pero o máis importante para manterse na zona alta é “gañar cando estás ben e tamén cando non”.
As Nosas: Que valoración fas desta primeira volta?
David Ferreiro: A valoración que fago é que penso que con respecto ao paso dos anos esta liga aumentou moitísimo o nivel. Penso que antes había rivais que eran máis adquiribles por así dicilo, este ano con todos os rivais podes gañar con eles, perder con eles, tanto se xoga o primeiro como o último. A competitividade subiu moitísimo e iso é bo porque aumenta o nivel e fai máis competitiva a liga.
As Nosas: Sodes o mellor equipo visitante, con cinco vitorias en seis partidos xogados. Cal é a clave?
David Ferreiro: Parece que se nos da ben xogar fóra da casa. É algo no que penso bastante e creo que ten que ver coa traxectoria deste equipo co paso dos anos. O equipo conserva moitas xogadoras de hai moito tempo e antes de chegar eu tiveron varios malos resultados consecutivos e non conseguían gañar, sobre todo en casa. É algo do pasado que estamos intentando cambiar e se está cambiando loxicamente. Penso que cando saímos fóra da casa nos sentimos máis liberadas, sen a presión de ter que gañar en casa. Axúdanos a estar máis liberadas no noso xogo.
As Nosas: De todas formas, o voso último partido foi unha vitoria na casa
David Ferreiro: Si, ademais foi nun partido no que non estivemos moi ben. Penso que é importante gañar cando estás ben e tamén cando non estás ben. É importante para manternos aí arriba no terceiro posto.
AN: Quen vai tamén nunha terceira posición particular é Irene, a terceira máxima goleadora da categoría
DF: É unha futbolista moi importante para nós. Penso que foi unha incorporación top para o noso equipo porque é unha xogadora que ten unhas cualidades brutais no xogo de costas, arranca co balón, cos rivais atrás. É unha xogadora cunha mentalidade competitiva que é difícil de atopar.
David Ferreiro: “(Irene) é unha xogadora cunha mentalidade competitiva difícil de atopar”
AN: Como aproveitaredes o parón de Nadal?
DF: Sempre que paramos hai que recargar pilas, repasar cousas porque ao final cando tes un modelo de xogo, ningún adestrador pode dicir que xa chegou a facer todo o que tiña que facer. Hai que renovarse e mellorar. Estas semanas vannos vir ben para recuperarnos e apretar ao equipo e sobre todo para repasar cousas e seguir evolucionando.
David Ferreiro: “Hai que renovarse e mellorar”
AN: Quizais é cedo, pero cales cres que son os equipos que rematarán nos primeiros postos do voso grupo?
DF: Predecir no fútbol é moi moi complicado. O único que che podo dicir é que ogallá nos colla ao Sárdoma entre os tres ou dous primeiros que é o que quero. Os que poden quedar arriba, xa ves, Friol e Interrías, non sei se ao final o Victoria da Coruña vaise enganchar, que pode ser. Tamén están o Deportivo, o Olímpico de León creo que son rivais a ter en conta.
